७. असप्पुरिसदानसुत्तं

१४७. ‘‘पञ्चिमानि, भिक्खवे, असप्पुरिसदानानि. कतमानि पञ्च? असक्कच्चं देति, अचित्तीकत्वा [अचित्तिकत्वा (पी.), अचितिं कत्वा (स्या.), अचित्तिं कत्वा (क.)] देति, असहत्था देति, अपविद्धं [अपविट्टं (स्या. कं.)] देति, अनागमनदिट्ठिको देति. इमानि खो, भिक्खवे, पञ्च असप्पुरिसदानानि.

‘‘पञ्चिमानि, भिक्खवे, सप्पुरिसदानानि. कतमानि पञ्च? सक्कच्चं देति, चित्तीकत्वा देति, सहत्था देति, अनपविद्धं देति, आगमनदिट्ठिको देति. इमानि खो, भिक्खवे, पञ्च सप्पुरिसदानानी’’ति. सत्तमं.