१. विभङ्गवारो

नहेतुपच्चयो

८. आचयगामिं धम्मं पटिच्च आचयगामी धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

नेवाचयगामिनापचयगामिं धम्मं पटिच्च नेवाचयगामिनापचयगामी धम्मो उप्पज्जति नहेतुपच्चया – अहेतुकं नेवाचयगामिनापचयगामिं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… अहेतुकपटिसन्धिक्खणे…पे… खन्धे पटिच्च वत्थु, वत्थुं पटिच्च खन्धा; एकं महाभूतं…पे… बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं…पे…. (१)

नआरम्मणपच्चयो

९. आचयगामिं धम्मं पटिच्च नेवाचयगामिनापचयगामी धम्मो उप्पज्जति नआरम्मणपच्चया – आचयगामी खन्धे पटिच्च चित्तसमुट्ठानं रूपं. (१)

अपचयगामिं धम्मं पटिच्च नेवाचयगामिनापचयगामी धम्मो उप्पज्जति नआरम्मणपच्चया – अपचयगामी खन्धे पटिच्च चित्तसमुट्ठानं रूपं. (१)

नेवाचयगामिनापचयगामिं धम्मं पटिच्च नेवाचयगामिनापचयगामी धम्मो उप्पज्जति नआरम्मणपच्चया – नेवाचयगामिनापचयगामी खन्धे पटिच्च चित्तसमुट्ठानं रूपं. पटिसन्धिक्खणे…पे… खन्धे पटिच्च वत्थु…पे… एकं महाभूतं…पे… बाहिरं… आहारसमुट्ठानं… उतुसमुट्ठानं… असञ्ञसत्तानं…पे…. (१)

आचयगामिञ्च नेवाचयगामिनापचयगामिञ्च धम्मं पटिच्च नेवाचयगामिनापचयगामी धम्मो उप्पज्जति नआरम्मणपच्चया – आचयगामी खन्धे च महाभूते च पटिच्च चित्तसमुट्ठानं रूपं. (१)

अपचयगामिञ्च नेवाचयगामिनापचयगामिञ्च धम्मं पटिच्च नेवाचयगामिनापचयगामी धम्मो उप्पज्जति नआरम्मणपच्चया – अपचयगामी खन्धे च महाभूते च पटिच्च चित्तसमुट्ठानं रूपं. (१)

नअधिपतिपच्चयो

१०. आचयगामिं धम्मं पटिच्च आचयगामी धम्मो उप्पज्जति नअधिपतिपच्चया… तीणि.

अपचयगामिं धम्मं पटिच्च अपचयगामी धम्मो उप्पज्जति नअधिपतिपच्चया – अपचयगामी खन्धे पटिच्च अपचयगामी अधिपति. (१)

नेवाचयगामिनापचयगामिं धम्मं पटिच्च नेवाचयगामिनापचयगामी धम्मो उप्पज्जति नअधिपतिपच्चया – नेवाचयगामिनापचयगामिं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… खन्धे पटिच्च वत्थु, वत्थुं पटिच्च खन्धा; एकं महाभूतं…पे… बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं…पे…. (१)

आचयगामिञ्च नेवाचयगामिनापचयगामिञ्च धम्मं पटिच्च नेवाचयगामिनापचयगामी धम्मो उप्पज्जति नअधिपतिपच्चया – आचयगामी खन्धे च महाभूते च पटिच्च चित्तसमुट्ठानं रूपं. (१)

नअनन्तरपच्चयादि

११. आचयगामिं धम्मं पटिच्च नेवाचयगामिनापचयगामी धम्मो उप्पज्जति नअनन्तरपच्चया… नसमनन्तरपच्चया… नअञ्ञमञ्ञपच्चया… नउपनिस्सयपच्चया… नपुरेजातपच्चया (कुसलत्तिकसदिसा सत्त पञ्हा)… नपच्छाजातपच्चया.

नआसेवनपच्चयो

१२. आचयगामिं धम्मं पटिच्च आचयगामी धम्मो उप्पज्जति नआसेवनपच्चया… तीणि.

अपचयगामिं धम्मं पटिच्च नेवाचयगामिनापचयगामी धम्मो उप्पज्जति नआसेवनपच्चया – अपचयगामी खन्धे पटिच्च चित्तसमुट्ठानं रूपं. (१)

नेवाचयगामिनापचयगामिं धम्मं पटिच्च नेवाचयगामिनापचयगामी धम्मो उप्पज्जति नआसेवनपच्चया (एका पञ्हा सब्बे महाभूता कातब्बा).

आचयगामिञ्च नेवाचयगामिनापचयगामिञ्च धम्मं पटिच्च नेवाचयगामिनापचयगामी धम्मो उप्पज्जति नआसेवनपच्चया – आचयगामी खन्धे च महाभूते च पटिच्च चित्तसमुट्ठानं रूपं. (१)

अपचयगामिञ्च नेवाचयगामिनापचयगामिञ्च धम्मं पटिच्च नेवाचयगामिनापचयगामी धम्मो उप्पज्जति नआसेवनपच्चया – अपचयगामी खन्धे च महाभूते च पटिच्च चित्तसमुट्ठानं रूपं. (१)

नकम्मपच्चयो

१३. आचयगामिं धम्मं पटिच्च आचयगामी धम्मो उप्पज्जति नकम्मपच्चया – आचयगामी खन्धे पटिच्च आचयगामी चेतना. (१)

अपचयगामिं धम्मं पटिच्च अपचयगामी धम्मो उप्पज्जति नकम्मपच्चया – अपचयगामी खन्धे पटिच्च अपचयगामी चेतना. (१)

नेवाचयगामिनापचयगामिं धम्मं पटिच्च नेवाचयगामिनापचयगामी धम्मो उप्पज्जति नकम्मपच्चया – नेवाचयगामिनापचयगामी खन्धे पटिच्च नेवाचयगामिनापचयगामी चेतना; बाहिरं… आहारसमुट्ठानं… उतुसमुट्ठानं… एकं महाभूतं…पे…. (१)

नविपाकपच्चयादि

१४. आचयगामिं धम्मं पटिच्च आचयगामी धम्मो उप्पज्जति नविपाकपच्चया (परिपुण्णं, पटिसन्धि नत्थि)… नआहारपच्चया… नइन्द्रियपच्चया… नझानपच्चया… नमग्गपच्चया… नसम्पयुत्तपच्चया… नविप्पयुत्तपच्चया (तीणि)… नोनत्थिपच्चया… नोविगतपच्चया.