४. दुतियवड्ढिसुत्तं

६४. ‘‘पञ्चहि, भिक्खवे, वड्ढीहि वड्ढमाना अरियसाविका अरियाय वड्ढिया वड्ढति, सारादायिनी च होति वरादायिनी च कायस्स. कतमाहि पञ्चहि? सद्धाय वड्ढति, सीलेन वड्ढति, सुतेन वड्ढति, चागेन वड्ढति, पञ्ञाय वड्ढति – इमाहि खो, भिक्खवे, पञ्चहि वड्ढीहि वड्ढमाना अरियसाविका अरियाय वड्ढिया वड्ढति, सारादायिनी च होति वरादायिनी च कायस्सा’’ति.

‘‘सद्धाय सीलेन च या पवड्ढति [याध वड्ढति (सी.)],

पञ्ञाय चागेन सुतेन चूभयं;

सा तादिसी सीलवती उपासिका,

आदीयती सारमिधेव अत्तनो’’ति. चतुत्थं;