1. муса̄ва̄давагго

165. сампаджа̄намуса̄ва̄дам̣ бха̄санто кати а̄паттийо а̄паджджати? сампаджа̄намуса̄ва̄дам̣ бха̄санто пан̃ча а̄паттийо а̄паджджати. па̄пиччхо иччха̄пакато асантам̣ абхӯтам̣ уттаримануссадхаммам̣ уллапати, а̄патти па̄ра̄джикасса; бхиккхум̣ амӯлакена па̄ра̄джикена дхаммена ануддхам̣сети, а̄патти сан̇гха̄дисесасса; ‘‘йо те виха̄ре васати, со бхиккху араха̄’’ти бхан̣ати, пат̣ивиджа̄нантасса а̄патти тхуллаччайасса; на пат̣ивиджа̄нантасса а̄патти дуккат̣асса; сампаджа̄намуса̄ва̄де па̄читтийам̣ – сампаджа̄намуса̄ва̄дам̣ бха̄санто има̄ пан̃ча а̄паттийо а̄паджджати.

омасанто две а̄паттийо а̄паджджати. упасампаннам̣ омасати, а̄патти па̄читтийасса; анупасампаннам̣ омасати, а̄патти дуккат̣асса.

песун̃н̃ам̣ упасам̣харанто две а̄паттийо а̄паджджати. упасампаннасса песун̃н̃ам̣ упасам̣харати, а̄патти па̄читтийасса; анупасампаннасса песун̃н̃ам̣ упасам̣харати, а̄патти дуккат̣асса.

анупасампаннам̣ падасо дхаммам̣ ва̄ченто две а̄паттийо а̄паджджати. ва̄чети, пайоге дуккат̣ам̣; паде паде а̄патти па̄читтийасса.

анупасампаннена уттаридираттатираттам̣ сахасеййам̣ каппенто две а̄паттийо а̄паджджати. нипаджджати, пайоге дуккат̣ам̣; нипанне а̄патти па̄читтийасса.

ма̄туга̄мена сахасеййам̣ каппенто две а̄паттийо а̄паджджати. нипаджджати, пайоге дуккат̣ам̣; нипанне а̄патти па̄читтийасса.

ма̄туга̄масса уттаричхаппан̃чава̄ча̄хи дхаммам̣ десенто две а̄паттийо а̄паджджати. десети, пайоге дуккат̣ам̣; паде паде а̄патти па̄читтийасса.

анупасампаннасса уттаримануссадхаммам̣ бхӯтам̣ а̄роченто две а̄паттийо а̄паджджати. а̄рочети, пайоге дуккат̣ам̣; а̄рочите а̄патти па̄читтийасса.

бхиккхусса дут̣т̣хуллам̣ а̄паттим̣ анупасампаннасса а̄роченто две а̄паттийо а̄паджджати. а̄рочети, пайоге дуккат̣ам̣; а̄рочите а̄патти па̄читтийасса.

патхавим̣ кхан̣анто две а̄паттийо а̄паджджати. кхан̣ати, пайоге дуккат̣ам̣; паха̄ре паха̄ре а̄патти па̄читтийасса.

муса̄ва̄давагго пат̣хамо.