७. सोभनसुत्तं

७. ‘‘चत्तारोमे, भिक्खवे, वियत्ता विनीता विसारदा बहुस्सुता धम्मधरा धम्मानुधम्मप्पटिपन्ना सङ्घं सोभेन्ति. कतमे चत्तारो? भिक्खु, भिक्खवे, वियत्तो विनीतो विसारदो बहुस्सुतो धम्मधरो धम्मानुधम्मप्पटिपन्नो सङ्घं सोभेति. भिक्खुनी, भिक्खवे, वियत्ता विनीता विसारदा बहुस्सुता धम्मधरा धम्मानुधम्मप्पटिपन्ना सङ्घं सोभेति. उपासको, भिक्खवे, वियत्तो विनीतो विसारदो बहुस्सुतो धम्मधरो धम्मानुधम्मप्पटिपन्नो सङ्घं सोभेति. उपासिका, भिक्खवे, वियत्ता विनीता विसारदा बहुस्सुता धम्मधरा धम्मानुधम्मप्पटिपन्ना सङ्घं सोभेति. इमे खो, भिक्खवे, चत्तारो वियत्ता विनीता विसारदा बहुस्सुता धम्मधरा धम्मानुधम्मप्पटिपन्ना सङ्घं सोभेन्ती’’ति.

‘‘यो होति वियत्तो [व्यत्तो (सी. पी.), ब्यत्तो (स्या. कं.)] च विसारदो च,

बहुस्सुतो धम्मधरो च होति;

धम्मस्स होति अनुधम्मचारी,

स तादिसो वुच्चति सङ्घसोभनो [संघसोभणो (क.)].

‘‘भिक्खु च सीलसम्पन्नो, भिक्खुनी च बहुस्सुता;

उपासको च यो सद्धो, या च सद्धा उपासिका;

एते खो सङ्घं सोभेन्ति, एते हि सङ्घसोभना’’ति. सत्तमं;