२. अकुसलरासिसुत्तं

५२. ‘‘अकुसलरासीति, भिक्खवे, वदमानो पञ्च नीवरणे [इमे पञ्च नीवरणे (सी.)] सम्मा वदमानो वदेय्य. केवलो हायं [हयं (सी.), चायं (स्या. कं.), सायं (क.)], भिक्खवे, अकुसलरासि यदिदं पञ्च नीवरणा. कतमे पञ्च? कामच्छन्दनीवरणं, ब्यापादनीवरणं, थिनमिद्धनीवरणं, उद्धच्चकुक्कुच्चनीवरणं, विचिकिच्छानीवरणं. अकुसलरासीति, भिक्खवे, वदमानो इमे पञ्च नीवरणे सम्मा वदमानो वदेय्य. केवलो हायं, भिक्खवे, अकुसलरासि यदिदं पञ्च नीवरणा’’ति. दुतियं.