१. खन्धादि

४५६. रूपक्खन्धेन ये धम्मा विप्पयुत्ता, ते धम्मा कतिहि खन्धेहि कतिहायतनेहि कतिहि धातूहि सङ्गहिता? ते धम्मा चतूहि खन्धेहि द्वीहायतनेहि अट्ठहि धातूहि सङ्गहिता. कतिहि असङ्गहिता? एकेन खन्धेन दसहायतनेहि दसहि धातूहि असङ्गहिता.

४५७. वेदनाक्खन्धेन ये धम्मा… सञ्ञाक्खन्धेन ये धम्मा… सङ्खारक्खन्धेन ये धम्मा… विञ्ञाणक्खन्धेन ये धम्मा… मनायतनेन ये धम्मा… मनिन्द्रियेन ये धम्मा विप्पयुत्ता, ते धम्मा कतिहि खन्धेहि कतिहायतनेहि कतिहि धातूहि सङ्गहिता? ते धम्मा असङ्खतं खन्धतो ठपेत्वा एकेन खन्धेन एकादसहायतनेहि एकादसहि धातूहि सङ्गहिता. कतिहि असङ्गहिता? चतूहि खन्धेहि एकेनायतनेन सत्तहि धातूहि असङ्गहिता.

४५८. चक्खायतनेन ये धम्मा…पे… फोट्ठब्बायतनेन ये धम्मा… चक्खुधातुया ये धम्मा…पे… फोट्ठब्बधातुया ये धम्मा विप्पयुत्ता…पे… ते धम्मा चतूहि खन्धेहि द्वीहायतनेहि अट्ठहि धातूहि सङ्गहिता. कतिहि असङ्गहिता? एकेन खन्धेन दसहायतनेहि दसहि धातूहि असङ्गहिता.

४५९. चक्खुविञ्ञाणधातुया ये धम्मा… सोतविञ्ञाणधातुया ये धम्मा… घानविञ्ञाणधातुया ये धम्मा… जिव्हाविञ्ञाणधातुया ये धम्मा… कायविञ्ञाणधातुया ये धम्मा… मनोधातुया ये धम्मा… मनोविञ्ञाणधातुया ये धम्मा विप्पयुत्ता… ते धम्मा असङ्खतं खन्धतो ठपेत्वा पञ्चहि खन्धेहि द्वादसहायतनेहि सत्तरसहि धातूहि सङ्गहिता. कतिहि असङ्गहिता? न केहिचि खन्धेहि न केहिचि आयतनेहि, एकाय धातुया असङ्गहिता.