११. तण्हासुत्तं

१०६. ‘‘तिस्सो इमा, भिक्खवे, तण्हा पहातब्बा, तयो च माना. कतमा तिस्सो तण्हा पहातब्बा? कामतण्हा, भवतण्हा, विभवतण्हा – इमा तिस्सो तण्हा पहातब्बा. कतमे तयो माना पहातब्बा? मानो, ओमानो, अतिमानो – इमे तयो माना पहातब्बा. यतो खो, भिक्खवे, भिक्खुनो इमा तिस्सो तण्हा पहीना होन्ति, इमे च तयो माना; अयं वुच्चति, भिक्खवे, भिक्खु अच्छेच्छि तण्हं, विवत्तयि संयोजनं, सम्मा मानाभिसमया अन्तमकासि दुक्खस्सा’’ति. एकादसमं.

आनिसंसवग्गो दसमो. [पञ्चमो (स्या. क.)]