९. पठमवससुत्तं

४०. ‘‘सत्तहि, भिक्खवे, धम्मेहि समन्नागतो भिक्खु चित्तं वसे [वसं (क.)] वत्तेति, नो च भिक्खु चित्तस्स वसेन वत्तति. कतमेहि सत्तहि? इध, भिक्खवे, भिक्खु समाधिकुसलो होति, समाधिस्स समापत्तिकुसलो होति, समाधिस्स ठितिकुसलो होति, समाधिस्स वुट्ठानकुसलो होति, समाधिस्स कल्याणकुसलो होति, समाधिस्स गोचरकुसलो होति, समाधिस्स अभिनीहारकुसलो होति. इमेहि खो, भिक्खवे, सत्तहि धम्मेहि समन्नागतो भिक्खु चित्तं वसे वत्तेति, नो च भिक्खु चित्तस्स वसेन वत्तती’’ति. नवमं.