दुकअत्थुद्धारो

हेतुगोच्छकं

१४४१. कतमे धम्मा हेतू? तयो कुसलहेतू, तयो अकुसलहेतू, तयो अब्याकतहेतू. अलोभो कुसलहेतु, अदोसो कुसलहेतु, चतूसु भूमीसु कुसलेसु उप्पज्जन्ति. अमोहो कुसलहेतु, कामावचरकुसलतो चत्तारो ञाणविप्पयुत्ते चित्तुप्पादे ठपेत्वा, चतूसु भूमीसु कुसलेसु उप्पज्जति.

लोभो अट्ठसु लोभसहगतेसु चित्तुप्पादेसु उप्पज्जति. दोसो द्वीसु दोमनस्ससहगतेसु चित्तुप्पादेसु उप्पज्जति. मोहो सब्बाकुसलेसु उप्पज्जति.

अलोभो विपाकहेतु अदोसो विपाकहेतु, कामावचरस्स विपाकतो अहेतुके चित्तुप्पादे ठपेत्वा, चतूसु भूमीसु विपाकेसु उप्पज्जन्ति. अमोहो विपाकहेतु, कामावचरस्स विपाकतो अहेतुके चित्तुप्पादे ठपेत्वा, चत्तारो ञाणविप्पयुत्ते चित्तुप्पादे ठपेत्वा, चतूसु भूमीसु विपाकेसु उप्पज्जति.

अलोभो किरियहेतु अदोसो किरियहेतु, कामावचरकिरियतो अहेतुके चित्तुप्पादे ठपेत्वा, तीसु भूमीसु किरियेसु उप्पज्जन्ति. अमोहो किरियहेतु, कामावचरकिरियतो अहेतुके चित्तुप्पादे ठपेत्वा, चत्तारो ञाणविप्पयुत्ते चित्तुप्पादे ठपेत्वा, तीसु भूमीसु किरियेसु उप्पज्जति – इमे धम्मा हेतू.

१४४२. कतमे धम्मा न हेतू? ठपेत्वा हेतू, चतूसु भूमीसु कुसलं, अकुसलं, चतूसु भूमीसु विपाको, तीसु भूमीसु किरियाब्याकतं, रूपञ्च, निब्बानञ्च – इमे धम्मा न हेतू.

१४४३. कतमे धम्मा सहेतुका? विचिकिच्छासहगतं उद्धच्चसहगतं मोहं ठपेत्वा अवसेसं अकुसलं, चतूसु भूमीसु कुसलं, कामावचरस्स विपाकतो अहेतुके चित्तुप्पादे ठपेत्वा चतूसु भूमीसु विपाको, कामावचरकिरियतो अहेतुके चित्तुप्पादे ठपेत्वा तीसु भूमीसु किरियाब्याकतं – इमे धम्मा सहेतुका.

१४४४. कतमे धम्मा अहेतुका? विचिकिच्छासहगतो मोहो, उद्धच्चसहगतो मोहो, द्वेपञ्चविञ्ञाणानि, तिस्सो च मनोधातुयो, पञ्च च अहेतुकमनोविञ्ञाणधातुयो, रूपञ्च, निब्बानञ्च – इमे धम्मा अहेतुका.

१४४५. कतमे धम्मा हेतुसम्पयुत्ता? विचिकिच्छासहगतं उद्धच्चसहगतं मोहं ठपेत्वा अवसेसं अकुसलं, चतूसु भूमीसु कुसलं, कामावचरस्स विपाकतो अहेतुके चित्तुप्पादे ठपेत्वा चतूसु भूमीसु विपाको, कामावचरकिरियतो अहेतुके चित्तुप्पादे ठपेत्वा तीसु भूमीसु किरियाब्याकतं – इमे धम्मा हेतुसम्पयुत्ता.

१४४६. कतमे धम्मा हेतुविप्पयुत्ता? विचिकिच्छासहगतो मोहो, उद्धच्चसहगतो मोहो, द्वेपञ्चविञ्ञाणानि तिस्सो च मनोधातुयो पञ्च च अहेतुकमनोविञ्ञाणधातुयो, रूपञ्च, निब्बानञ्च – इमे धम्मा हेतुविप्पयुत्ता.

१४४७. कतमे धम्मा हेतू चेव सहेतुका च? यत्थ द्वे तयो हेतू एकतो उप्पज्जन्ति – इमे धम्मा हेतू चेव सहेतुका च.

१४४८. कतमे धम्मा सहेतुका चेव न च हेतू? चतूसु भूमीसु कुसलं, अकुसलं, कामावचरस्स विपाकतो अहेतुके चित्तुप्पादे ठपेत्वा चतूसु भूमीसु विपाको, कामावचरकिरियतो अहेतुके चित्तुप्पादे ठपेत्वा तीसु भूमीसु किरियाब्याकतं, एत्थुप्पन्ने हेतू ठपेत्वा – इमे धम्मा सहेतुका चेव न च हेतू. अहेतुका धम्मा न वत्तब्बा – हेतू चेव सहेतुका चातिपि, सहेतुका चेव न च हेतूतिपि.

१४४९. कतमे धम्मा हेतू चेव हेतुसम्पयुत्ता च? यत्थ द्वे तयो हेतू एकतो उप्पज्जन्ति – इमे धम्मा हेतू चेव हेतुसम्पयुत्ता च.

१४५०. कतमे धम्मा हेतुसम्पयुत्ता चेव न च हेतू? चतूसु भूमीसु कुसलं, अकुसलं, कामावचरस्स विपाकतो अहेतुके चित्तुप्पादे ठपेत्वा चतूसु भूमीसु विपाको, कामावचरकिरियतो अहेतुके चित्तुप्पादे ठपेत्वा तीसु भूमीसु किरियाब्याकतं, एत्थुप्पन्ने हेतू ठपेत्वा – इमे धम्मा हेतुसम्पयुत्ता चेव न च हेतू. हेतुविप्पयुत्ता धम्मा न वत्तब्बा – हेतू चेव हेतुसम्पयुत्ता चातिपि, हेतुसम्पयुत्ता चेव न च हेतूतिपि.

१४५१. कतमे धम्मा न हेतू सहेतुका? चतूसु भूमीसु कुसलं, अकुसलं, कामावचरस्स विपाकतो अहेतुके चित्तुप्पादे ठपेत्वा चतूसु भूमीसु विपाको, कामावचरकिरियतो अहेतुके चित्तुप्पादे ठपेत्वा तीसु भूमीसु किरियाब्याकतं, एत्थुप्पन्ने हेतू ठपेत्वा – इमे धम्मा न हेतू सहेतुका.

१४५२. कतमे धम्मा न हेतू अहेतुका? द्वेपञ्चविञ्ञाणानि, तिस्सो च मनोधातुयो, पञ्च च अहेतुकमनोविञ्ञाणधातुयो, रूपञ्च, निब्बानञ्च – इमे धम्मा न हेतू अहेतुका. हेतू धम्मा न वत्तब्बा – न हेतू सहेतुकातिपि, न हेतू अहेतुकातिपि.

चूळन्तरदुकं

१४५३. कतमे धम्मा सप्पच्चया? चतूसु भूमीसु कुसलं, अकुसलं, चतूसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा सप्पच्चया.

१४५४. कतमे धम्मा अप्पच्चया? निब्बानं – इमे धम्मा अप्पच्चया.

१४५५. कतमे धम्मा सङ्खता? चतूसु भूमीसु कुसलं, अकुसलं, चतूसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा सङ्खता.

१४५६. कतमे धम्मा असङ्खता? निब्बानं – इमे धम्मा असङ्खता.

१४५७. कतमे धम्मा सनिदस्सना? रूपायतनं – इमे धम्मा सनिदस्सना.

१४५८. कतमे धम्मा अनिदस्सना? चक्खायतनं …पे… फोट्ठब्बायतनं, चतूसु भूमीसु कुसलं, अकुसलं, चतूसु भूमीसु विपाको, तीसु भूमीसु किरियाब्याकतं, यञ्च रूपं अनिदस्सनं अप्पटिघं धम्मायतनपरियापन्नं, निब्बानञ्च – इमे धम्मा अनिदस्सना.

१४५९. कतमे धम्मा सप्पटिघा? चक्खायतनं…पे… फोट्ठब्बायतनं – इमे धम्मा सप्पटिघा.

१४६०. कतमे धम्मा अप्पटिघा? चतूसु भूमीसु कुसलं, अकुसलं, चतूसु भूमीसु विपाको, तीसु भूमीसु किरियाब्याकतं, यञ्च रूपं अनिदस्सनं अप्पटिघं धम्मायतनपरियापन्नं, निब्बानञ्च – इमे धम्मा अप्पटिघा.

१४६१. कतमे धम्मा रूपिनो? चत्तारो च महाभूता, चतुन्नञ्च महाभूतानं उपादाय रूपं – इमे धम्मा रूपिनो.

१४६२. कतमे धम्मा अरूपिनो? चतूसु भूमीसु कुसलं, अकुसलं, चतूसु भूमीसु विपाको, तीसु भूमीसु किरियाब्याकतं, निब्बानञ्च – इमे धम्मा अरूपिनो.

१४६३. कतमे धम्मा लोकिया? तीसु भूमीसु कुसलं, अकुसलं, तीसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा लोकिया.

१४६४. कतमे धम्मा लोकुत्तरा? चत्तारो मग्गा अपरियापन्ना, चत्तारि च सामञ्ञफलानि, निब्बानञ्च – इमे धम्मा लोकुत्तरा. सब्बे [सब्बेव (स्या.)] धम्मा केनचि विञ्ञेय्या, केनचि न विञ्ञेय्या.

आसवगोच्छकं

१४६५. कतमे धम्मा आसवा? चत्तारो आसवा – कामासवो, भवासवो, दिट्ठासवो, अविज्जासवो. कामासवो अट्ठसु लोभसहगतेसु चित्तुप्पादेसु उप्पज्जति भवासवो चतूसु दिट्ठिगतविप्पयुत्तलोभसहगतेसु चित्तुप्पादेसु उप्पज्जति दिट्ठासवो चतूसु दिट्ठिगतसम्पयुत्तेसु चित्तुप्पादेसु उप्पज्जति. अविज्जासवो सब्बाकुसलेसु उप्पज्जति – इमे धम्मा आसवा.

१४६६. कतमे धम्मा नो आसवा? ठपेत्वा आसवे अवसेसं अकुसलं, चतूसु भूमीसु कुसलं, चतूसु भूमीसु विपाको, तीसु भूमीसु किरियाब्याकतं, रूपञ्च, निब्बानञ्च – इमे धम्मा नो आसवा.

१४६७. कतमे धम्मा सासवा? तीसु भूमीसु कुसलं, अकुसलं, तीसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा सासवा.

१४६८. कतमे धम्मा अनासवा? चत्तारो मग्गा अपरियापन्ना, चत्तारि च सामञ्ञफलानि, निब्बानञ्च – इमे धम्मा अनासवा.

१४६९. कतमे धम्मा आसवसम्पयुत्ता? द्वे दोमनस्ससहगतचित्तुप्पादा एत्थुप्पन्नं मोहं ठपेत्वा, विचिकिच्छासहगतं उद्धच्चसहगतं मोहं ठपेत्वा, अवसेसं अकुसलं – इमे धम्मा आसवसम्पयुत्ता.

१४७०. कतमे धम्मा आसवविप्पयुत्ता? द्वीसु दोमनस्ससहगतेसु चित्तुप्पादेसु उप्पन्नो मोहो, विचिकिच्छासहगतो मोहो, उद्धच्चसहगतो मोहो, चतूसु भूमीसु कुसलं, चतूसु भूमीसु विपाको, तीसु भूमीसु किरियाब्याकतं, रूपञ्च, निब्बानञ्च – इमे धम्मा आसवविप्पयुत्ता.

१४७१. कतमे धम्मा आसवा चेव सासवा च? तेव आसवा आसवा चेव सासवा च.

१४७२. कतमे धम्मा सासवा चेव नो च आसवा? ठपेत्वा आसवे, अवसेसं अकुसलं, तीसु भूमीसु कुसलं, तीसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा सासवा चेव नो च आसवा. अनासवा धम्मा न वत्तब्बा – आसवा चेव सासवा चातिपि, सासवा चेव नो च आसवातिपि.

१४७३. कतमे धम्मा आसवा चेव आसवसम्पयुत्ता च? यत्थ द्वे तयो आसवा एकतो उप्पज्जन्ति – इमे धम्मा आसवा चेव आसवसम्पयुत्ता च.

१४७४. कतमे धम्मा आसवसम्पयुत्ता चेव नो च आसवा? ठपेत्वा आसवे, अवसेसं अकुसलं – इमे धम्मा आसवसम्पयुत्ता चेव नो च आसवा. आसवविप्पयुत्ता धम्मा न वत्तब्बा – आसवा चेव आसवसम्पयुत्ता चातिपि, आसवसम्पयुत्ता चेव नो च आसवातिपि.

१४७५. कतमे धम्मा आसवविप्पयुत्ता सासवा? द्वीसु दोमनस्ससहगतेसु चित्तुप्पादेसु उप्पन्नो मोहो, विचिकिच्छासहगतो मोहो, उद्धच्चसहगतो मोहो, तीसु भूमीसु कुसलं, तीसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा आसवविप्पयुत्ता सासवा.

१४७६. कतमे धम्मा आसवविप्पयुत्ता अनासवा? चत्तारो मग्गा अपरियापन्ना, चत्तारि च सामञ्ञफलानि, निब्बानञ्च – इमे धम्मा आसवविप्पयुत्ता अनासवा. आसवसम्पयुत्ता धम्मा न वत्तब्बा – आसवविप्पयुत्ता सासवातिपि, आसवविप्पयुत्ता अनासवातिपि.

संयोजनगोच्छकं

१४७७. कतमे धम्मा संयोजना? दस संयोजनानि – कामरागसंयोजनं, पटिघसंयोजनं, मानसंयोजनं, दिट्ठिसंयोजनं, विचिकिच्छासंयोजनं, सीलब्बतपरामाससंयोजनं, भवरागसंयोजनं, इस्सासंयोजनं, मच्छरियसंयोजनं, अविज्जासंयोजनं. कामरागसंयोजनं अट्ठसु लोभसहगतेसु चित्तुप्पादेसु उप्पज्जति. पटिघसंयोजनं द्वीसु दोमनस्ससहगतेसु चित्तुप्पादेसु उप्पज्जति. मानसंयोजनं चतूसु दिट्ठिगतविप्पयुत्तलोभसहगतेसु चित्तुप्पादेसु उप्पज्जति. दिट्ठिसंयोजनं चतूसु दिट्ठिगतसम्पयुत्तेसु चित्तुप्पादेसु उप्पज्जति. विचिकिच्छासंयोजनं विचिकिच्छासहगतेसु चित्तुप्पादेसु उप्पज्जति. सीलब्बतपरामाससंयोजनं चतूसु दिट्ठिगतसम्पयुत्तेसु चित्तुप्पादेसु उप्पज्जति. भवरागसंयोजनं चतूसु दिट्ठिगतविप्पयुत्तलोभसहगतेसु चित्तुप्पादेसु उप्पज्जति. इस्सासंयोजनञ्च मच्छरियसंयोजनञ्च द्वीसु दोमनस्ससहगतेसु चित्तुप्पादेसु उप्पज्जन्ति. अविज्जासंयोजनं सब्बाकुसलेसु उप्पज्जति – इमे धम्मा संयोजना.

१४७८. कतमे धम्मा नो संयोजना. ठपेत्वा संयोजने अवसेसं अकुसलं, चतूसु भूमीसु कुसलं, चतूसु भूमीसु विपाको, तीसु भूमीसु किरियाब्याकतं, रूपञ्च, निब्बानञ्च – इमे धम्मा नो संयोजना.

१४७९. कतमे धम्मा संयोजनिया? तीसु भूमीसु कुसलं, अकुसलं, तीसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा संयोजनिया.

१४८०. कतमे धम्मा असंयोजनिया? चत्तारो मग्गा अपरियापन्ना, चत्तारि च सामञ्ञफलानि, निब्बानञ्च – इमे धम्मा असंयोजनिया.

१४८१. कतमे धम्मा संयोजनसम्पयुत्ता? उद्धच्चसहगतं मोहं ठपेत्वा अवसेसं अकुसलं – इमे धम्मा संयोजनसम्पयुत्ता.

१४८२. कतमे धम्मा संयोजनविप्पयुत्ता? उद्धच्चसहगतो मोहो, चतूसु भूमीसु कुसलं, चतूसु भूमीसु विपाको, तीसु भूमीसु किरियाब्याकतं, रूपञ्च, निब्बानञ्च – इमे धम्मा संयोजनविप्पयुत्ता.

१४८३. कतमे धम्मा संयोजना चेव संयोजनिया च? तानेव संयोजनानि संयोजना चेव संयोजनिया च.

१४८४. कतमे धम्मा संयोजनिया चेव नो च संयोजना? ठपेत्वा संयोजने अवसेसं अकुसलं, तीसु भूमीसु कुसलं, तीसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा संयोजनिया चेव नो च संयोजना. असंयोजनिया धम्मा न वत्तब्बा – संयोजना चेव संयोजनिया चातिपि, संयोजनिया चेव नो च संयोजनातिपि.

१४८५. कतमे धम्मा संयोजना चेव संयोजनसम्पयुत्ता च? यत्थ द्वे तीणि संयोजनानि एकतो उप्पज्जन्ति – इमे धम्मा संयोजना चेव संयोजनसम्पयुत्ता च.

१४८६. कतमे धम्मा संयोजनसम्पयुत्ता चेव नो च संयोजना? ठपेत्वा संयोजने, अवसेसं अकुसलं – इमे धम्मा संयोजनसम्पयुत्ता चेव नो च संयोजना. संयोजनविप्पयुत्ता धम्मा न वत्तब्बा – संयोजना चेव संयोजनसम्पयुत्ता चातिपि, संयोजनसम्पयुत्ता चेव नो च संयोजनातिपि.

१४८७. कतमे धम्मा संयोजनविप्पयुत्ता संयोजनिया? उद्धच्चसहगतो मोहो, तीसु भूमीसु कुसलं, तीसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा संयोजनविप्पयुत्ता संयोजनिया.

१४८८. कतमे धम्मा संयोजनविप्पयुत्ता असंयोजनिया? चत्तारो मग्गा अपरियापन्ना, चत्तारि च सामञ्ञफलानि, निब्बानञ्च – इमे धम्मा संयोजनविप्पयुत्ता असंयोजनिया. संयोजनसम्पयुत्ता धम्मा न वत्तब्बा – संयोजनविप्पयुत्ता संयोजनियातिपि, संयोजनविप्पयुत्ता असंयोजनियातिपि.

गन्थगोच्छकं

१४८९. कतमे धम्मा गन्था? चत्तारो गन्था – अभिज्झाकायगन्थो, ब्यापादो कायगन्थो, सीलब्बतपरामासो कायगन्थो, इदंसच्चाभिनिवेसो कायगन्थो. अभिज्झाकायगन्थो अट्ठसु लोभसहगतेसु चित्तुप्पादेसु उप्पज्जति. ब्यापादो कायगन्थो द्वीसु दोमनस्ससहगतेसु चित्तुप्पादेसु उप्पज्जति. सीलब्बतपरामासो कायगन्थो च इदंसच्चाभिनिवेसो कायगन्थो च चतूसु दिट्ठिगतसम्पयुत्तेसु चित्तुप्पादेसु उप्पज्जन्ति – इमे धम्मा गन्था.

१४९०. कतमे धम्मा नो गन्था? ठपेत्वा गन्थे, अवसेसं अकुसलं, चतूसु भूमीसु कुसलं, चतूसु भूमीसु विपाको, तीसु भूमीसु किरियाब्याकतं, रूपञ्च, निब्बानञ्च – इमे धम्मा नो गन्था.

१४९१. कतमे धम्मा गन्थनिया? तीसु भूमीसु कुसलं, अकुसलं, तीसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा गन्थनिया.

१४९२. कतमे धम्मा अगन्थनिया? चत्तारो मग्गा अपरियापन्ना, चत्तारि च सामञ्ञफलानि, निब्बानञ्च – इमे धम्मा अगन्थनिया.

१४९३. कतमे धम्मा गन्थसम्पयुत्ता? चत्तारो दिट्ठिगतसम्पयुत्तचित्तुप्पादा, चत्तारो दिट्ठिगतविप्पयुत्तलोभसहगतचित्तुप्पादा, एत्थुप्पन्नं लोभं ठपेत्वा, द्वे दोमनस्ससहगतचित्तुप्पादा, एत्थुप्पन्नं पटिघं ठपेत्वा – इमे धम्मा गन्थसम्पयुत्ता.

१४९४. कतमे धम्मा गन्थविप्पयुत्ता? चतूसु दिट्ठिगतविप्पयुत्तलोभसहगतेसु चित्तुप्पादेसु उप्पन्नो लोभो, द्वीसु दोमनस्ससहगतेसु चित्तुप्पादेसु उप्पन्नं पटिघं, विचिकिच्छासहगतो चित्तुप्पादो, उद्धच्चसहगतो चित्तुप्पादो, चतूसु भूमीसु कुसलं, चतूसु भूमीसु विपाको, तीसु भूमीसु किरियाब्याकतं, रूपञ्च, निब्बानञ्च – इमे धम्मा गन्थविप्पयुत्ता.

१४९५. कतमे धम्मा गन्था चेव गन्थनिया च? तेव गन्था गन्था चेव गन्थनिया च.

१४९६. कतमे धम्मा गन्थनिया चेव नो च गन्था? ठपेत्वा गन्थे अवसेसं अकुसलं, तीसु भूमीसु कुसलं, तीसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा गन्थनिया चेव नो च गन्था. अगन्थनिया धम्मा न वत्तब्बा – गन्था चेव गन्थनिया चातिपि, गन्थनिया चेव नो च गन्थातिपि.

१४९७. कतमे धम्मा गन्था चेव गन्थसम्पयुत्ता च? यत्थ दिट्ठि च लोभो च एकतो उप्पज्जन्ति – इमे धम्मा गन्था चेव गन्थसम्पयुत्ता च.

१४९८. कतमे धम्मा गन्थसम्पयुत्ता चेव नो च गन्था? अट्ठ लोभसहगतचित्तुप्पादा द्वे दोमनस्ससहगतचित्तुप्पादा, एत्थुप्पन्ने गन्थे ठपेत्वा – इमे धम्मा गन्थसम्पयुत्ता चेव नो च गन्था. गन्थविप्पयुत्ता धम्मा न वत्तब्बा – गन्था चेव गन्थसम्पयुत्ता चातिपि, गन्थसम्पयुत्ता चेव नो च गन्थातिपि.

१४९९. कतमे धम्मा गन्थविप्पयुत्ता गन्थनिया? चतूसु दिट्ठिगतविप्पयुत्तलोभसहगतेसु चित्तुप्पादेसु उप्पन्नो लोभो, द्वीसु दोमनस्ससहगतेसु चित्तुप्पादेसु उप्पन्नं पटिघं, विचिकिच्छासहगतो चित्तुप्पादो, उद्धच्चसहगतो चित्तुप्पादो, तीसु भूमीसु कुसलं, तीसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा गन्थविप्पयुत्ता गन्थनिया.

१५००. कतमे धम्मा गन्थविप्पयुत्ता अगन्थनिया? चत्तारो मग्गा अपरियापन्ना, चत्तारि च सामञ्ञफलानि, निब्बानञ्च – इमे धम्मा गन्थविप्पयुत्ता अगन्थनिया. गन्थसम्पयुत्ता धम्मा न वत्तब्बा – गन्थविप्पयुत्ता गन्थनियातिपि, गन्थविप्पयुत्ता अगन्थनियातिपि.

ओघगोच्छकं

१५०१. कतमे धम्मा ओघा…पे….

योगगोच्छकं

१५०२. कतमे धम्मा योगा…पे….

नीवरणगोच्छकं

१५०३. कतमे धम्मा नीवरणा? छ नीवरणा – कामच्छन्दनीवरणं, ब्यापादनीवरणं, थिनमिद्धनीवरणं, उद्धच्चकुक्कुच्चनीवरणं, विचिकिच्छानीवरणं, अविज्जानीवरणं. कामच्छन्दनीवरणं अट्ठसु लोभसहगतेसु चित्तुप्पादेसु उप्पज्जति, ब्यापादनीवरणं द्वीसु दोमनस्ससहगतेसु चित्तुप्पादेसु उप्पज्जति, थिनमिद्धनीवरणं ससङ्खारिकेसु अकुसलेसु उप्पज्जति, उद्धच्चनीवरणं उद्धच्चसहगतेसु चित्तुप्पादेसु उप्पज्जति, कुक्कुच्चनीवरणं द्वीसु दोमनस्ससहगतेसु चित्तुप्पादेसु उप्पज्जति, विचिकिच्छानीवरणं विचिकिच्छासहगतेसु चित्तुप्पादेसु उप्पज्जति, अविज्जानीवरणं सब्बाकुसलेसु उप्पज्जति – इमे धम्मा नीवरणा.

१५०४. कतमे धम्मा नो नीवरणा? ठपेत्वा नीवरणे अवसेसं अकुसलं, चतूसु भूमीसु कुसलं, चतूसु भूमीसु विपाको, तीसु भूमीसु किरियाब्याकतं, रूपञ्च, निब्बानञ्च – इमे धम्मा नो नीवरणा.

१५०५. कतमे धम्मा नीवरणिया? तीसु भूमीसु कुसलं, अकुसलं, तीसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा नीवरणिया.

१५०६. कतमे धम्मा अनीवरणिया? चत्तारो मग्गा अपरियापन्ना, चत्तारि च सामञ्ञफलानि, निब्बानञ्च – इमे धम्मा अनीवरणिया.

१५०७. कतमे धम्मा नीवरणसम्पयुत्ता? द्वादस अकुसलचित्तुप्पादा – इमे धम्मा नीवरणसम्पयुत्ता.

१५०८. कतमे धम्मा नीवरणविप्पयुत्ता? चतूसु भूमीसु कुसलं, चतूसु भूमीसु विपाको, तीसु भूमीसु किरियाब्याकतं, रूपञ्च, निब्बानञ्च – इमे धम्मा नीवरणविप्पयुत्ता.

१५०९. कतमे धम्मा नीवरणा चेव नीवरणिया च? तानेव नीवरणानि नीवरणा चेव नीवरणिया च.

१५१०. कतमे धम्मा नीवरणिया चेव नो च नीवरणा? ठपेत्वा नीवरणे, अवसेसं अकुसलं, तीसु भूमीसु कुसलं, तीसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा नीवरणिया चेव नो च नीवरणा. अनीवरणिया धम्मा न वत्तब्बा – नीवरणा चेव नीवरणिया चातिपि, नीवरणिया चेव नो च नीवरणातिपि.

१५११. कतमे धम्मा नीवरणा चेव नीवरणसम्पयुत्ता च? यत्थ द्वे तीणि नीवरणानि एकतो उप्पज्जन्ति – इमे धम्मा नीवरणा चेव नीवरणसम्पयुत्ता च.

१५१२. कतमे धम्मा नीवरणसम्पयुत्ता चेव नो च नीवरणा? ठपेत्वा नीवरणे, अवसेसं अकुसलं – इमे धम्मा नीवरणसम्पयुत्ता चेव नो च नीवरणा. नीवरणविप्पयुत्ता धम्मा न वत्तब्बा – नीवरणा चेव नीवरणसम्पयुत्ता चातिपि, नीवरणसम्पयुत्ता चेव नो च नीवरणातिपि.

१५१३. कतमे धम्मा नीवरणविप्पयुत्ता नीवरणिया? तीसु भूमीसु कुसलं, तीसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा नीवरणविप्पयुत्ता नीवरणिया.

१५१४. कतमे धम्मा नीवरणविप्पयुत्ता अनीवरणिया? चत्तारो मग्गा अपरियापन्ना, चत्तारि च सामञ्ञफलानि, निब्बानञ्च – इमे धम्मा नीवरणविप्पयुत्ता अनीवरणिया. नीवरणसम्पयुत्ता धम्मा न वत्तब्बा – नीवरणविप्पयुत्ता नीवरणियातिपि, नीवरणविप्पयुत्ता अनीवरणियातिपि.

परामासगोच्छकं

१५१५. कतमे धम्मा परामासा? दिट्ठिपरामासो चतूसु दिट्ठिगतसम्पयुत्तेसु चित्तुप्पादेसु उप्पज्जति – इमे धम्मा परामासा.

१५१६. कतमे धम्मा नो परामासा? ठपेत्वा परामासं अवसेसं अकुसलं, चतूसु भूमीसु कुसलं, चतूसु भूमीसु विपाको, तीसु भूमीसु किरियाब्याकतं, रूपञ्च, निब्बानञ्च – इमे धम्मा नो परामासा.

१५१७. कतमे धम्मा परामट्ठा? तीसु भूमीसु कुसलं, अकुसलं, तीसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा परामट्ठा.

१५१८. कतमे धम्मा अपरामट्ठा? चत्तारो मग्गा अपरियापन्ना, चत्तारि च सामञ्ञफलानि निब्बानञ्च – इमे धम्मा अपरामट्ठा.

१५१९. कतमे धम्मा परामाससम्पयुत्ता? चत्तारो दिट्ठिगतसम्पयुत्तचित्तुप्पादा, एत्थुप्पन्नं परामासं ठपेत्वा – इमे धम्मा परामाससम्पयुत्ता.

१५२०. कतमे धम्मा परामासविप्पयुत्ता? चत्तारो दिट्ठिगतविप्पयुत्तलोभसहगतचित्तुप्पादा, द्वे दोमनस्ससहगतचित्तुप्पादा, विचिकिच्छासहगतो चित्तुप्पादो, उद्धच्चसहगतो चित्तुप्पादो, चतूसु भूमीसु कुसलं, चतूसु भूमीसु विपाको, तीसु भूमीसु किरियाब्याकतं, रूपञ्च, निब्बानञ्च – इमे धम्मा परामासविप्पयुत्ता. परामासो न वत्तब्बो – परामाससम्पयुत्तोतिपि, परामासविप्पयुत्तोतिपि.

१५२१. कतमे धम्मा परामासा चेव परामट्ठा च? सो एव परामासो परामासो चेव परामट्ठो च.

१५२२. कतमे धम्मा परामट्ठा चेव नो च परामासा? ठपेत्वा परामासं अवसेसं अकुसलं, तीसु भूमीसु कुसलं, तीसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा परामट्ठा चेव नो च परामासा. अपरामट्ठा धम्मा न वत्तब्बा – परामासा चेव परामट्ठा चातिपि, परामट्ठा चेव नो च परामासातिपि.

१५२३. कतमे धम्मा परामासविप्पयुत्ता परामट्ठा? चत्तारो दिट्ठिगतविप्पयुत्तलोभसहगतचित्तुप्पादा, द्वे दोमनस्ससहगतचित्तुप्पादा, विचिकिच्छासहगतो चित्तुप्पादो, उद्धच्चसहगतो चित्तुप्पादो, तीसु भूमीसु कुसलं, तीसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा परामासविप्पयुत्ता परामट्ठा.

१५२४. कतमे धम्मा परामासविप्पयुत्ता अपरामट्ठा? चत्तारो मग्गा अपरियापन्ना, चत्तारि च सामञ्ञफलानि, निब्बानञ्च – इमे धम्मा परामासविप्पयुत्ता अपरामट्ठा. परामासा च परामाससम्पयुत्ता च धम्मा न वत्तब्बा – परामासविप्पयुत्ता परामट्ठातिपि, परामासविप्पयुत्ता अपरामट्ठातिपि.

महन्तरदुकं

१५२५. कतमे धम्मा सारम्मणा? चतूसु भूमीसु कुसलं, अकुसलं, चतूसु भूमीसु विपाको, तीसु भूमीसु किरियाब्याकतं – इमे धम्मा सारम्मणा.

१५२६. कतमे धम्मा अनारम्मणा? रूपञ्च, निब्बानञ्च – इमे धम्मा अनारम्मणा.

१५२७. कतमे धम्मा चित्ता? चक्खुविञ्ञाणं, सोतविञ्ञाणं, घानविञ्ञाणं, जिव्हाविञ्ञाणं, कायविञ्ञाणं, मनोधातु, मनोविञ्ञाणधातु – इमे धम्मा चित्ता.

१५२८. कतमे धम्मा नो चित्ता? वेदनाक्खन्धो, सञ्ञाक्खन्धो, सङ्खारक्खन्धो, रूपञ्च, निब्बानञ्च – इमे धम्मा नो चित्ता.

१५२९. कतमे धम्मा चेतसिका? वेदनाक्खन्धो, सञ्ञाक्खन्धो, सङ्खारक्खन्धो – इमे धम्मा चेतसिका.

१५३०. कतमे धम्मा अचेतसिका? चित्तञ्च, रूपञ्च, निब्बानञ्च – इमे धम्मा अचेतसिका.

१५३१. कतमे धम्मा चित्तसम्पयुत्ता? वेदनाक्खन्धो, सञ्ञाक्खन्धो, सङ्खारक्खन्धो – इमे धम्मा चित्तसम्पयुत्ता.

१५३२. कतमे धम्मा चित्तविप्पयुत्ता? रूपञ्च, निब्बानञ्च – इमे धम्मा चित्तविप्पयुत्ता. चित्तं न वत्तब्बं – चित्तेन सम्पयुत्तन्तिपि, चित्तेन विप्पयुत्तन्तिपि.

१५३३. कतमे धम्मा चित्तसंसट्ठा? वेदनाक्खन्धो, सञ्ञाक्खन्धो, सङ्खारक्खन्धो – इमे धम्मा चित्तसंसट्ठा.

१५३४. कतमे धम्मा चित्तविसंसट्ठा? रूपञ्च, निब्बानञ्च – इमे धम्मा चित्तविसंसट्ठा. चित्तं न वत्तब्बं – चित्तेन संसट्ठन्तिपि, चित्तेन विसंसट्ठन्तिपि.

१५३५. कतमे धम्मा चित्तसमुट्ठाना? वेदनाक्खन्धो, सञ्ञाक्खन्धो, सङ्खारक्खन्धो, कायविञ्ञत्ति, वचीविञ्ञत्ति, यं वा पनञ्ञम्पि अत्थि रूपं चित्तजं चित्तहेतुकं चित्तसमुट्ठानं – रूपायतनं सद्दायतनं गन्धायतनं रसायतनं फोट्ठब्बायतनं आकासधातु आपोधातु रूपस्स लहुता रूपस्स मुदुता रूपस्स कम्मञ्ञता रूपस्स उपचयो रूपस्स सन्तति कबळीकारो आहारो – इमे धम्मा चित्तसमुट्ठाना.

१५३६. कतमे धम्मा नो चित्तसमुट्ठाना? चित्तञ्च, अवसेसञ्च रूपं, निब्बानञ्च – इमे धम्मा नो चित्तसमुट्ठाना.

१५३७. कतमे धम्मा चित्तसहभुनो? वेदनाक्खन्धो, सञ्ञाक्खन्धो, सङ्खारक्खन्धो, कायविञ्ञत्ति, वचीविञ्ञत्ति – इमे धम्मा चित्तसहभुनो.

१५३८. कतमे धम्मा नो चित्तसहभुनो? चित्तञ्च, अवसेसञ्च रूपं, निब्बानञ्च – इमे धम्मा नो चित्तसहभुनो.

१५३९. कतमे धम्मा चित्तानुपरिवत्तिनो? वेदनाक्खन्धो, सञ्ञाक्खन्धो, सङ्खारक्खन्धो, कायविञ्ञत्ति, वचीविञ्ञत्ति – इमे धम्मा चित्तानुपरिवत्तिनो.

१५४०. कतमे धम्मा नो चित्तानुपरिवत्तिनो? चित्तञ्च, अवसेसञ्च रूपं, निब्बानञ्च – इमे धम्मा नो चित्तानुपरिवत्तिनो.

१५४१. कतमे धम्मा चित्तसंसट्ठसमुट्ठाना? वेदनाक्खन्धो, सञ्ञाक्खन्धो, सङ्खारक्खन्धो – इमे धम्मा चित्तसंसट्ठसमुट्ठाना.

१५४२. कतमे धम्मा नो चित्तसंसट्ठसमुट्ठाना? चित्तञ्च, रूपञ्च, निब्बानञ्च – इमे धम्मा नो चित्तसंसट्ठसमुट्ठाना.

१५४३. कतमे धम्मा चित्तसंसट्ठसमुट्ठानसहभुनो? वेदनाक्खन्धो, सञ्ञाक्खन्धो, सङ्खारक्खन्धो – इमे धम्मा चित्तसंसट्ठसमुट्ठानसहभुनो.

१५४४. कतमे धम्मा नो चित्तसंसट्ठसमुट्ठानसहभुनो? चित्तञ्च, रूपञ्च, निब्बानञ्च – इमे धम्मा नो चित्तसंसट्ठसमुट्ठानसहभुनो.

१५४५. कतमे धम्मा चित्तसंसट्ठसमुट्ठानानुपरिवत्तिनो? वेदनाक्खन्धो, सञ्ञाक्खन्धो, सङ्खारक्खन्धो – इमे धम्मा चित्तसंसट्ठसमुट्ठानानुपरिवत्तिनो.

१५४६. कतमे धम्मा नो चित्तसंसट्ठसमुट्ठानानुपरिवत्तिनो? चित्तञ्च, रूपञ्च, निब्बानञ्च – इमे धम्मा नो चित्तसंसट्ठसमुट्ठानानुपरिवत्तिनो.

१५४७. कतमे धम्मा अज्झत्तिका? चक्खायतनं…पे… मनायतनं – इमे धम्मा अज्झत्तिका.

१५४८. कतमे धम्मा बाहिरा? रूपायतनं…पे… धम्मायतनं – इमे धम्मा बाहिरा.

१५४९. कतमे धम्मा उपादा? चक्खायतनं…पे… कबळीकारो आहारो – इमे धम्मा उपादा.

१५५०. कतमे धम्मा नो उपादा? चतूसु भूमीसु कुसलं, अकुसलं, चतूसु भूमीसु विपाको, तीसु भूमीसु किरियाब्याकतं, चत्तारो च महाभूता, निब्बानञ्च – इमे धम्मा नो उपादा.

१५५१. कतमे धम्मा उपादिण्णा? तीसु भूमीसु विपाको, यञ्च रूपं कम्मस्स कतत्ता – इमे धम्मा उपादिण्णा.

१५५२. कतमे धम्मा अनुपादिण्णा? तीसु भूमीसु कुसलं, अकुसलं, तीसु भूमीसु किरियाब्याकतं, यञ्च रूपं न कम्मस्स कतत्ता, चत्तारो मग्गा अपरियापन्ना, चत्तारि च सामञ्ञफलानि, निब्बानञ्च – इमे धम्मा अनुपादिण्णा.

उपादानगोच्छकं

१५५३. कतमे धम्मा उपादाना? चत्तारि उपादानानि – कामुपादानं, दिट्ठुपादानं, सीलब्बतुपादानं, अत्तवादुपादानं. कामुपादानं अट्ठसु लोभसहगतेसु चित्तुप्पादेसु उप्पज्जति. दिट्ठुपादानञ्च सीलब्बतुपादानञ्च अत्तवादुपादानञ्च चतूसु दिट्ठिगतसम्पयुत्तेसु चित्तुप्पादेसु उप्पज्जन्ति – इमे धम्मा उपादाना.

१५५४. कतमे धम्मा नो उपादाना? ठपेत्वा उपादाने अवसेसं अकुसलं, चतूसु भूमीसु कुसलं, चतूसु भूमीसु विपाको, तीसु भूमीसु किरियाब्याकतं, रूपञ्च, निब्बानञ्च – इमे धम्मा नो उपादाना.

१५५५. कतमे धम्मा उपादानिया? तीसु भूमीसु कुसलं, अकुसलं, तीसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा उपादानिया.

१५५६. कतमे धम्मा अनुपादानिया? चत्तारो मग्गा अपरियापन्ना, चत्तारि च सामञ्ञफलानि, निब्बानञ्च – इमे धम्मा अनुपादानिया.

१५५७. कतमे धम्मा उपादानसम्पयुत्ता? चत्तारो दिट्ठिगतसम्पयुत्तलोभसहगतचित्तुप्पादा, चत्तारो दिट्ठिगतविप्पयुत्तलोभसहगतचित्तुप्पादा, एत्थुप्पन्नं लोभं ठपेत्वा – इमे धम्मा उपादानसम्पयुत्ता.

१५५८. कतमे धम्मा उपादानविप्पयुत्ता? चतूसु दिट्ठिगतविप्पयुत्तलोभसहगतेसु चित्तुप्पादेसु उप्पन्नो लोभो, द्वे दोमनस्ससहगतचित्तुप्पादा, विचिकिच्छासहगतो चित्तुप्पादो, उद्धच्चसहगतो चित्तुप्पादो, चतूसु भूमीसु कुसलं, चतूसु भूमीसु विपाको, तीसु भूमीसु किरियाब्याकतं, रूपञ्च, निब्बानञ्च – इमे धम्मा उपादानविप्पयुत्ता.

१५५९. कतमे धम्मा उपादाना चेव उपादानिया च? तानेव उपादानानि उपादाना चेव उपादानिया च.

१५६०. कतमे धम्मा उपादानिया चेव नो च उपादाना? ठपेत्वा उपादाने अवसेसं अकुसलं, तीसु भूमीसु कुसलं, तीसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा उपादानिया चेव नो च उपादाना. अनुपादानिया धम्मा न वत्तब्बा – उपादाना चेव उपादानिया चातिपि, उपादानिया चेव नो च उपादानातिपि.

१५६१. कतमे धम्मा उपादाना चेव उपादानसम्पयुत्ता च? यत्थ दिट्ठि च लोभो च एकतो उप्पज्जन्ति – इमे धम्मा उपादाना चेव उपादानसम्पयुत्ता च.

१५६२. कतमे धम्मा उपादानसम्पयुत्ता चेव नो च उपादाना? अट्ठ लोभसहगतचित्तुप्पादा, एत्थुप्पन्ने उपादाने ठपेत्वा – इमे धम्मा उपादानसम्पयुत्ता चेव नो च उपादाना. उपादानविप्पयुत्ता धम्मा न वत्तब्बा – उपादाना चेव उपादानसम्पयुत्ता चातिपि, उपादानसम्पयुत्ता चेव नो च उपादानातिपि.

१५६३. कतमे धम्मा उपादानविप्पयुत्ता उपादानिया? चतूसु दिट्ठिगतविप्पयुत्तलोभसहगतेसु चित्तुप्पादेसु उप्पन्नो लोभो, द्वे दोमनस्ससहगतचित्तुप्पादा, विचिकिच्छासहगतो चित्तुप्पादो, उद्धच्चसहगतो चित्तुप्पादो, तीसु भूमीसु कुसलं, तीसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा उपादानविप्पयुत्ता उपादानिया.

१५६४. कतमे धम्मा उपादानविप्पयुत्ता अनुपादानिया? चत्तारो मग्गा अपरियापन्ना, चत्तारि च सामञ्ञफलानि, निब्बानञ्च – इमे धम्मा उपादानविप्पयुत्ता अनुपादानिया. उपादानसम्पयुत्ता धम्मा न वत्तब्बा – उपादानविप्पयुत्ता उपादानियातिपि, उपादानविप्पयुत्ता अनुपादानियातिपि.

किलेसगोच्छकं

१५६५. कतमे धम्मा किलेसा? दस किलेसवत्थूनि – लोभो, दोसो, मोहो, मानो, दिट्ठि, विचिकिच्छा, थिनं, उद्धच्चं, अहिरिकं, अनोत्तप्पं. लोभो अट्ठसु लोभसहगतेसु चित्तुप्पादेसु उप्पज्जति. दोसो द्वीसु दोमनस्ससहगतेसु चित्तुप्पादेसु उप्पज्जति. मोहो सब्बाकुसलेसु उप्पज्जति. मानो चतूसु दिट्ठिगतविप्पयुत्तलोभसहगतेसु चित्तुप्पादेसु उप्पज्जति. दिट्ठि चतूसु दिट्ठिगतसम्पयुत्तेसु चित्तुप्पादेसु उप्पज्जति. विचिकिच्छा विचिकिच्छासहगतेसु चित्तुप्पादेसु उप्पज्जति. थिनं ससङ्खारिकेसु अकुसलेसु उप्पज्जति. उद्धच्चञ्च अहिरिकञ्च अनोत्तप्पञ्च सब्बाकुसलेसु उप्पज्जन्ति – इमे धम्मा किलेसा.

१५६६. कतमे धम्मा नो किलेसा? ठपेत्वा किलेसे अवसेसं अकुसलं, चतूसु भूमीसु कुसलं, चतूसु भूमीसु विपाको, तीसु भूमीसु किरियाब्याकतं, रूपञ्च, निब्बानञ्च – इमे धम्मा नो किलेसा.

१५६७. कतमे धम्मा संकिलेसिका? तीसु भूमीसु कुसलं, अकुसलं, तीसु भूमीसु विपाको, तीसु भूमीसु किरियाब्याकतं सब्बञ्च रूपं – इमे धम्मा संकिलेसिका.

१५६८. कतमे धम्मा असंकिलेसिका? चत्तारो मग्गा अपरियापन्ना, चत्तारि च सामञ्ञफलानि, निब्बानञ्च – इमे धम्मा असंकिलेसिका.

१५६९. कतमे धम्मा संकिलिट्ठा? द्वादस अकुसलचित्तुप्पादा – इमे धम्मा संकिलिट्ठा.

१५७०. कतमे धम्मा असंकिलिट्ठा? चतूसु भूमीसु कुसलं, चतूसु भूमीसु विपाको, तीसु भूमीसु किरियाब्याकतं, रूपञ्च, निब्बानञ्च – इमे धम्मा असंकिलिट्ठा.

१५७१. कतमे धम्मा किलेससम्पयुत्ता? द्वादस अकुसलचित्तुप्पादा – इमे धम्मा किलेससम्पयुत्ता.

१५७२. कतमे धम्मा किलेसविप्पयुत्ता? चतूसु भूमीसु कुसलं, चतूसु भूमीसु विपाको, तीसु भूमीसु किरियाब्याकतं, रूपञ्च, निब्बानञ्च – इमे धम्मा किलेसविप्पयुत्ता.

१५७३. कतमे धम्मा किलेसा चेव संकिलेसिका च? तेव किलेसा किलेसा चेव संकिलेसिका च.

१५७४. कतमे धम्मा संकिलेसिका चेव नो च किलेसा? ठपेत्वा किलेसे अवसेसं अकुसलं, तीसु भूमीसु कुसलं, तीसु भूमीसु विपाको, तीसु भूमीसु किरियाब्याकतं, सब्बञ्च रूपं – इमे धम्मा संकिलेसिका चेव नो च किलेसा. असंकिलेसिका धम्मा न वत्तब्बा – किलेसा चेव संकिलेसिका चातिपि, संकिलेसिका चेव नो च किलेसातिपि.