६. दुकं

२७७. हेतू धम्मा… हेतू चेव सहेतुका च धम्मा… हेतू चेव हेतुसम्पयुत्ता च धम्मा तीहि खन्धेहि एकेनायतनेन एकाय धातुया सम्पयुत्ता; एकेन खन्धेन एकेनायतनेन एकाय धातुया केहिचि सम्पयुत्ता. कतिहि विप्पयुत्ता? एकेन खन्धेन दसहायतनेहि सोळसहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

२७८. सहेतुका धम्मा… हेतुसम्पयुत्ता धम्मा…पे… सम्पयुत्ताति? नत्थि. कतिहि विप्पयुत्ता? एकेन खन्धेन दसहायतनेहि सोळसहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

२७९. सहेतुका चेव न च हेतू धम्मा… हेतुसम्पयुत्ता चेव न च हेतू धम्मा… न हेतुसहेतुका धम्मा एकेन खन्धेन एकेनायतनेन एकाय धातुया केहिचि सम्पयुत्ता. कतिहि विप्पयुत्ता? एकेन खन्धेन दसहायतनेहि सोळसहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

२८०. अप्पच्चया धम्मा… असङ्खता धम्मा… सनिदस्सना धम्मा… सप्पटिघा धम्मा… रूपिनो धम्मा…पे… सम्पयुत्ताति? नत्थि. कतिहि विप्पयुत्ता? चतूहि खन्धेहि एकेनायतनेन सत्तहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

२८१. लोकुत्तरा धम्मा…पे… सम्पयुत्ताति? नत्थि. कतिहि विप्पयुत्ता? न केहिचि खन्धेहि न केहिचि आयतनेहि छहि धातूहि विप्पयुत्ता.

२८२. आसवा धम्मा… आसवा चेव सासवा च धम्मा… आसवा चेव आसवसम्पयुत्ता च धम्मा तीहि खन्धेहि एकेनायतनेन एकाय धातुया सम्पयुत्ता; एकेन खन्धेन एकेनायतनेन एकाय धातुया केहिचि सम्पयुत्ता. कतिहि विप्पयुत्ता? एकेन खन्धेन दसहायतनेहि सोळसहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

२८३. अनासवा धम्मा… आसवविप्पयुत्ता अनासवा धम्मा…पे… सम्पयुत्ताति? नत्थि. कतिहि विप्पयुत्ता? न केहिचि खन्धेहि न केहिचि आयतनेहि छहि धातूहि विप्पयुत्ता.

२८४. आसवसम्पयुत्ता धम्मा…पे… सम्पयुत्ताति? नत्थि. कतिहि विप्पयुत्ता? एकेन खन्धेन दसहायतनेहि सोळसहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

२८५. आसवसम्पयुत्ता चेव नो च आसवा धम्मा एकेन खन्धेन एकेनायतनेन एकाय धातुया केहिचि सम्पयुत्ता. कतिहि विप्पयुत्ता? एकेन खन्धेन दसहायतनेहि सोळसहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

२८६. संयोजना धम्मा… गन्था धम्मा… ओघा धम्मा… योगा धम्मा… नीवरणा धम्मा… परामासा धम्मा… परामासा चेव परामट्ठा च धम्मा तीहि खन्धेहि एकेनायतनेन एकाय धातुया सम्पयुत्ता; एकेन खन्धेन एकेनायतनेन एकाय धातुया केहिचि सम्पयुत्ता. कतिहि विप्पयुत्ता? एकेन खन्धेन दसहायतनेहि सोळसहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

२८७. अपरामट्ठा धम्मा… परामासविप्पयुत्ता अपरामट्ठा धम्मा सम्पयुत्ताति? नत्थि. कतिहि विप्पयुत्ता? न केहिचि खन्धेहि न केहिचि आयतनेहि छहि धातूहि विप्पयुत्ता.

२८८. परामाससम्पयुत्ता धम्मा एकेन खन्धेन एकेनायतनेन एकाय धातुया केहिचि सम्पयुत्ता. कतिहि विप्पयुत्ता? एकेन खन्धेन दसहायतनेहि सोळसहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

२८९. सारम्मणा धम्मा…पे… सम्पयुत्ताति? नत्थि. कतिहि विप्पयुत्ता? एकेन खन्धेन दसहायतनेहि दसहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

२९०. अनारम्मणा धम्मा… चित्तविप्पयुत्ता धम्मा… चित्तविसंसट्ठा धम्मा… उपादा धम्मा…पे… सम्पयुत्ताति? नत्थि. कतिहि विप्पयुत्ता? चतूहि खन्धेहि एकेनायतनेन सत्तहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

२९१. चित्ता धम्मा तीहि खन्धेहि सम्पयुत्ता; एकेनायतनेन एकाय धातुया केहिचि सम्पयुत्ता. कतिहि विप्पयुत्ता? एकेन खन्धेन दसहायतनेहि दसहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

२९२. चेतसिका धम्मा… चित्तसम्पयुत्ता धम्मा… चित्तसंसट्ठा धम्मा… चित्तसंसट्ठसमुट्ठाना धम्मा… चित्तसंसट्ठसमुट्ठानसहभुनो धम्मा… चित्तसंसट्ठसमुट्ठानानुपरिवत्तिनो धम्मा एकेन खन्धेन एकेनायतनेन सत्तहि धातूहि सम्पयुत्ता. कतिहि विप्पयुत्ता? एकेन खन्धेन दसहायतनेहि दसहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

२९३. अनुपादिन्ना धम्मा…पे… सम्पयुत्ताति? नत्थि. कतिहि विप्पयुत्ता? न केहिचि खन्धेहि न केहिचि आयतनेहि पञ्चहि धातूहि विप्पयुत्ता.

२९४. उपादाना धम्मा… किलेसा धम्मा… किलेसा चेव संकिलेसिका च धम्मा… किलेसा चेव संकिलिट्ठा च धम्मा… किलेसा चेव किलेससम्पयुत्ता च धम्मा तीहि खन्धेहि एकेनायतनेन एकाय धातुया सम्पयुत्ता; एकेन खन्धेन एकेनायतनेन एकाय धातुया केहिचि सम्पयुत्ता. कतिहि विप्पयुत्ता? एकेन खन्धेन दसहायतनेहि सोळसहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

२९५. असंकिलेसिका धम्मा… किलेसविप्पयुत्ता असंकिलेसिका धम्मा…पे… सम्पयुत्ताति? नत्थि. कतिहि विप्पयुत्ता? न केहिचि खन्धेहि न केहिचि आयतनेहि छहि धातूहि विप्पयुत्ता.

२९६. संकिलिट्ठा धम्मा… किलेससम्पयुत्ता धम्मा…पे… सम्पयुत्ताति? नत्थि. कतिहि विप्पयुत्ता? एकेन खन्धेन दसहायतनेहि सोळसहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

२९७. संकिलिट्ठा चेव नो च किलेसा धम्मा… किलेससम्पयुत्ता चेव नो च किलेसा धम्मा एकेन खन्धेन एकेनायतनेन एकाय धातुया केहिचि सम्पयुत्ता. कतिहि विप्पयुत्ता? एकेन खन्धेन दसहायतनेहि सोळसहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

२९८. दस्सनेन पहातब्बा धम्मा… भावनाय पहातब्बा धम्मा… दस्सनेन पहातब्बहेतुका धम्मा… भावनाय पहातब्बहेतुका धम्मा… सम्पयुत्ताति? नत्थि. कतिहि विप्पयुत्ता? एकेन खन्धेन दसहायतनेहि सोळसहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

२९९. सवितक्का धम्मा… सविचारा धम्मा एकेन खन्धेन एकेनायतनेन एकाय धातुया केहिचि सम्पयुत्ता. कतिहि विप्पयुत्ता? एकेन खन्धेन दसहायतनेहि पन्नरसहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

३००. अवितक्का धम्मा… अविचारा धम्मा…पे… सम्पयुत्ताति? नत्थि. कतिहि विप्पयुत्ता? न केहिचि खन्धेहि न केहिचि आयतनेहि एकाय धातुया विप्पयुत्ता.

३०१. सप्पीतिका धम्मा… पीतिसहगता धम्मा एकेन खन्धेन एकेनायतनेन एकाय धातुया केहिचि सम्पयुत्ता. कतिहि विप्पयुत्ता? एकेन खन्धेन दसहायतनेहि सोळसहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

३०२. सुखसहगता धम्मा एकेन खन्धेन सम्पयुत्ता; एकेनायतनेन एकाय धातुया केहिचि सम्पयुत्ता. कतिहि विप्पयुत्ता? एकेन खन्धेन दसहायतनेहि पन्नरसहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

३०३. उपेक्खासहगता धम्मा एकेन खन्धेन सम्पयुत्ता; एकेनायतनेन एकाय धातुया केहिचि सम्पयुत्ता. कतिहि विप्पयुत्ता? एकेन खन्धेन दसहायतनेहि एकादसहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

३०४. न कामावचरा धम्मा… अपरियापन्ना धम्मा… अनुत्तरा धम्मा…पे… सम्पयुत्ताति? नत्थि. कतिहि विप्पयुत्ता? न केहिचि खन्धेहि न केहिचि आयतनेहि छहि धातूहि विप्पयुत्ता.

३०५. रूपावचरा धम्मा… अरूपावचरा धम्मा… निय्यानिका धम्मा… नियता धम्मा… सरणा धम्मा कतिहि खन्धेहि कतिहायतनेहि कतिहि धातूहि सम्पयुत्ताति? नत्थि. कतिहि विप्पयुत्ता? एकेन खन्धेन दसहायतनेहि सोळसहि धातूहि विप्पयुत्ता; एकेनायतनेन एकाय धातुया केहिचि विप्पयुत्ता.

धम्मायतनं धम्मधातु, दुक्खसच्चञ्च जीवितं;

सळायतनं नामरूपं, चत्तारो च महाभवा.

जाति जरा च मरणं, तिकेस्वेकूनवीसति;

गोच्छकेसु च पञ्ञास, अट्ठ चूळन्तरे पदा.

महन्तरे पन्नरस, अट्ठारस ततो परे;

तेवीस पदसतं एतं, सम्पयोगे न लब्भतीति.

सम्पयोगविप्पयोगपदनिद्देसो छट्ठो.