१. विभङ्गवारो

नहेतुपच्चयो

३३. परित्तं धम्मं पच्चया परित्तो धम्मो उप्पज्जति नहेतुपच्चया – अहेतुकं परित्तं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… अहेतुकपटिसन्धिक्खणे…पे… खन्धे पच्चया वत्थु, वत्थुं पच्चया खन्धा; एकं महाभूतं…पे… असञ्ञसत्तानं…पे… चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं, वत्थुं पच्चया अहेतुका परित्ता खन्धा, विचिकिच्छासहगते उद्धच्चसहगते खन्धे च वत्थुञ्च पच्चया विचिकिच्छासहगतो उद्धच्चसहगतो मोहो. (१)

नआरम्मणपच्चयो

३४. परित्तं धम्मं पच्चया परित्तो धम्मो उप्पज्जति नआरम्मणपच्चया (पटिच्चवारसदिसं. पञ्च).

नअधिपतिपच्चयो

३५. परित्तं धम्मं पच्चया परित्तो धम्मो उप्पज्जति नअधिपतिपच्चया – परित्तं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… ५३असञ्ञसत्तानं…पे… चक्खायतनं…पे… कायायतनं…पे… वत्थुं पच्चया परित्ता खन्धा. (१)

परित्तं धम्मं पच्चया महग्गतो धम्मो उप्पज्जति नअधिपतिपच्चया – वत्थुं पच्चया महग्गताधिपति, वत्थुं पच्चया विपाका महग्गता खन्धा. पटिसन्धिक्खणे वत्थुं पच्चया महग्गता खन्धा. (२)

परित्तं धम्मं पच्चया अप्पमाणो धम्मो उप्पज्जति नअधिपतिपच्चया – वत्थुं पच्चया अप्पमाणाधिपति. (३)

परित्तं धम्मं पच्चया परित्तो च महग्गतो च धम्मा उप्पज्जन्ति नअधिपतिपच्चया – वत्थुं पच्चया विपाका महग्गता खन्धा, महाभूते पच्चया चित्तसमुट्ठानं रूपं. पटिसन्धिक्खणे…पे…. (४)

३६. महग्गतं धम्मं पच्चया महग्गतो धम्मो उप्पज्जति नअधिपतिपच्चया – महग्गते खन्धे पच्चया महग्गताधिपति, विपाकं महग्गतं एकं खन्धं पच्चया तयो खन्धा…पे… द्वे खन्धे…पे… पटिसन्धिक्खणे…पे…. (१)

महग्गतं धम्मं पच्चया परित्तो धम्मो उप्पज्जति नअधिपतिपच्चया – विपाके महग्गते खन्धे पच्चया चित्तसमुट्ठानं रूपं. पटिसन्धिक्खणे…पे…. (२)

महग्गतं धम्मं पच्चया परित्तो च महग्गतो च धम्मा उप्पज्जन्ति नअधिपतिपच्चया – विपाकं महग्गतं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे…. (३)

अप्पमाणं धम्मं पच्चया अप्पमाणो धम्मो उप्पज्जति नअधिपतिपच्चया – अप्पमाणे खन्धे पच्चया अप्पमाणाधिपति. (१)

३७. परित्तञ्च अप्पमाणञ्च धम्मं पच्चया अप्पमाणो धम्मो उप्पज्जति नअधिपतिपच्चया – अप्पमाणे खन्धे च वत्थुञ्च पच्चया अप्पमाणाधिपति. (१)

परित्तञ्च महग्गतञ्च धम्मं पच्चया परित्तो धम्मो उप्पज्जति नअधिपतिपच्चया – विपाके महग्गते खन्धे च महाभूते च पच्चया चित्तसमुट्ठानं रूपं. पटिसन्धिक्खणे…पे…. (१)

परित्तञ्च महग्गतञ्च धम्मं पच्चया महग्गतो धम्मो उप्पज्जति नअधिपतिपच्चया – महग्गते खन्धे च वत्थुञ्च पच्चया महग्गताधिपति, विपाकं महग्गतं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे… पटिसन्धिक्खणे…पे…. (२)

परित्तञ्च महग्गतञ्च धम्मं पच्चया परित्तो च महग्गतो च धम्मा उप्पज्जन्ति नअधिपतिपच्चया – विपाकं महग्गतं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे… विपाके महग्गते खन्धे च महाभूते च पच्चया चित्तसमुट्ठानं रूपं. पटिसन्धिक्खणे विपाकं महग्गतं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे… विपाके महग्गते खन्धे च महाभूते च पच्चया कटत्तारूपं. (३)

नअनन्तरपच्चयादि

३८. परित्तं धम्मं पच्चया परित्तो धम्मो उप्पज्जति नअनन्तरपच्चया… नसमनन्तरपच्चया… नअञ्ञमञ्ञपच्चया… नउपनिस्सयपच्चया… नपुरेजातपच्चया… (पटिच्चवारसदिसा द्वादस पञ्हा) नपच्छाजातपच्चया… नआसेवनपच्चया… (परिपुण्णं, विपाकोति निद्दिसितब्बं चित्तसमुट्ठानं रूपं विपाकोति न कातब्बं) नकम्मपच्चया… नविपाकपच्चया… (पटिसन्धिविपाकोपि नत्थि) नआहारपच्चया… नइन्द्रियपच्चया… नझानपच्चया… नमग्गपच्चया… नसम्पयुत्तपच्चया… नविप्पयुत्तपच्चया… नोनत्थिपच्चया… नोविगतपच्चया.