१. पातुभावसुत्तं

९६. ‘‘छन्नं, भिक्खवे, पातुभावो दुल्लभो लोकस्मिं. कतमेसं छन्नं? तथागतस्स अरहतो सम्मासम्बुद्धस्स पातुभावो दुल्लभो लोकस्मिं, तथागतप्पवेदितस्स धम्मविनयस्स देसेता पुग्गलो दुल्लभो लोकस्मिं, अरियायतने पच्चाजाति दुल्लभा [पच्चाजातो दुल्लभो (स्या.)] लोकस्मिं, इन्द्रियानं अवेकल्लता दुल्लभा लोकस्मिं, अजळता अनेळमूगता दुल्लभा लोकस्मिं, कुसले धम्मे छन्दो [कुसलधम्मच्छन्दो (सी. स्या. पी.)] दुल्लभो लोकस्मिं. इमेसं खो, भिक्खवे, छन्नं पातुभावो दुल्लभो लोकस्मि’’न्ति. पठमं.