१०. वादीसुत्तं

१४०. ‘‘चत्तारोमे, भिक्खवे, वादी. कतमे चत्तारो? अत्थि, भिक्खवे, वादी अत्थतो परियादानं गच्छति, नो ब्यञ्जनतो; अत्थि, भिक्खवे, वादी ब्यञ्जनतो परियादानं गच्छति, नो अत्थतो; अत्थि, भिक्खवे, वादी अत्थतो च ब्यञ्जनतो च परियादानं गच्छति; अत्थि, भिक्खवे, वादी नेवत्थतो नो ब्यञ्जनतो परियादानं गच्छति. इमे खो, भिक्खवे, चत्तारो वादी. अट्ठानमेतं, भिक्खवे, अनवकासो यं चतूहि पटिसम्भिदाहि समन्नागतो [समन्नागतो भिक्खु (सी. स्या. कं.)] अत्थतो वा ब्यञ्जनतो वा परियादानं गच्छेय्या’’ति. दसमं.

पुग्गलवग्गो चतुत्थो.