२. भूतगामवग्ग, ५. दुतिय सेनासन सिक्खापुच्छा

पुच्छा – सङ्घिके आवुसो विहारे सेय्यं सन्थरित्वा अनुद्धरित्वा अनापुच्छा पक्कमन्तस्स पाचित्तियं कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सावत्थियं भन्ते सत्तरसवग्गिये भिक्खू आरब्भ पञ्ञत्तं, सत्तरसवग्गिया भन्ते भिक्खू सङ्घिके विहारे सेय्यं सन्थरित्वा अनुद्धरित्वा अनापुच्छा पक्कमिंसु, तस्मिं भन्ते वत्थुस्मिं पञ्ञत्तं.

पुच्छा – कस्स आवुसो वचनं.

विस्सज्जना – भगवता भन्ते वचनं अरहतो सम्मासम्बुद्धस्स.

पुच्छा – केनावुसो आभतं.

विस्सज्जना – परम्पराय भन्ते आभतं.

पुच्छा – अत्थि नुखो आवुसो एत्थ कोचिपि विरद्धदोसो.

विस्सज्जना – नत्थि भन्ते.

सङ्घस्स ञापनं

सुणातु मे भन्ते सङ्घो, अहं भन्ते आयस्मन्तं विचित्तसाराभिवंसं इमेसं पन्नरसन्नं सिक्खापदानं निदानादीनि पुच्छितब्बानि अनेकानि ठानानि पुच्छिं, सो च पुट्ठो पुट्ठो विस्सज्जेति, इति हिदं भन्ते निम्मलं सुपरिसुद्धं तस्सेव भगवतो वचनं अरहतो सम्मासम्बुद्धस्स, तस्मा यथापुरे महाकस्सपादयो महाथेरवरा पोराणसंगीतिकारा ब्रह्मचरियस्स चिरट्ठितिया बहुजनहिताय बहुजनसुखाय लोनुकम्पाय अत्थाय हिताय सुखाय देवमनुस्सानं धम्मविनयं संगायिंसुचेव अनुसंगायिंसुच, एवमेव मयम्पि दानि छट्ठसंगीतिमहाधम्मसभा परियापन्ना यथानुप्पट्ठानतो पट्ठाय इमानि सिक्खापदानि एकतो गणसज्झायं कत्वा संगायेय्याम.