५. पण्डितसुत्तं

४५. ‘‘तीणिमानि, भिक्खवे, पण्डितपञ्ञत्तानि सप्पुरिसपञ्ञत्तानि. कतमानि तीणि? दानं, भिक्खवे, पण्डितपञ्ञत्तं सप्पुरिसपञ्ञत्तं. पब्बज्जा, भिक्खवे, पण्डितपञ्ञत्ता सप्पुरिसपञ्ञत्ता. मातापितूनं, भिक्खवे, उपट्ठानं पण्डितपञ्ञत्तं सप्पुरिसपञ्ञत्तं. इमानि खो, भिक्खवे, तीणि पण्डितपञ्ञत्तानि सप्पुरिसपञ्ञत्तानी’’ति.

‘‘सब्भि दानं उपञ्ञत्तं, अहिंसा संयमो दमो;

मातापितु उपट्ठानं, सन्तानं ब्रह्मचारिनं.

‘‘सतं एतानि ठानानि, यानि सेवेथ पण्डितो;

अरियो दस्सनसम्पन्नो, स लोकं भजते सिव’’न्ति. पञ्चमं;