५. दारुकम्मिकसुत्तं

५९. एवं मे सुतं – एकं समयं भगवा नातिके विहरति गिञ्जकावसथे. अथ खो दारुकम्मिको गहपति येन भगवा तेनुपसङ्कमि; उपसङ्कमित्वा भगवन्तं अभिवादेत्वा एकमन्तं निसीदि. एकमन्तं निसिन्नं खो दारुकम्मिकं गहपतिं भगवा एतदवोच – ‘‘अपि नु ते, गहपति, कुले दानं दीयती’’ति? ‘‘दीयति मे, भन्ते, कुले दानं. तञ्च खो ये ते भिक्खू आरञ्ञिका पिण्डपातिका पंसुकूलिका अरहन्तो वा अरहत्तमग्गं वा समापन्ना, तथारूपेसु मे, भन्ते, भिक्खूसु दानं दीयती’’ति.

‘‘दुज्जानं खो एतं, गहपति, तया गिहिना कामभोगिना पुत्तसम्बाधसयनं अज्झावसन्तेन, कासिकचन्दनं पच्चनुभोन्तेन, मालागन्धविलेपनं धारयन्तेन, जातरूपरजतं सादियन्तेन इमे वा अरहन्तो इमे वा अरहत्तमग्गं समापन्नाति.

‘‘आरञ्ञिको चेपि, गहपति, भिक्खु होति उद्धतो उन्नळो चपलो मुखरो विकिण्णवाचो मुट्ठस्सति असम्पजानो असमाहितो विब्भन्तचित्तो पाकतिन्द्रियो. एवं सो तेनङ्गेन गारय्हो. आरञ्ञिको चेपि, गहपति, भिक्खु होति अनुद्धतो अनुन्नळो अचपलो अमुखरो अविकिण्णवाचो उपट्ठितस्सति सम्पजानो समाहितो एकग्गचित्तो संवुतिन्द्रियो. एवं सो तेनङ्गेन पासंसो.

‘‘गामन्तविहारी चेपि, गहपति, भिक्खु होति उद्धतो…पे… एवं सो तेनङ्गेन गारय्हो. गामन्तविहारी चेपि, गहपति, भिक्खु होति अनुद्धतो…पे… एवं सो तेनङ्गेन पासंसो.

‘‘पिण्डपातिको चेपि, गहपति, भिक्खु होति उद्धतो…पे… एवं सो तेनङ्गेन गारय्हो. पिण्डपातिको चेपि, गहपति, भिक्खु होति अनुद्धतो…पे… एवं सो तेनङ्गेन पासंसो.

‘‘नेमन्तनिको चेपि, गहपति, भिक्खु होति उद्धतो…पे… एवं सो तेनङ्गेन गारय्हो. नेमन्तनिको चेपि, गहपति, भिक्खु होति अनुद्धतो…पे… एवं सो तेनङ्गेन पासंसो.

‘‘पंसुकूलिको चेपि, गहपति, भिक्खु होति उद्धतो…पे… एवं सो तेनङ्गेन गारय्हो. पंसुकूलिको चेपि, गहपति, भिक्खु होति अनुद्धतो…पे… एवं सो तेनङ्गेन पासंसो.

‘‘गहपतिचीवरधरो चेपि, गहपति, भिक्खु होति उद्धतो उन्नळो चपलो मुखरो विकिण्णवाचो मुट्ठस्सति असम्पजानो असमाहितो विब्भन्तचित्तो पाकतिन्द्रियो. एवं सो तेनङ्गेन गारय्हो. गहपतिचीवरधरो चेपि, गहपति, भिक्खु होति अनुद्धतो अनुन्नळो अचपलो अमुखरो अविकिण्णवाचो उपट्ठितस्सति सम्पजानो समाहितो एकग्गचित्तो संवुतिन्द्रियो. एवं सो तेनङ्गेन पासंसो.

‘‘इङ्घ त्वं, गहपति, सङ्घे दानं [दानानि (क.)] देहि. सङ्घे ते दानं ददतो चित्तं पसीदिस्सति. सो त्वं पसन्नचित्तो कायस्स भेदा परं मरणा सुगतिं सग्गं लोकं उपपज्जिस्ससी’’ति. ‘‘एसाहं, भन्ते, अज्जतग्गे सङ्घे दानं दस्सामी’’ति. पञ्चमं.