3. паттавагго

164. атирекапаттам̣ даса̄хам̣ атикка̄менто екам̣ а̄паттим̣ а̄паджджати. ниссаггийам̣ па̄читтийам̣.

ӯнапан̃чабандханена паттена ан̃н̃ам̣ навам̣ паттам̣ чета̄пенто две а̄паттийо а̄паджджати. чета̄пети, пайоге дуккат̣ам̣; чета̄пите ниссаггийам̣ па̄читтийам̣.

бхесаджджа̄ни пат̣иггахетва̄ сатта̄хам̣ атикка̄менто екам̣ а̄паттим̣ а̄паджджати. ниссаггийам̣ па̄читтийам̣.

атирекама̄се сесе гимха̄не вассикаса̄т̣икачӣварам̣ парийесанто две а̄паттийо а̄паджджати. парийесати, пайоге дуккат̣ам̣; парийит̣т̣хе ниссаггийам̣ па̄читтийам̣.

бхиккхусса са̄мам̣ чӣварам̣ датва̄ купито анаттамано аччхинданто две а̄паттийо а̄паджджати. аччхиндати, пайоге дуккат̣ам̣; аччхинне ниссаггийам̣ па̄читтийам̣.

са̄мам̣ суттам̣ вин̃н̃а̄петва̄ тантава̄йехи чӣварам̣ ва̄йа̄пенто две а̄паттийо а̄паджджати. ва̄йа̄пети, пайоге дуккат̣ам̣; ва̄йа̄пите ниссаггийам̣ па̄читтийам̣.

пуббе аппава̄рито ан̃н̃а̄такасса гахапатикасса тантава̄йе упасан̇камитва̄ чӣваре викаппам̣ а̄паджджанто две а̄паттийо а̄паджджати. викаппам̣ а̄паджджати, пайоге дуккат̣ам̣; викаппам̣ а̄панне ниссаггийам̣ па̄читтийам̣.

аччекачӣварам̣ пат̣иггахетва̄ чӣварака̄ласамайам̣ атикка̄менто екам̣ а̄паттим̣ а̄паджджати. ниссаггийам̣ па̄читтийам̣.

тин̣н̣ам̣ чӣвара̄нам̣ ан̃н̃атарам̣ чӣварам̣ антарагхаре никкхипитва̄ атирекачха̄раттам̣ виппавасанто екам̣ а̄паттим̣ а̄паджджати. ниссаггийам̣ па̄читтийам̣.

джа̄нам̣ сан̇гхикам̣ ла̄бхам̣ парин̣атам̣ аттано парин̣а̄менто две а̄паттийо а̄паджджати. парин̣а̄мети, пайоге дуккат̣ам̣; парин̣а̄мите ниссаггийам̣ па̄читтийам̣.

паттавагго татийо.

тим̣са ниссаггийа̄ па̄читтийа̄ нит̣т̣хита̄.