७. अनवत्थितसुत्तं

१०२. ‘‘छ, भिक्खवे, आनिसंसे सम्पस्समानेन अलमेव भिक्खुना सब्बसङ्खारेसु अनोधिं करित्वा अनिच्चसञ्ञं उपट्ठापेतुं. कतमे छ? ‘सब्बसङ्खारा च मे अनवत्थिता [अनवट्ठिततो (सी. स्या. पी.)] खायिस्सन्ति, सब्बलोके च मे मनो नाभिरमिस्सति [न रमिस्सति (क.)], सब्बलोका च मे मनो वुट्ठहिस्सति, निब्बानपोणञ्च मे मानसं भविस्सति, संयोजना च मे पहानं गच्छिस्सन्ति [गच्छन्ति (स्या. पी. क.)], परमेन च सामञ्ञेन समन्नागतो भविस्सामी’ति. इमे खो, भिक्खवे, छ आनिसंसे सम्पस्समानेन अलमेव भिक्खुना सब्बसङ्खारेसु अनोधिं करित्वा अनिच्चसञ्ञं उपट्ठापेतु’’न्ति. सत्तमं.