१. विभङ्गवारो

हेतुपच्चयो

२८. परित्तं धम्मं पच्चया परित्तो धम्मो उप्पज्जति हेतुपच्चया – परित्तं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… खन्धे पच्चया वत्थु, वत्थुं पच्चया खन्धा; एकं महाभूतं पच्चया…पे… उपादारूपं, वत्थुं पच्चया परित्ता खन्धा. (१)

परित्तं धम्मं पच्चया महग्गतो धम्मो उप्पज्जति हेतुपच्चया – वत्थुं पच्चया महग्गता खन्धा. पटिसन्धिक्खणे वत्थुं पच्चया महग्गता खन्धा. (२)

परित्तं धम्मं पच्चया अप्पमाणो धम्मो उप्पज्जति हेतुपच्चया – वत्थुं पच्चया अप्पमाणा खन्धा. (३)

परित्तं धम्मं पच्चया परित्तो च अप्पमाणो च धम्मा उप्पज्जन्ति हेतुपच्चया – वत्थुं पच्चया अप्पमाणा खन्धा, महाभूते पच्चया चित्तसमुट्ठानं रूपं. (४)

परित्तं धम्मं पच्चया परित्तो च महग्गतो च धम्मा उप्पज्जन्ति हेतुपच्चया – वत्थुं पच्चया महग्गता खन्धा, महाभूते पच्चया चित्तसमुट्ठानं रूपं. पटिसन्धिक्खणे वत्थुं पच्चया महग्गता खन्धा. (५)

२९. महग्गतं धम्मं पच्चया महग्गतो धम्मो उप्पज्जति हेतुपच्चया – महग्गतं एकं खन्धं पच्चया तयो खन्धा…पे… पटिसन्धिक्खणे महग्गतं एकं खन्धं…पे…. (१)

महग्गतं धम्मं पच्चया परित्तो धम्मो उप्पज्जति हेतुपच्चया – महग्गते खन्धे पच्चया चित्तसमुट्ठानं रूपं. पटिसन्धिक्खणे…पे…. (२)

महग्गतं धम्मं पच्चया परित्तो च महग्गतो च धम्मा उप्पज्जन्ति हेतुपच्चया – महग्गतं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे महग्गतं एकं खन्धं…पे…. (३)

अप्पमाणं धम्मं पच्चया अप्पमाणो धम्मो उप्पज्जति हेतुपच्चया – अप्पमाणे… तीणि.

३०. परित्तञ्च अप्पमाणञ्च धम्मं पच्चया परित्तो धम्मो उप्पज्जति हेतुपच्चया – अप्पमाणे खन्धे च महाभूते च पच्चया चित्तसमुट्ठानं रूपं. (१)

परित्तञ्च अप्पमाणञ्च धम्मं पच्चया अप्पमाणो धम्मो उप्पज्जति हेतुपच्चया – अप्पमाणं एकं खन्धञ्च वत्थुञ्च पच्चया तयो खन्धा…पे…. (२)

परित्तञ्च अप्पमाणञ्च धम्मं पच्चया परित्तो च अप्पमाणो च धम्मा उप्पज्जन्ति हेतुपच्चया – अप्पमाणं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे… अप्पमाणे खन्धे च महाभूते च पच्चया चित्तसमुट्ठानं रूपं. (३)

परित्तञ्च महग्गतञ्च धम्मं पच्चया परित्तो धम्मो उप्पज्जति हेतुपच्चया… तीणि (पटिसन्धिक्खणे तीणिपि कातब्बा).

आरम्मणपच्चयादि

३१. परित्तं धम्मं पच्चया परित्तो धम्मो उप्पज्जति आरम्मणपच्चया – परित्तं एकं खन्धं पच्चया तयो खन्धा…पे… द्वे खन्धे…पे… पटिसन्धिक्खणे…पे… वत्थुं पच्चया खन्धा, चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं, वत्थुं पच्चया परित्ता खन्धा (अवसेसा छ पञ्हा हेतुपच्चयसदिसा सत्त कातब्बा), अधिपतिपच्चया (पटिसन्धि नत्थि, सत्तरस पञ्हा परिपुण्णा), अनन्तरपच्चया…पे… अविगतपच्चया.

१. पच्चयानुलोमं

२. सङ्ख्यावारो

३२. हेतुया सत्तरस, आरम्मणे सत्त, अधिपतिया सत्तरस, अनन्तरे सत्त, समनन्तरे सत्त, सहजाते सत्तरस, अञ्ञमञ्ञे नव, निस्सये सत्तरस, उपनिस्सये सत्त, पुरेजाते सत्त, आसेवने सत्त, कम्मे सत्तरस, विपाके सत्तरस, आहारे सत्तरस, इन्द्रिये झाने मग्गे सत्तरस, सम्पयुत्ते सत्त, विप्पयुत्ते सत्तरस, अत्थिया सत्तरस, नत्थिया सत्त, विगते सत्त, अविगते सत्तरस (एवं गणेतब्बं)

अनुलोमं.