५. पठमविनयधरसोभनसुत्तं

७९. ‘‘सत्तहि, भिक्खवे, धम्मेहि समन्नागतो [समन्नागतो भिक्खु (सी. स्या. क.) अनन्तरसुत्तद्वेये पन इदं पाठनानत्तं नत्थि. परि. ३२७] विनयधरो सोभति. कतमेहि सत्तहि? आपत्तिं जानाति, अनापत्तिं जानाति, लहुकं आपत्तिं जानाति, गरुकं आपत्तिं जानाति, सीलवा होति…पे… समादाय सिक्खति सिक्खापदेसु, चतुन्नं झानानं आभिचेतसिकानं निकामलाभी होति अकिच्छलाभी अकसिरलाभी, आसवानं खया…पे… सच्छिकत्वा उपसम्पज्ज विहरति. इमेहि खो, भिक्खवे, सत्तहि धम्मेहि समन्नागतो विनयधरो सोभती’’ति. पञ्चमं.