5. ачелакавагго

94. ачелакасса ва̄ парибба̄джакасса ва̄ парибба̄джика̄йа ва̄ сахаттха̄ кха̄данӣйам̣ ва̄ бходжанӣйам̣ ва̄ дентасса па̄читтийам̣ каттха пан̃н̃аттанти? веса̄лийам̣ пан̃н̃аттам̣. кам̣ а̄раббха̄ти? а̄йасмантам̣ а̄нандам̣ а̄раббха. кисмим̣ ваттхусминти? а̄йасма̄ а̄нандо ан̃н̃атарисса̄ парибба̄джика̄йа екам̣ ман̃н̃ама̄но две пӯве ада̄си, тасмим̣ ваттхусмим̣. ека̄ пан̃н̃атти. чханнам̣ а̄паттисамут̣т̣ха̄на̄нам̣ двӣхи самут̣т̣ха̄нехи самут̣т̣ха̄ти ел̣акаломаке…пе….

95. бхиккхум̣ ‘‘еха̄вусо, га̄мам̣ ва̄ нигамам̣ ва̄ пин̣д̣а̄йа пависисса̄ма̄’’ти тасса да̄петва̄ ва̄ ада̄петва̄ ва̄ уййоджентасса па̄читтийам̣ каттха пан̃н̃аттанти? са̄ваттхийам̣ пан̃н̃аттам̣. кам̣ а̄раббха̄ти? а̄йасмантам̣ упанандам̣ сакйапуттам̣ а̄раббха. кисмим̣ ваттхусминти? а̄йасма̄ упанандо сакйапутто бхиккхум̣ ‘‘еха̄вусо, га̄мам̣ пин̣д̣а̄йа пависисса̄ма̄’’ти, тасса ада̄петва̄ уййоджеси, тасмим̣ ваттхусмим̣. ека̄ пан̃н̃атти. чханнам̣ а̄паттисамут̣т̣ха̄на̄нам̣ тӣхи самут̣т̣ха̄нехи самут̣т̣ха̄ти…пе….

96. сабходжане куле анупакхаджджа нисаджджам̣ каппентасса па̄читтийам̣ каттха пан̃н̃аттанти? са̄ваттхийам̣ пан̃н̃аттам̣. кам̣ а̄раббха̄ти? а̄йасмантам̣ упанандам̣ сакйапуттам̣ а̄раббха. кисмим̣ ваттхусминти? а̄йасма̄ упанандо сакйапутто сабходжане куле анупакхаджджа нисаджджам̣ каппеси, тасмим̣ ваттхусмим̣. ека̄ пан̃н̃атти. чханнам̣ а̄паттисамут̣т̣ха̄на̄нам̣ екена самут̣т̣ха̄нена самут̣т̣ха̄ти – ка̄йато ча читтато ча самут̣т̣ха̄ти, на ва̄чато…пе….

97. ма̄туга̄мена саддхим̣ рахо пат̣иччханне а̄сане нисаджджам̣ каппентасса па̄читтийам̣ каттха пан̃н̃аттанти? са̄ваттхийам̣ пан̃н̃аттам̣. кам̣ а̄раббха̄ти? а̄йасмантам̣ упанандам̣ сакйапуттам̣ а̄раббха. кисмим̣ ваттхусминти? а̄йасма̄ упанандо сакйапутто ма̄туга̄мена саддхим̣ рахо пат̣иччханне а̄сане нисаджджам̣ каппеси, тасмим̣ ваттхусмим̣. ека̄ пан̃н̃атти. чханнам̣ а̄паттисамут̣т̣ха̄на̄нам̣ екена самут̣т̣ха̄нена самут̣т̣ха̄ти – ка̄йато ча читтато ча самут̣т̣ха̄ти, на ва̄чато…пе….

98. ма̄туга̄мена саддхим̣ еко ека̄йа рахо нисаджджам̣ каппентасса па̄читтийам̣ каттха пан̃н̃аттанти? са̄ваттхийам̣ пан̃н̃аттам̣. кам̣ а̄раббха̄ти? а̄йасмантам̣ упанандам̣ сакйапуттам̣ а̄раббха. кисмим̣ ваттхусминти? а̄йасма̄ упанандо сакйапутто ма̄туга̄мена саддхим̣ еко ека̄йа рахо нисаджджам̣ каппеси, тасмим̣ ваттхусмим̣. ека̄ пан̃н̃атти. чханнам̣ а̄паттисамут̣т̣ха̄на̄нам̣ екена самут̣т̣ха̄нена самут̣т̣ха̄ти – ка̄йато ча читтато ча самут̣т̣ха̄ти, на ва̄чато…пе….

99. нимантитена сабхаттена сантам̣ бхиккхум̣ ана̄пуччха̄ пуребхаттам̣ паччха̄бхаттам̣ кулесу ча̄риттам̣ а̄паджджантасса па̄читтийам̣ каттха пан̃н̃аттанти? ра̄джагахе пан̃н̃аттам̣. кам̣ а̄раббха̄ти? а̄йасмантам̣ упанандам̣ сакйапуттам̣ а̄раббха. кисмим̣ ваттхусминти? а̄йасма̄ упанандо сакйапутто нимантито сабхатто сама̄но пуребхаттам̣ паччха̄бхаттам̣ кулесу ча̄риттам̣ а̄паджджи, тасмим̣ ваттхусмим̣. ека̄ пан̃н̃атти, чатассо анупан̃н̃аттийо. чханнам̣ а̄паттисамут̣т̣ха̄на̄нам̣ двӣхи самут̣т̣ха̄нехи самут̣т̣ха̄ти катхинаке…пе….

100. татуттари бхесаджджам̣ вин̃н̃а̄пентасса па̄читтийам̣ каттха пан̃н̃аттанти? саккесу пан̃н̃аттам̣. кам̣ а̄раббха̄ти? чхаббаггийе бхиккхӯ а̄раббха. кисмим̣ ваттхусминти? чхаббаггийа̄ бхиккхӯ маха̄на̄мена саккена ‘‘аджджан̣хо, бханте, а̄гаметха̄’’ти вуччама̄на̄ на̄гамесум̣, тасмим̣ ваттхусмим̣. ека̄ пан̃н̃атти. чханнам̣ а̄паттисамут̣т̣ха̄на̄нам̣ чхахи самут̣т̣ха̄нехи самут̣т̣ха̄ти…пе….

101. уййуттам̣ сенам̣ дассана̄йа гаччхантасса па̄читтийам̣ каттха пан̃н̃аттанти? са̄ваттхийам̣ пан̃н̃аттам̣. кам̣ а̄раббха̄ти? чхаббаггийе бхиккхӯ а̄раббха. кисмим̣ ваттхусминти? чхаббаггийа̄ бхиккхӯ уййуттам̣ сенам̣ дассана̄йа агамам̣су, тасмим̣ ваттхусмим̣. ека̄ пан̃н̃атти, ека̄ анупан̃н̃атти. чханнам̣ а̄паттисамут̣т̣ха̄на̄нам̣ двӣхи самут̣т̣ха̄нехи самут̣т̣ха̄ти ел̣акаломаке…пе….

102. атирекатираттам̣ сена̄йа васантасса па̄читтийам̣ каттха пан̃н̃аттанти? са̄ваттхийам̣ пан̃н̃аттам̣. кам̣ а̄раббха̄ти? чхаббаггийе бхиккхӯ а̄раббха. кисмим̣ ваттхусминти? чхаббаггийа̄ бхиккхӯ атирекатираттам̣ сена̄йа васим̣су, тасмим̣ ваттхусмим̣. ека̄ пан̃н̃атти. чханнам̣ а̄паттисамут̣т̣ха̄на̄нам̣ двӣхи самут̣т̣ха̄нехи самут̣т̣ха̄ти ел̣акаломаке…пе….

103. уййодхикам̣ гаччхантасса па̄читтийам̣ каттха пан̃н̃аттанти? са̄ваттхийам̣ пан̃н̃аттам̣. кам̣ а̄раббха̄ти? чхаббаггийе бхиккхӯ а̄раббха. кисмим̣ ваттхусминти? чхаббаггийа̄ бхиккхӯ уййодхикам̣ агамам̣су, тасмим̣ ваттхусмим̣. ека̄ пан̃н̃атти. чханнам̣ а̄паттисамут̣т̣ха̄на̄нам̣ двӣхи самут̣т̣ха̄нехи самут̣т̣ха̄ти ел̣акаломаке…пе….

ачелакавагго пан̃чамо.