१०. आघातपटिविनयसुत्तं

३०. [दी. नि. ३.३४०, ३५९] ‘‘नवयिमे, भिक्खवे, आघातपटिविनया. कतमे नव? ‘अनत्थं मे अचरि [अचरीति (स्या.), एवं ‘‘चरति, चरिस्सति’’ पदेसुपि], तं कुतेत्थ लब्भा’ति आघातं पटिविनेति; ‘अनत्थं मे चरति, तं कुतेत्थ लब्भा’ति आघातं पटिविनेति; ‘अनत्थं मे चरिस्सति, तं कुतेत्थ लब्भा’ति आघातं पटिविनेति; पियस्स मे मनापस्स अनत्थं अचरि…पे… अनत्थं चरति…पे… ‘अनत्थं चरिस्सति, तं कुतेत्थ लब्भा’ति आघातं पटिविनेति; अप्पियस्स मे अमनापस्स अत्थं अचरि…पे… अत्थं चरति…पे… ‘अत्थं चरिस्सति, तं कुतेत्थ लब्भा’ति आघातं पटिविनेति. इमे खो, भिक्खवे, नव आघातपटिविनया’’ति. दसमं.