९. पुत्तसुत्तं

३९. ‘‘पञ्चिमानि, भिक्खवे, ठानानि सम्पस्सन्ता मातापितरो पुत्तं इच्छन्ति कुले जायमानं. कतमानि पञ्च? भतो वा नो भरिस्सति; किच्चं वा नो करिस्सति; कुलवंसो चिरं ठस्सति; दायज्जं पटिपज्जिस्सति; अथ वा पन पेतानं कालङ्कतानं दक्खिणं अनुप्पदस्सतीति. इमानि खो, भिक्खवे, पञ्च ठानानि सम्पस्सन्ता मातापितरो पुत्तं इच्छन्ति कुले जायमान’’न्ति.

[कथा. ४९१] ‘‘पञ्च ठानानि सम्पस्सं, पुत्तं इच्छन्ति पण्डिता;

भतो वा नो भरिस्सति, किच्चं वा नो करिस्सति.

‘‘कुलवंसो चिरं तिट्ठे, दायज्जं पटिपज्जति;

अथ वा पन पेतानं, दक्खिणं अनुप्पदस्सति.

‘‘ठानानेतानि सम्पस्सं, पुत्तं इच्छन्ति पण्डिता;

तस्मा सन्तो सप्पुरिसा, कतञ्ञू कतवेदिनो.

‘‘भरन्ति मातापितरो, पुब्बे कतमनुस्सरं;

करोन्ति नेसं किच्चानि, यथा तं पुब्बकारिनं.

‘‘ओवादकारी भतपोसी, कुलवंसं अहापयं;

सद्धो सीलेन सम्पन्नो, पुत्तो होति पसंसियो’’ति. नवमं;