१. विभङ्गवारो

हेतुपच्चयो

१८. आचयगामिं धम्मं पच्चया आचयगामी धम्मो उप्पज्जति हेतुपच्चया – आचयगामिं एकं खन्धं पच्चया तयो खन्धा…पे… द्वे खन्धे पच्चया द्वे खन्धा. (१)

आचयगामिं धम्मं पच्चया नेवाचयगामिनापचयगामी धम्मो उप्पज्जति हेतुपच्चया – आचयगामी खन्धे पच्चया चित्तसमुट्ठानं रूपं. (२)

आचयगामिं धम्मं पच्चया आचयगामी च नेवाचयगामिनापचयगामी च धम्मा उप्पज्जन्ति हेतुपच्चया – आचयगामिं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे…. (३)

अपचयगामिं धम्मं पच्चया अपचयगामी धम्मो… तीणि.

१९. नेवाचयगामिनापचयगामिं धम्मं पच्चया नेवाचयगामिनापचयगामी धम्मो उप्पज्जति हेतुपच्चया – नेवाचयगामिनापचयगामिं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… खन्धे पच्चया वत्थु, वत्थुं पच्चया खन्धा; एकं महाभूतं पच्चया…पे… वत्थुं पच्चया नेवाचयगामिनापचयगामी खन्धा. (१)

नेवाचयगामिनापचयगामिं धम्मं पच्चया आचयगामी धम्मो उप्पज्जति हेतुपच्चया – वत्थुं पच्चया आचयगामी खन्धा. (२)

नेवाचयगामिनापचयगामिं धम्मं पच्चया अपचयगामी धम्मो उप्पज्जति हेतुपच्चया – वत्थुं पच्चया अपचयगामी खन्धा. (३)

नेवाचयगामिनापचयगामिं धम्मं पच्चया आचयगामी च नेवाचयगामिनापचयगामी च धम्मा उप्पज्जन्ति हेतुपच्चया – वत्थुं पच्चया आचयगामी खन्धा, महाभूते पच्चया चित्तसमुट्ठानं रूपं. (४)

नेवाचयगामिनापचयगामिं धम्मं पच्चया अपचयगामी च नेवाचयगामिनापचयगामी च धम्मा उप्पज्जन्ति हेतुपच्चया – वत्थुं पच्चया अपचयगामी खन्धा, महाभूते पच्चया चित्तसमुट्ठानं रूपं. (५)

२०. आचयगामिञ्च नेवाचयगामिनापचयगामिञ्च धम्मं पच्चया आचयगामी धम्मो उप्पज्जति हेतुपच्चया – आचयगामिं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे…. (१)

आचयगामिञ्च नेवाचयगामिनापचयगामिञ्च धम्मं पच्चया नेवाचयगामिनापचयगामी धम्मो उप्पज्जति हेतुपच्चया – आचयगामी खन्धे च महाभूते च पच्चया चित्तसमुट्ठानं रूपं. (२)

आचयगामिञ्च नेवाचयगामिनापचयगामिञ्च धम्मं पच्चया आचयगामी च नेवाचयगामिनापचयगामी च धम्मा उप्पज्जन्ति हेतुपच्चया – आचयगामिं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे… आचयगामी खन्धे च महाभूते च पच्चया चित्तसमुट्ठानं रूपं. (३)

अपचयगामिञ्च नेवाचयगामिनापचयगामिञ्च धम्मं पच्चया अपचयगामी धम्मो… तीणि.

आरम्मणपच्चयो

२१. आचयगामिं धम्मं पच्चया आचयगामी धम्मो उप्पज्जति आरम्मणपच्चया – आचयगामिं एकं खन्धं पच्चया…पे…. (१)

अपचयगामिं धम्मं पच्चया अपचयगामी धम्मो… एकं.

नेवाचयगामिनापचयगामिं धम्मं पच्चया नेवाचयगामिनापचयगामी धम्मो उप्पज्जति आरम्मणपच्चया… नेवाचयगामिनापचयगामिं एकं खन्धं पच्चया तयो खन्धा…पे… द्वे खन्धे…पे… पटिसन्धिक्खणे…पे… वत्थुं पच्चया खन्धा, चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं. वत्थुं पच्चया नेवाचयगामिनापचयगामी खन्धा. (१)

नेवाचयगामिनापचयगामिं धम्मं पच्चया आचयगामी धम्मो उप्पज्जति आरम्मणपच्चया – वत्थुं पच्चया आचयगामी खन्धा. (२)

नेवाचयगामिनापचयगामिं धम्मं पच्चया अपचयगामी धम्मो उप्पज्जति आरम्मणपच्चया – वत्थुं पच्चया अपचयगामी खन्धा. (३)

आचयगामिञ्च नेवाचयगामिनापचयगामिञ्च धम्मं पच्चया आचयगामी धम्मो उप्पज्जति आरम्मणपच्चया – आचयगामिं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे…. (१)

अपचयगामिञ्च नेवाचयगामिनापचयगामिञ्च धम्मं पच्चया अपचयगामी धम्मो उप्पज्जति आरम्मणपच्चया – अपचयगामिं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे…. (१)

अधिपतिपच्चयो

२२. आचयगामिं धम्मं पच्चया आचयगामी धम्मो उप्पज्जति अधिपतिपच्चया… तीणि.

अपचयगामिं धम्मं पच्चया अपचयगामी धम्मो… तीणि.

नेवाचयगामिनापचयगामिं धम्मं पच्चया नेवाचयगामिनापचयगामी धम्मो… एकं…पे… वत्थुं पच्चया नेवाचयगामिनापचयगामी खन्धा.

नेवाचयगामिनापचयगामिं धम्मं पच्चया आचयगामी धम्मो…पे… (इधापि घटना हेतुसदिसा).

अनन्तरपच्चयादि

२३. आचयगामिं धम्मं पच्चया आचयगामी धम्मो उप्पज्जति अनन्तरपच्चया… समनन्तरपच्चया… सहजातपच्चया… तीणि.

अपचयगामिं धम्मं पच्चया अपचयगामी धम्मो… तीणि.

नेवाचयगामिनापचयगामिं धम्मं पच्चया नेवाचयगामिनापचयगामी धम्मो उप्पज्जति सहजातपच्चया – नेवाचयगामिनापचयगामिं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… असञ्ञसत्तानं एकं महाभूतं…पे… चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं. वत्थुं पच्चया…पे…. (१)

नेवाचयगामिनापचयगामिं धम्मं पच्चया आचयगामी धम्मो उप्पज्जति सहजातपच्चया (संखित्तं, सब्बे घटना कातब्बा).

अञ्ञमञ्ञपच्चयादि

२४. अपचयगामिं धम्मं पच्चया अपचयगामी धम्मो उप्पज्जति अञ्ञमञ्ञपच्चया… निस्सयपच्चया… उपनिस्सयपच्चया… पुरेजातपच्चया… आसेवनपच्चया… कम्मपच्चया… विपाकपच्चया… आहारपच्चया… इन्द्रियपच्चया… झानपच्चया… मग्गपच्चया… सम्पयुत्तपच्चया… विप्पयुत्तपच्चया… अत्थिपच्चया… नत्थिपच्चया… विगतपच्चया… अविगतपच्चया.