१. विभङ्गवारो

नहेतुपच्चयो

२६. आचयगामिं धम्मं पच्चया आचयगामी धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे पच्चया विचिकिच्छासहगतो उद्धच्चसहगतो मोहो. (१)

नेवाचयगामिनापचयगामिं धम्मं पच्चया नेवाचयगामिनापचयगामी धम्मो उप्पज्जति नहेतुपच्चया – अहेतुकं नेवाचयगामिनापचयगामिं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… अहेतुकपटिसन्धिक्खणे…पे… असञ्ञसत्तानं एकं महाभूतं…पे… चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं. वत्थुं पच्चया अहेतुका नेवाचयगामिनापचयगामी खन्धा. (१)

नेवाचयगामिनापचयगामिं धम्मं पच्चया आचयगामी धम्मो उप्पज्जति नहेतुपच्चया – वत्थुं पच्चया विचिकिच्छासहगतो उद्धच्चसहगतो मोहो. (२)

आचयगामिञ्च नेवाचयगामिनापचयगामिञ्च धम्मं पच्चया आचयगामी धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे च वत्थुञ्च पच्चया विचिकिच्छासहगतो उद्धच्चसहगतो मोहो. (१)

नआरम्मणपच्चयो

२७. आचयगामिं धम्मं पच्चया नेवाचयगामिनापचयगामी धम्मो उप्पज्जति नआरम्मणपच्चया (संखित्तं. पटिच्चवारसदिसं).

नअधिपतिपच्चयो

२८. आचयगामिं धम्मं पच्चया आचयगामी धम्मो उप्पज्जति नअधिपतिपच्चया… तीणि.

अपचयगामिं धम्मं पच्चया अपचयगामी धम्मो उप्पज्जति नअधिपतिपच्चया – अपचयगामी खन्धे पच्चया अपचयगामी अधिपति. (१)

नेवाचयगामिनापचयगामिं धम्मं पच्चया नेवाचयगामिनापचयगामी धम्मो उप्पज्जति नअधिपतिपच्चया…पे… असञ्ञसत्तानं…पे… चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं. वत्थुं पच्चया नेवाचयगामिनापचयगामी खन्धा. (१)

नेवाचयगामिनापचयगामिं धम्मं पच्चया आचयगामी धम्मो उप्पज्जति नअधिपतिपच्चया – वत्थुं पच्चया आचयगामी खन्धा. (२)

नेवाचयगामिनापचयगामिं धम्मं पच्चया अपचयगामी धम्मो उप्पज्जति नअधिपतिपच्चया – वत्थुं पच्चया अपचयगामी अधिपति. (३)

नेवाचयगामिनापचयगामिं धम्मं पच्चया आचयगामी च नेवाचयगामिनापचयगामी च धम्मा उप्पज्जन्ति नअधिपतिपच्चया – वत्थुं पच्चया आचयगामी खन्धा, महाभूते पच्चया चित्तसमुट्ठानं रूपं. (४)

२९. आचयगामिञ्च नेवाचयगामिनापचयगामिञ्च धम्मं पच्चया आचयगामी धम्मो उप्पज्जति नअधिपतिपच्चया – आचयगामिं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे…. (१)

आचयगामिञ्च नेवाचयगामिनापचयगामिञ्च धम्मं पच्चया नेवाचयगामिनापचयगामी धम्मो उप्पज्जति नअधिपतिपच्चया – आचयगामी खन्धे च महाभूते च पच्चया चित्तसमुट्ठानं रूपं. (२)

आचयगामिञ्च नेवाचयगामिनापचयगामिञ्च धम्मं पच्चया आचयगामी च नेवाचयगामिनापचयगामी च धम्मा उप्पज्जन्ति नअधिपतिपच्चया – आचयगामिं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे… आचयगामी खन्धे च महाभूते च पच्चया चित्तसमुट्ठानं रूपं. (३)

अपचयगामिञ्च नेवाचयगामिनापचयगामिञ्च धम्मं पच्चया अपचयगामी धम्मो उप्पज्जति नअधिपतिपच्चया – अपचयगामी खन्धे च वत्थुञ्च पच्चया अपचयगामी अधिपति. (१)

नअनन्तरपच्चयादि

३०. नअनन्तरपच्चया… नसमनन्तरपच्चया… नअञ्ञमञ्ञपच्चया… नउपनिस्सयपच्चया… नपुरेजातपच्चया (पटिच्चवारसदिसा, सत्त पञ्हा)… नपच्छाजातपच्चया (परिपुण्णं).

नआसेवनपच्चयो

३१. आचयगामिं धम्मं पच्चया आचयगामी धम्मो उप्पज्जति नआसेवनपच्चया… तीणि.

अपचयगामिं धम्मं पच्चया नेवाचयगामिनापचयगामी धम्मो उप्पज्जति नआसेवनपच्चया – अपचयगामी खन्धे पच्चया चित्तसमुट्ठानं रूपं. (१)

नेवाचयगामिनापचयगामिं धम्मं पच्चया नेवाचयगामिनापचयगामी धम्मो उप्पज्जति नआसेवनपच्चया – असञ्ञसत्तानं…पे… चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं. वत्थुं पच्चया नेवाचयगामिनापचयगामी खन्धा. (१)

नेवाचयगामिनापचयगामिं धम्मं पच्चया आचयगामी धम्मो उप्पज्जति नआसेवनपच्चया – वत्थुं पच्चया आचयगामी खन्धा. (२)

नेवाचयगामिनापचयगामिं धम्मं पच्चया आचयगामी च नेवाचयगामिनापचयगामी च धम्मा उप्पज्जन्ति नआसेवनपच्चया – वत्थुं पच्चया आचयगामी खन्धा, महाभूते पच्चया चित्तसमुट्ठानं रूपं. (३)

आचयगामिञ्च नेवाचयगामिनापचयगामिञ्च धम्मं पच्चया आचयगामी धम्मो उप्पज्जति नआसेवनपच्चया – आचयगामिं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे…. (१)

आचयगामिञ्च नेवाचयगामिनापचयगामिञ्च धम्मं पच्चया नेवाचयगामिनापचयगामी धम्मो उप्पज्जति नआसेवनपच्चया – आचयगामी खन्धे च महाभूते च पच्चया चित्तसमुट्ठानं रूपं. (२)

आचयगामिञ्च नेवाचयगामिनापचयगामिञ्च धम्मं पच्चया आचयगामी च नेवाचयगामिनापचयगामी च धम्मा उप्पज्जन्ति नआसेवनपच्चया – आचयगामिं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे… आचयगामी खन्धे च महाभूते च पच्चया चित्तसमुट्ठानं रूपं. (३)

अपचयगामिञ्च नेवाचयगामिनापचयगामिञ्च धम्मं पच्चया नेवाचयगामिनापचयगामी धम्मो उप्पज्जति नआसेवनपच्चया – अपचयगामी खन्धे च महाभूते च पच्चया चित्तसमुट्ठानं रूपं. (१)

नकम्मपच्चयो

३२. आचयगामिं धम्मं पच्चया आचयगामी धम्मो उप्पज्जति नकम्मपच्चया – आचयगामी खन्धे पच्चया आचयगामी चेतना. (१)

अपचयगामिं धम्मं पच्चया अपचयगामी धम्मो उप्पज्जति नकम्मपच्चया – अपचयगामी खन्धे पच्चया अपचयगामी चेतना. (१)

नेवाचयगामिनापचयगामिं धम्मं पच्चया नेवाचयगामिनापचयगामी धम्मो उप्पज्जति नकम्मपच्चया – नेवाचयगामिनापचयगामी खन्धे पच्चया नेवाचयगामिनापचयगामी चेतना; बाहिरं… आहारसमुट्ठानं… उतुसमुट्ठानं…पे… वत्थुं पच्चया नेवाचयगामिनापचयगामी चेतना. (१)

नेवाचयगामिनापचयगामिं धम्मं पच्चया आचयगामी धम्मो उप्पज्जति नकम्मपच्चया – वत्थुं पच्चया आचयगामी चेतना. (२)

नेवाचयगामिनापचयगामिं धम्मं पच्चया अपचयगामी धम्मो उप्पज्जति नकम्मपच्चया – वत्थुं पच्चया अपचयगामी चेतना. (३)

आचयगामिञ्च नेवाचयगामिनापचयगामिञ्च धम्मं पच्चया आचयगामी धम्मो उप्पज्जति नकम्मपच्चया – आचयगामी खन्धे च वत्थुञ्च पच्चया आचयगामी चेतना. (१)

अपचयगामिञ्च नेवाचयगामिनापचयगामिञ्च धम्मं पच्चया अपचयगामी धम्मो उप्पज्जति नकम्मपच्चया – अपचयगामी खन्धे च वत्थुञ्च पच्चया अपचयगामी चेतना. (१)

नविपाकपच्चयादि

३३. आचयगामिं धम्मं पच्चया आचयगामी धम्मो उप्पज्जति नविपाकपच्चया (परिपुण्णं कातब्बं, पटिसन्धिक्खणे नत्थि).

नेवाचयगामिनापचयगामिं धम्मं पच्चया नेवाचयगामिनापचयगामी धम्मो उप्पज्जति नआहारपच्चया – बाहिरं… उतुसमुट्ठानं… असञ्ञसत्तानं…पे… नइन्द्रियपच्चया – बाहिरं… आहारसमुट्ठानं… उतुसमुट्ठानं… असञ्ञसत्तानं…पे… महाभूते पच्चया रूपजीवितिन्द्रियं… नझानपच्चया – पञ्चविञ्ञाणं…पे… बाहिरं… आहारसमुट्ठानं… उतुसमुट्ठानं… असञ्ञसत्तानं…पे… चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं…पे… नमग्गपच्चया – अहेतुका नेवाचयगामिनापचयगामी…पे… असञ्ञसत्तानं एकं महाभूतं…पे… चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं, वत्थुं पच्चया अहेतुका नेवाचयगामिनापचयगामी…पे… नसम्पयुत्तपच्चया… नविप्पयुत्तपच्चया (पटिच्चवारसदिसं, तीणि)… नोनत्थिपच्चया… नोविगतपच्चया.