१०. दुतियइधलोकिकसुत्तं

५०. ‘‘चतूहि, भिक्खवे, धम्मेहि समन्नागतो मातुगामो इधलोकविजयाय पटिपन्नो होति, अयंस लोको आरद्धो होति. कतमेहि चतूहि? इध, भिक्खवे, मातुगामो सुसंविहितकम्मन्तो होति, सङ्गहितपरिजनो, भत्तु मनापं चरति, सम्भतं अनुरक्खति.

‘‘कथञ्च, भिक्खवे, मातुगामो सुसंविहितकम्मन्तो होति? इध, भिक्खवे, मातुगामो ये ते भत्तु अब्भन्तरा कम्मन्ता…पे… एवं खो, भिक्खवे, मातुगामो सुसंविहितकम्मन्तो होति.

‘‘कथञ्च, भिक्खवे, मातुगामो सङ्गहितपरिजनो होति? इध, भिक्खवे, मातुगामो यो सो भत्तु अब्भन्तरो अन्तोजनो…पे… एवं खो, भिक्खवे, मातुगामो सङ्गहितपरिजनो होति.

‘‘कथञ्च, भिक्खवे, मातुगामो भत्तु मनापं चरति? इध, भिक्खवे, मातुगामो यं भत्तु अमनापसङ्खातं तं जीवितहेतुपि न अज्झाचरति. एवं खो, भिक्खवे, मातुगामो भत्तु मनापं चरति.

‘‘कथञ्च, भिक्खवे, मातुगामो सम्भतं अनुरक्खति? इध, भिक्खवे, मातुगामो यं भत्ता आहरति…पे… एवं खो, भिक्खवे, मातुगामो सम्भतं अनुरक्खति. इमेहि खो, भिक्खवे, चतूहि धम्मेहि समन्नागतो मातुगामो इधलोकविजयाय पटिपन्नो होति, अयंस लोको आरद्धो होति.

‘‘चतूहि, भिक्खवे, धम्मेहि समन्नागतो मातुगामो परलोकविजयाय पटिपन्नो होति, परलोको आरद्धो होति. कतमेहि चतूहि? इध, भिक्खवे, मातुगामो सद्धासम्पन्नो होति, सीलसम्पन्नो होति, चागसम्पन्नो होति, पञ्ञासम्पन्नो होति.

‘‘कथञ्च, भिक्खवे, मातुगामो सद्धासम्पन्नो होति? इध, भिक्खवे, मातुगामो सद्धो होति…पे… एवं खो, भिक्खवे, मातुगामो सद्धासम्पन्नो होति.

‘‘कथञ्च, भिक्खवे, मातुगामो सीलसम्पन्नो होति? इध, भिक्खवे, मातुगामो पाणातिपाता पटिविरतो होति…पे… सुरामेरयमज्जपमादट्ठाना पटिविरतो होति. एवं खो, भिक्खवे, मातुगामो सीलसम्पन्नो होति.

‘‘कथञ्च, भिक्खवे, मातुगामो चागसम्पन्नो होति? इध, भिक्खवे, मातुगामो विगतमलमच्छेरेन चेतसा अगारं अज्झावसति…पे… एवं खो, भिक्खवे, मातुगामो चागसम्पन्नो होति.

‘‘कथञ्च, भिक्खवे, मातुगामो पञ्ञासम्पन्नो होति? इध, भिक्खवे, मातुगामो पञ्ञवा होति…पे… एवं खो, भिक्खवे, मातुगामो पञ्ञासम्पन्नो होति. इमेहि खो, भिक्खवे, चतूहि धम्मेहि समन्नागतो मातुगामो परलोकविजयाय पटिपन्नो होति, परलोको आरद्धो होती’’ति.

‘‘सुसंविहितकम्मन्ता, सङ्गहितपरिज्जना;

भत्तु मनापं चरति, सम्भतं अनुरक्खति.

‘‘सद्धा सीलेन सम्पन्ना, वदञ्ञू वीतमच्छरा;

निच्चं मग्गं विसोधेति, सोत्थानं सम्परायिकं.

‘‘इच्चेते अट्ठ धम्मा च, यस्सा विज्जन्ति नारिया;

तम्पि सीलवतिं आहु, धम्मट्ठं सच्चवादिनिं.

‘‘सोळसाकारसम्पन्ना, अट्ठङ्गसुसमागता;

तादिसी सीलवती उपासिका, उपपज्जति देवलोकं मनाप’’न्ति. दसमं;

उपोसथवग्गो पञ्चमो.