२. पातिमोक्खट्ठपनासुत्तं

३२. ‘‘कति नु खो, भन्ते, पातिमोक्खट्ठपना’’ति? ‘‘दस खो, उपालि, पातिमोक्खट्ठपना. कतमे दस? पाराजिको तस्सं परिसायं निसिन्नो होति, पाराजिककथा विप्पकता होति, अनुपसम्पन्नो तस्सं परिसायं निसिन्नो होति, अनुपसम्पन्नकथा विप्पकता होति, सिक्खं पच्चक्खातको तस्सं परिसायं निसिन्नो होति, सिक्खं पच्चक्खातककथा विप्पकता होति, पण्डको तस्सं परिसायं निसिन्नो होति, पण्डककथा विप्पकता होति, भिक्खुनिदूसको तस्सं परिसायं निसिन्नो होति, भिक्खुनिदूसककथा विप्पकता होति – इमे खो, उपालि, दस पातिमोक्खट्ठपना’’ति. दुतियं.