१०. चक्कवत्तिअच्छरियसुत्तं

१३०. ‘‘चत्तारोमे, भिक्खवे, अच्छरिया अब्भुता धम्मा रञ्ञे चक्कवत्तिम्हि. कतमे चत्तारो? सचे, भिक्खवे, खत्तियपरिसा राजानं चक्कवत्तिं दस्सनाय उपसङ्कमति, दस्सनेनपि सा अत्तमना होति. तत्र चे राजा चक्कवत्ती भासति, भासितेनपि सा अत्तमना होति. अतित्ताव, भिक्खवे, खत्तियपरिसा होति, अथ राजा चक्कवत्ती तुण्ही भवति.

‘‘सचे, भिक्खवे, ब्राह्मणपरिसा राजानं चक्कवत्तिं दस्सनाय उपसङ्कमति, दस्सनेनपि सा अत्तमना होति. तत्र चे राजा चक्कवत्ती भासति, भासितेनपि सा अत्तमना होति. अतित्ताव, भिक्खवे, ब्राह्मणपरिसा होति, अथ राजा चक्कवत्ती तुण्ही भवति.

‘‘सचे, भिक्खवे, गहपतिपरिसा राजानं चक्कवत्तिं दस्सनाय उपसङ्कमति, दस्सनेनपि सा अत्तमना होति. तत्र चे राजा चक्कवत्ती भासति, भासितेनपि सा अत्तमना होति. अतित्ताव, भिक्खवे, गहपतिपरिसा होति, अथ राजा चक्कवत्ती तुण्ही भवति.

‘‘सचे, भिक्खवे, समणपरिसा राजानं चक्कवत्तिं दस्सनाय उपसङ्कमति, दस्सनेनपि सा अत्तमना होति. तत्र चे राजा चक्कवत्ती भासति, भासितेनपि सा अत्तमना होति. अतित्ताव, भिक्खवे, समणपरिसा होति, अथ राजा चक्कवत्ती तुण्ही भवति. इमे खो, भिक्खवे, चत्तारो अच्छरिया अब्भुता धम्मा रञ्ञे चक्कवत्तिम्हि.

‘‘एवमेवं खो, भिक्खवे, चत्तारो [चत्तारोमे (क.)] अच्छरिया अब्भुता धम्मा आनन्दे. कतमे चत्तारो? सचे, भिक्खवे, भिक्खुपरिसा आनन्दं दस्सनाय उपसङ्कमति, दस्सनेनपि सा अत्तमना होति. तत्र चे आनन्दो धम्मं भासति, भासितेनपि सा अत्तमना होति. अतित्ताव, भिक्खवे, भिक्खुपरिसा होति, अथ आनन्दो तुण्ही भवति.

‘‘सचे, भिक्खवे, भिक्खुनिपरिसा…पे… सचे, भिक्खवे, उपासकपरिसा…पे… सचे, भिक्खवे, उपासिकापरिसा आनन्दं दस्सनाय उपसङ्कमति, दस्सनेनपि सा अत्तमना होति. तत्र चे आनन्दो धम्मं भासति, भासितेनपि सा अत्तमना होति. अतित्ताव, भिक्खवे, उपासिकापरिसा होति, अथ आनन्दो तुण्ही भवति. इमे खो, भिक्खवे, चत्तारो अच्छरिया अब्भुता धम्मा आनन्दे’’ति. दसमं.

भयवग्गो ततियो.