५. दानानिसंससुत्तं

३५. ‘‘पञ्चिमे, भिक्खवे, दाने आनिसंसा. कतमे पञ्च? बहुनो जनस्स पियो होति मनापो; सन्तो सप्पुरिसा भजन्ति; कल्याणो कित्तिसद्दो अब्भुग्गच्छति; गिहिधम्मा अनपगतो [गिहिधम्मा अनपेतो (सी. पी.), गिहिधम्ममनुपगतो (क.)] होति; कायस्स भेदा परं मरणा सुगतिं सग्गं लोकं उपपज्जति. इमे खो, भिक्खवे, पञ्च दाने आनिसंसा’’ति.

‘‘ददमानो पियो होति, सतं धम्मं अनुक्कमं;

सन्तो नं सदा भजन्ति [सन्तो भजन्ति सप्पुरिसा (सी.)], सञ्ञता ब्रह्मचारयो.

‘‘ते तस्स धम्मं देसेन्ति, सब्बदुक्खापनूदनं;

यं सो धम्मं इधञ्ञाय, परिनिब्बाति अनासवो’’ति. पञ्चमं;