8. сахадхаммикавагго

172. бхиккхӯхи сахадхаммикам̣ вуччама̄но – ‘‘на та̄ва̄хам̣, а̄вусо, етасмим̣ сиккха̄паде сиккхисса̄ми йа̄ва на ан̃н̃ам̣ бхиккхум̣ бйаттам̣ винайадхарам̣ парипуччхисса̄мӣ’’ти бхан̣анто две а̄паттийо а̄паджджати. бхан̣ати, пайоге дуккат̣ам̣; бхан̣ите а̄патти па̄читтийасса.

винайам̣ виван̣н̣енто две а̄паттийо а̄паджджати. виван̣н̣ети, пайоге дуккат̣ам̣; виван̣н̣ите а̄патти па̄читтийасса.

мохенто две а̄паттийо а̄паджджати. ана̄ропите мохе мохети, а̄патти дуккат̣асса; а̄ропите мохе мохети, а̄патти па̄читтийасса.

бхиккхусса купито анаттамано паха̄рам̣ денто две а̄паттийо а̄паджджати. пахарати, пайоге дуккат̣ам̣; пахате а̄патти па̄читтийасса.

бхиккхусса купито анаттамано таласаттикам̣ уггиранто две а̄паттийо а̄паджджати. уггирати, пайоге дуккат̣ам̣; уггирите а̄патти па̄читтийасса.

бхиккхум̣ амӯлакена сан̇гха̄дисесена ануддхам̣сенто две а̄паттийо а̄паджджати. ануддхам̣сети, пайоге дуккат̣ам̣; ануддхам̣сите а̄патти па̄читтийасса.

бхиккхусса сан̃чичча куккуччам̣ упадаханто две а̄паттийо а̄паджджати. упадахати, пайоге дуккат̣ам̣; упадахите а̄патти па̄читтийасса.

бхиккхӯнам̣ бхан̣д̣анаджа̄та̄нам̣ калахаджа̄та̄нам̣ вива̄да̄панна̄нам̣ упассутим̣ тит̣т̣ханто две а̄паттийо а̄паджджати. ‘‘сосса̄мӣ’’ти гаччхати, а̄патти дуккат̣асса; йаттха т̣хито сун̣а̄ти, а̄патти па̄читтийасса.

дхаммика̄нам̣ камма̄нам̣ чхандам̣ датва̄ паччха̄ кхӣйанадхаммам̣ а̄паджджанто две а̄паттийо а̄паджджати. кхиййати, пайоге дуккат̣ам̣; кхиййите а̄патти па̄читтийасса.

сан̇гхе виниччхайакатха̄йа ваттама̄на̄йа чхандам̣ адатва̄ ут̣т̣ха̄йа̄сана̄ паккаманто две а̄паттийо а̄паджджати. париса̄йа хаттхапа̄сам̣ виджахантасса а̄патти дуккат̣асса; виджахите а̄патти па̄читтийасса.

самаггена сан̇гхена чӣварам̣ датва̄ паччха̄ кхӣйанадхаммам̣ а̄паджджанто две а̄паттийо а̄паджджати. кхиййати, пайоге дуккат̣ам̣; кхиййите а̄патти па̄читтийасса.

джа̄нам̣ сан̇гхикам̣ ла̄бхам̣ парин̣атам̣ пуггаласса парин̣а̄менто две а̄паттийо а̄паджджати. парин̣а̄мети, пайоге дуккат̣ам̣; парин̣а̄мите а̄патти па̄читтийасса.

сахадхаммикавагго ат̣т̣хамо.