५. समणसुत्तं

८५. ‘‘‘समणो’ति, भिक्खवे, तथागतस्सेतं अधिवचनं अरहतो सम्मासम्बुद्धस्स. ‘ब्राह्मणो’ति, भिक्खवे, तथागतस्सेतं अधिवचनं अरहतो सम्मासम्बुद्धस्स. ‘वेदगू’ति, भिक्खवे, तथागतस्सेतं अधिवचनं अरहतो सम्मासम्बुद्धस्स. ‘भिसक्को’ति, भिक्खवे, तथागतस्सेतं अधिवचनं अरहतो सम्मासम्बुद्धस्स. ‘निम्मलो’ति, भिक्खवे, तथागतस्सेतं अधिवचनं अरहतो सम्मासम्बुद्धस्स. ‘विमलो’ति, भिक्खवे, तथागतस्सेतं अधिवचनं अरहतो सम्मासम्बुद्धस्स. ‘ञाणी’ति, भिक्खवे, तथागतस्सेतं अधिवचनं अरहतो सम्मासम्बुद्धस्स. ‘विमुत्तो’ति, भिक्खवे, तथागतस्सेतं अधिवचनं अरहतो सम्मासम्बुद्धस्सा’’ति.

‘‘यं समणेन पत्तब्बं, ब्राह्मणेन वुसीमता;

यं वेदगुना पत्तब्बं, भिसक्केन अनुत्तरं.

‘‘यं निम्मलेन पत्तब्बं, विमलेन सुचीमता;

यं ञाणिना च पत्तब्बं, विमुत्तेन अनुत्तरं.

‘‘सोहं विजितसङ्गामो, मुत्तो मोचेमि बन्धना;

नागोम्हि परमदन्तो, असेखो परिनिब्बुतो’’ति. पञ्चमं;