दाठावंसो |ओ०.०००१|

नमो तस्स भगवतो अरहतो सम्मासम्बुद्धस्स

१. विसारदं वादपथाति वत्तिनं,

तिलोकपज्जोतमसय्हसाहिनं;

असेस ञेय्यावरणप्पहायिनं,

नमामि सत्थारमनन्तगोचरं.

२. |ओ०.०००२|

तिलोक नाथप्पभवं भयापहं,

विसुद्धविज्जाचरणेहि सेवितं;

पपञ्च संयोजनबन्धनच्छिदं,

नमामि धम्मं निपुणं सुदुद्दसं.

३. पसादमत्तेन’पि यत्थ पाणिनो,

फूसन्ति दुक्खक्खयमच्चुतं पदं;

तमाहुणेय्यं सुसमाहितिन्द्रियं,

नमामि सङ्घं मुनिराजसावकं.

४. विभुसयं काळकनागरन्व यं,

परक्कमो कारुणिको चमूपति;

गवेसमानो जिनसासनस्स यो,

विरूळ्हिमत्थञ्च जनस्स पत्थयं.

५. |ओ०.०००३|

सुधामयूखामल पण्डुवंसजं,

विरूळ्हसद्धं मुनिराजसासने;

पियं वदं नीतिपथानुवत्तिनिं,

सदा पजानं जनिकं’व मातरं.

६. पियं परक्कन्तिभुजस्स राजिनो,

महेसि मच्चुन्नतखुद्धिसम्पदं;

विधाय लीलावतिमिच्छितत्थदं,

असेस लङ्कातलरज्जलक्खियं.

७. कुमारमाराधितसाधुमन्तिनं,

महादयं पण्डुनरिन्द वंसजं;

विधाय सद्धं मधुरिन्दनामकं,

सुसिक्खीतं पावचने कलासु च.

८. |ओ०.०००४|

नरिन्दसुञ्ञं सुचिरं तिसीहळं,

इतिप्पतीतं अयसं अपानुदि;

चिरं पणीतेन च चिवरादिना,

सुसञ्ञते संयमिनो अतप्पयि.

९. चिरट्ठितिं पावचनस्स इच्छता,

कतञ्ञुना विक्कम बुद्दिसालिना;

सतीमता चन्दिम बन्धुकित्तिना,

सगारवं तेन’भीयाचितो अहं.

१०. सदेस भासाय कवीहि सीहळे,

कतम्पि वंसं जिनदन्तधातुया;

निरुत्तिया मागधिकाय वुद्धिया,

करोमि दीपन्तरवासिनं अपि.

११. |ओ०.०००५|

जीनो’यमिद्धे अमरव्हये पुरे,

कदाचि हुत्वान सुमेधनामको;

सवेदवेदङ्गविभागकोविदो,

महद्धने विप्पकुलम्हि माणवो.

१२. अहञ्हि जातिब्यसनेन पीळितो,

जराभिभुतो मरणेन ओत्थटो;

सिवं पदं जातिजरादिनिस्सटं,

गवेसयिस्सं’ति रहो विचिन्तिय.

१३. अनेकसङ्खं धनधञ्ञसम्पदं,

पतिट्ठपेत्वा कपणेसि दुच्चजं;

अनप्पके पेमभरानुबन्धिनो,

विहाय मित्ते च सुतेच बन्धवे.

१४. |ओ०.०००६|

पहाय कामे निखिले मनोरमे,

घराभिनिक्खम्म हिमाचलन्तिके;

महीधरं धम्मिकनाम विस्सुतं,

उपेच्च नानातरुराजिभुसितं.

१५. मनोनुकूले सुरराजनिम्मीते,

असम्मिगानं अगतिम्हि अस्समे;

निवत्तचीरो अजिनक्खिपं वहं,

जटाधरो तापस वेसमग्गही.

१६. सुसञ्ञतत्तोपरिवारि तिन्द्रियो,

फलाफलादीहि पवत्तयं तनुं;

गतो अभिञ्ग्ञासु च पारमिं वसी,

तहिं समापत्ति सुखं अविन्दि सो.

१७. |ओ०.०००७|

सुसज्जिते रम्मपुराधिवासिना,

महाजनेन’त्तमनेन अञ्जसे;

पथप्पदेसे अभियन्तमत्तनो,

अनिट्ठितेयेव सुमेध तापसो.

१८. अगाधञेय्योदधीपारदस्सिनं,

भवन्तगुं निब्बनथं विनायकं;

अनेकखीणासवलक्खसेवितं,

कदा चि दीपङ्करबुद्धमद्दस.

१९. ततो ससङ्घस्स तिलोकभत्तुनो,

परिच्चजित्वान तनुम्पि जीवितं;

पसारयित्वान जटाजिनादिकं,

विधाय सेतुं तनुमेव पल्लले.

२०. |ओ०.०००८|

अनक्कमित्वा कललं महादये,

सभिक्खुको गच्चतु पिट्ठिया इति;

अधिट्ठहित्वान निपन्नको तहिं,

अनाथ मेतं तिभवं समेक्खिय.

२१. दयाय सञ्चोदितमानसो जने,

भवण्णवा उद्धरितुं दुखद्दिते;

अकासि सम्बोधिपदस्स पत्तिया,

महाभिनीहारमुदग्गविक्कमो.

२२. |ओ०.०००९|

अथो विदित्वा वसिनो तमासयं,

अदासि सो व्याकरणं महामुनि;

ततो पुरं तम्हि तथागते गते,

सयंवसी सम्मसि पारमिगुणे.

२३. ततो च कप्पानमलीनविक्कमो,

असंखिये सो चतुरो सलक्खके;

तहिं तहिं जातिसु बोधिपाचने,

विसुद्धसम्भारगुणे अपूरयि;

अथाभिजातो तुसिते महायसो,

विसुद्धसम्बोधिपदोपलद्धिया;

उदिक्खमानो समयं दयाधनो,

चिरं विभुतिं अनुभोसि सब्बसो.

२५. |ओ०.००१०|

सहस्ससङ्खा दसचक्कवालतो,

समागतानेकसुराधिपादिहि;

उदग्गुदग्गेहि जिनत्तपत्तिया,

सगारवं सो अभिगम्म याचितो.

२६. ततो चवित्वा कपिळव्हये पुरे,

सदा सतो सक्यकुलेककेतुनो;

अहोसि सुद्धोदनभुमिभत्तुनो,

महादिमायाय महेसिया सुतो.

२७. |ओ०.००११|

विजातमत्तो’व वसुन्धराय सो,

पतिट्ठहित्वान दिसा विलोकयी;

तदा अहेसुं विवटङ्गना दिसा,

अपूजयुं तत्थ च देवमानुसा.

२८. आधारयुं आतपवारणादिकं,

अदिस्समानाव नभम्भि देवता;

पदानि सो सत्त च उत्तरामुखो,

उपेच्च निच्छारयि वाचमासभिं.

२९. यथत्थसिद्धत्तकुमारनामको,

महब्बलो योब्बनहारिविग्गहो;

उतुत्तयानुच्छविकेसु तीसु सो,

नुभोसि पासादवरेसु सम्पदं.

३०. |ओ०.००१२|

कदाचि उय्यानपथे जराहतं,

तथातुरं कालकतञ्च संयमिं;

कमेन दिस्वान विरत्तमानसो,

भवेसु सो पब्बजितुं अकामयि.

३१. सपुप्फदीपादीकरेहि रत्तियं,

पुरक्खतो सो तिदिवाधिवासिहि;

सछन्नको कन्तकवाजियानतो,

ततो महाकारुणिको’भिनिक्खमि.

३२. कमेन पत्वान अनोममापगं,

सुधोतमुत्ताफलहारिसेकते;

पतिट्ठहित्वा वरमोळिबन्धनं,

सितासिलूनं गगने समुक्खिपी.

३३. |ओ०.००१३|

पटिग्गहेत्वा तिदसानमिस्सरो,

सुवण्नचङ्गोटवरेन तं तदा;

तियोजनं नीलमणीहि चेतियं,

अकासि चूळामणिमत्तनो पुरे.

३४. ततो घटीकारसरोजयोनिना,

समाहटं धारयी चीवरादिकं;

अथो सकं वत्थयुगं नभत्थले,

पसत्थवेसग्गहणो समुक्खिपी.