чодана̄кан̣д̣ам̣

1. анувиджджакаануйого

360. анувиджджаке чодако пуччхитаббо – ‘‘йам̣ кхо твам̣, а̄вусо, имам̣ бхиккхум̣ чодеси, кимхи нам̣ чодеси, сӣлавипаттийа̄ ва̄ чодеси, а̄ча̄равипаттийа̄ ва̄ чодеси, дит̣т̣хивипаттийа̄ ва̄ чодесӣ’’ти? со че евам̣ вадеййа – ‘‘сӣлавипаттийа̄ ва̄ чодеми, а̄ча̄равипаттийа̄ ва̄ чодеми, дит̣т̣хивипаттийа̄ ва̄ чодемӣ’’ти, со евамасса вачанӣйо – ‘‘джа̄на̄си пана̄йасма̄ сӣлавипаттим̣, джа̄на̄си а̄ча̄равипаттим̣, джа̄на̄си дит̣т̣хивипатти’’нти? со че евам̣ вадеййа – ‘‘джа̄на̄ми кхо ахам̣, а̄вусо, сӣлавипаттим̣, джа̄на̄ми а̄ча̄равипаттим̣, джа̄на̄ми дит̣т̣хивипатти’’нти, со евамасса вачанӣйо – ‘‘катама̄ пана̄вусо, сӣлавипатти? катама̄ а̄ча̄равипатти? катама̄ дит̣т̣хивипаттӣ’’ти? со че евам̣ вадеййа – ‘‘чатта̄ри ча па̄ра̄джика̄ни, тераса ча сан̇гха̄дисеса̄ – айам̣ сӣлавипатти. тхуллаччайам̣, па̄читтийам̣, па̄т̣идесанӣйам̣, дуккат̣ам̣, дуббха̄ситам̣, айам̣ а̄ча̄равипатти. миччха̄дит̣т̣хи, антагга̄хика̄ дит̣т̣хи – айам̣ дит̣т̣хивипаттӣ’’ти, со евамасса вачанӣйо – ‘‘йам̣ кхо твам̣, а̄вусо, имам̣ бхиккхум̣ чодеси, дит̣т̣хена ва̄ чодеси сутена ва̄ чодеси парисан̇ка̄йа ва̄ чодесӣ’’ти? со че евам̣ вадеййа – ‘‘дит̣т̣хена ва̄ чодеми сутена ва̄ чодеми парисан̇ка̄йа ва̄ чодемӣ’’ти, со евамасса вачанӣйо – ‘‘йам̣ кхо твам̣, а̄вусо, имам̣ бхиккхум̣ дит̣т̣хена чодеси, ким̣ те дит̣т̣хам̣ кинти те дит̣т̣хам̣, када̄ те дит̣т̣хам̣, каттха те дит̣т̣хам̣ па̄ра̄джикам̣ аджджха̄паджджанто дит̣т̣хо, сан̇гха̄дисесам̣ аджджха̄паджджанто дит̣т̣хо, тхуллаччайам̣… па̄читтийам̣… па̄т̣идесанӣйам̣… дуккат̣ам̣… дуббха̄ситам̣ аджджха̄паджджанто дит̣т̣хо, каттха ча твам̣ ахоси, каттха ча̄йам̣ бхиккху ахоси, кин̃ча твам̣ кароси, ким̣ ча̄йам̣ бхиккху каротӣ’’ти? со че евам̣ вадеййа – ‘‘на кхо ахам̣, а̄вусо, имам̣ бхиккхум̣ дит̣т̣хена чодеми, апи ча сутена чодемӣ’’ти, со евамасса вачанӣйо – ‘‘йам̣ кхо твам̣, а̄вусо, имам̣ бхиккхум̣ сутена чодеси, ким̣ те сутам̣, кинти те сутам̣, када̄ те сутам̣, каттха те сутам̣, па̄ра̄джикам̣ аджджха̄панноти сутам̣, сан̇гха̄дисесам̣… тхуллаччайам̣… па̄читтийам̣… па̄т̣идесанӣйам̣… дуккат̣ам̣… дуббха̄ситам̣ аджджха̄панноти сутам̣, бхиккхусса сутам̣, бхиккхунийа̄ сутам̣, сиккхама̄на̄йа сутам̣, са̄ман̣ерасса сутам̣, са̄ман̣ерийа̄ сутам̣, упа̄сакасса сутам̣, упа̄сика̄йа сутам̣, ра̄джӯнам̣ сутам̣, ра̄джамаха̄матта̄нам̣ сутам̣, титтхийа̄нам̣ сутам̣, титтхийаса̄вака̄нам̣ сута’’нти? со че евам̣ вадеййа – ‘‘на кхо ахам̣, а̄вусо, имам̣ бхиккхум̣ сутена чодеми, апи ча парисан̇ка̄йа чодемӣ’’ти, со евамасса вачанӣйо – ‘‘йам̣ кхо твам̣, а̄вусо, имам̣ бхиккхум̣ парисан̇ка̄йа чодеси, ким̣ парисан̇каси, кинти парисан̇каси, када̄ парисан̇каси, каттха парисан̇каси, па̄ра̄джикам̣ аджджха̄панноти парисан̇каси, сан̇гха̄дисесам̣ аджджха̄панноти парисан̇каси, тхуллаччайам̣… па̄читтийам̣… па̄т̣идесанӣйам̣… дуккат̣ам̣… дуббха̄ситам̣ аджджха̄панноти парисан̇каси, бхиккхусса сутва̄ парисан̇каси, бхиккхунийа̄ сутва̄ парисан̇каси, сиккхама̄на̄йа сутва̄ парисан̇каси, са̄ман̣ерасса сутва̄ парисан̇каси, са̄ман̣ерийа̄ сутва̄ парисан̇каси, упа̄сакасса сутва̄ парисан̇каси, упа̄сика̄йа сутва̄ парисан̇каси, ра̄джӯнам̣ сутва̄ парисан̇каси, ра̄джамаха̄матта̄нам̣ сутва̄ парисан̇каси, титтхийа̄нам̣ сутва̄ парисан̇каси, титтхийаса̄вака̄нам̣ сутва̄ парисан̇касӣ’’ти?

361. дит̣т̣хам̣ дит̣т̣хена самети дит̣т̣хена сам̣сандате дит̣т̣хам̣;

дит̣т̣хам̣ пат̣ичча на упети асуддхапарисан̇кито;

со пуггало пат̣ин̃н̃а̄йа ка̄таббо тенупосатхо.

сутам̣ сутена самети сутена сам̣сандате сутам̣;

сутам̣ пат̣ичча на упети асуддхапарисан̇кито;

со пуггало пат̣ин̃н̃а̄йа ка̄таббо тенупосатхо.

мутам̣ мутена самети мутена сам̣сандате мутам̣;

мутам̣ пат̣ичча на упети асуддхапарисан̇кито;

со пуггало пат̣ин̃н̃а̄йа ка̄таббо тенупосатхо.

362. чодана̄йа ко а̄ди, ким̣ маджджхе, ким̣ парийоса̄нам̣? чодана̄йа ока̄сакаммам̣ а̄ди, кирийа̄ маджджхе, саматхо парийоса̄нам̣. чодана̄йа кати мӯла̄ни, кати ваттхӯни, кати бхӯмийо, катиха̄ка̄рехи чодети? чодана̄йа две мӯла̄ни, тӣн̣и ваттхӯни, пан̃ча бхӯмийо, двӣха̄ка̄рехи чодети. чодана̄йа катама̄ни две мӯла̄ни? самӯлика̄ ва̄ амӯлика̄ ва̄ – чодана̄йа има̄ни две мӯла̄ни. чодана̄йа катама̄ни тӣн̣и ваттхӯни? дит̣т̣хена сутена парисан̇ка̄йа – чодана̄йа има̄ни тӣн̣и ваттхӯни. чодана̄ катама̄ пан̃ча бхӯмийо? ка̄лена ваккха̄ми но ака̄лена, бхӯтена ваккха̄ми но абхӯтена, сан̣хена ваккха̄ми но пхарусена, аттхасам̣хитена ваккха̄ми но анаттхасам̣хитена, метта̄читто ваккха̄ми но досантароти – чодана̄йа има̄ пан̃ча бхӯмийо.

катамехи двӣха̄ка̄рехи чодети? ка̄йена ва̄ чодети ва̄ча̄йа ва̄ чодети – имехи двӣха̄ка̄рехи чодети.

2. чодака̄дипат̣ипатти

363. чодакена катхам̣ пат̣ипаджджитаббам̣? чудитакена катхам̣ пат̣ипаджджитаббам̣? сан̇гхена катхам̣ пат̣ипаджджитаббам̣? анувиджджакена катхам̣ пат̣ипаджджитаббам̣? чодакена катхам̣ пат̣ипаджджитаббанти? чодакена пан̃часу дхаммесу патит̣т̣ха̄йа паро чодетаббо. ка̄лена ваккха̄ми но ака̄лена, бхӯтена ваккха̄ми но абхӯтена, сан̣хена ваккха̄ми но пхарусена, аттхасам̣хитена ваккха̄ми но анаттхасам̣хитена, метта̄читто ваккха̄ми но досантароти – чодакена евам̣ пат̣ипаджджитаббам̣. чудитакена катхам̣ пат̣ипаджджитаббанти? чудитакена двӣсу дхаммесу пат̣ипаджджитаббам̣. сачче ча акуппе ча – чудитакена евам̣ пат̣ипаджджитаббам̣. сан̇гхена катхам̣ пат̣ипаджджитаббанти? сан̇гхена отин̣н̣а̄нотин̣н̣ам̣ джа̄нитаббам̣. сан̇гхена евам̣ пат̣ипаджджитаббам̣. анувиджджакена катхам̣ пат̣ипаджджитаббанти? анувиджджакена йена дхаммена йена винайена йена саттхуса̄санена там̣ адхикаран̣ам̣ вӯпасаммати татха̄ там̣ адхикаран̣ам̣ вӯпасаметаббам̣. анувиджджакена евам̣ пат̣ипаджджитаббам̣.

364. упосатхо киматтха̄йа, пава̄ран̣а̄ кисса ка̄ран̣а̄;

парива̄со киматтха̄йа, мӯла̄йапат̣икассана̄ кисса ка̄ран̣а̄;

ма̄наттам̣ киматтха̄йа, аббха̄нам̣ кисса ка̄ран̣а̄.

упосатхо са̄маггаттха̄йа, висуддхаттха̄йа пава̄ран̣а̄;

парива̄со ма̄наттаттха̄йа, мӯла̄йапат̣икассана̄ ниггахаттха̄йа;

ма̄наттам̣ аббха̄наттха̄йа, висуддхаттха̄йа аббха̄нам̣.

чханда̄ доса̄ бхайа̄ моха̄, тхере ча парибха̄сати;

ка̄йасса бхеда̄ дуппан̃н̃о, кхато упахатиндрийо;

нирайам̣ гаччхати думмедхо, на ча сиккха̄йа га̄раво.

на ча а̄мисам̣ нисса̄йа;

на ча нисса̄йа пуггалам̣;

убхо ете виваджджетва̄;

йатха̄дхаммо татха̄ каре.