१. खन्धो

२२८. रूपक्खन्धो कतिहि खन्धेहि कतिहायतनेहि कतिहि धातूहि सम्पयुत्तोति? नत्थि. कतिहि विप्पयुत्तो? चतूहि खन्धेहि एकेनायतनेन सत्तहि धातूहि विप्पयुत्तो; एकेनायतनेन एकाय धातुया केहिचि विप्पयुत्तो.

२२९. वेदनाक्खन्धो… सञ्ञाक्खन्धो… सङ्खारक्खन्धो तीहि खन्धेहि एकेनायतनेन सत्तहि धातूहि सम्पयुत्तो; एकेनायतनेन एकाय धातुया केहिचि सम्पयुत्तो. कतिहि विप्पयुत्तो? एकेन खन्धेन दसहायतनेहि दसहि धातूहि विप्पयुत्तो; एकेनायतनेन एकाय धातुया केहिचि विप्पयुत्तो.

२३०. विञ्ञाणक्खन्धो तीहि खन्धेहि सम्पयुत्तो; एकेनायतनेन एकाय धातुया केहिचि सम्पयुत्तो. कतिहि विप्पयुत्तो? एकेन खन्धेन दसहायतनेहि दसहि धातूहि विप्पयुत्तो; एकेनायतनेन एकाय धातुया केहिचि विप्पयुत्तो.