५. पठमलोकधम्मसुत्तं

५. ‘‘अट्ठिमे, भिक्खवे, लोकधम्मा लोकं अनुपरिवत्तन्ति, लोको च अट्ठ लोकधम्मे अनुपरिवत्तति. कतमे अट्ठ? लाभो च, अलाभो च, यसो च, अयसो च, निन्दा च, पसंसा च, सुखञ्च, दुक्खञ्च. इमे खो, भिक्खवे, अट्ठ लोकधम्मा लोकं अनुपरिवत्तन्ति, लोको च इमे अट्ठ लोकधम्मे अनुपरिवत्तती’’ति.

‘‘लाभो अलाभो च यसायसो च,

निन्दा पसंसा च सुखं दुखञ्च;

एते अनिच्चा मनुजेसु धम्मा,

असस्सता विपरिणामधम्मा.

‘‘एते च ञत्वा सतिमा सुमेधो,

अवेक्खति विपरिणामधम्मे;

इट्ठस्स धम्मा न मथेन्ति चित्तं,

अनिट्ठतो नो पटिघातमेति.

‘‘तस्सानुरोधा अथ वा विरोधा,

विधूपिता अत्थङ्गता न सन्ति;

पदञ्च ञत्वा विरजं असोकं,

सम्मप्पजानाति भवस्स पारगू’’ति. पञ्चमं;