4. аттака̄мапа̄ричарийасиккха̄падам̣

290. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена а̄йасма̄ уда̄йӣ са̄ваттхийам̣ кулӯпако хоти, бахука̄ни кула̄ни упасан̇камати. тена кхо пана самайена ан̃н̃атара̄ иттхӣ матапатика̄ абхирӯпа̄ хоти дассанӣйа̄ па̄са̄дика̄. атха кхо а̄йасма̄ уда̄йӣ пуббан̣хасамайам̣ нива̄сетва̄ паттачӣварама̄да̄йа йена тасса̄ иттхийа̄ нивесанам̣ тенупасан̇ками; упасан̇камитва̄ пан̃н̃атте а̄сане нисӣди. атха кхо са̄ иттхӣ йена̄йасма̄ уда̄йӣ тенупасан̇ками; упасан̇камитва̄ а̄йасмантам̣ уда̄йим̣ абхива̄детва̄ екамантам̣ нисӣди. екамантам̣ нисиннам̣ кхо там̣ иттхим̣ а̄йасма̄ уда̄йӣ дхаммийа̄ катха̄йа сандассеси сама̄дапеси самуттеджеси сампахам̣сеси. атха кхо са̄ иттхӣ а̄йасмата̄ уда̄йина̄ дхаммийа̄ катха̄йа сандассита̄ сама̄дапита̄ самуттеджита̄ сампахам̣сита̄ а̄йасмантам̣ уда̄йим̣ етадавоча – ‘‘вадеййа̄тха, бханте, йена аттхо. пат̣ибала̄ майам̣ аййасса да̄тум̣ йадидам̣ чӣварапин̣д̣апа̄тасена̄санагила̄наппаччайабхесаджджапариккха̄ра’’нти.

‘‘на кхо те, бхагини, амха̄кам̣ дуллабха̄ йадидам̣ чӣварапин̣д̣апа̄тасена̄санагила̄наппаччайабхесаджджапариккха̄ра̄. апича, йо амха̄кам̣ дуллабхо там̣ дехӣ’’ти. ‘‘ким̣, бханте’’ти? ‘‘метхунадхамма’’нти. ‘‘аттхо, бханте’’ти? ‘‘аттхо, бхагинӣ’’ти. ‘‘ехи, бханте’’ти, оваракам̣ пависитва̄ са̄т̣акам̣ никкхипитва̄ ман̃чаке утта̄на̄ нипаджджи. атха кхо а̄йасма̄ уда̄йӣ йена са̄ иттхӣ тенупасан̇ками; упасан̇камитва̄ – ‘‘ко имам̣ васалам̣ дуггандхам̣ а̄масиссатӣ’’ти, нит̣т̣хухитва̄ пакка̄ми. атха кхо са̄ иттхӣ уджджха̄йати кхиййати випа̄чети – ‘‘аладжджино име саман̣а̄ сакйапуттийа̄ дуссӣла̄ муса̄ва̄дино. име хи на̄ма дхаммача̄рино самача̄рино брахмача̄рино саччава̄дино сӣлаванто калйа̄н̣адхамма̄ пат̣иджа̄ниссанти! наттхи имесам̣ са̄ман̃н̃ам̣ наттхи имесам̣ брахман̃н̃ам̣, нат̣т̣хам̣ имесам̣ са̄ман̃н̃ам̣ нат̣т̣хам̣ имесам̣ брахман̃н̃ам̣, куто имесам̣ са̄ман̃н̃ам̣ куто имесам̣ брахман̃н̃ам̣, апагата̄ име са̄ман̃н̃а̄ апагата̄ име брахман̃н̃а̄. катхан̃хи на̄ма саман̣о уда̄йӣ мам̣ са̄мам̣ метхунадхаммам̣ йа̄читва̄, ‘ко имам̣ васалам̣ дуггандхам̣ а̄масиссатӣ’’ти нит̣т̣хухитва̄ паккамиссати! ким̣ ме па̄пакам̣ ким̣ ме дуггандхам̣, касса̄хам̣ кена ха̄йа̄мӣ’’ти? ан̃н̃а̄пи иттхийо уджджха̄йанти кхиййанти випа̄ченти – ‘‘аладжджино име саман̣а̄ сакйапуттийа̄ дуссӣла̄ муса̄ва̄дино…пе… катхан̃хи на̄ма саман̣о уда̄йӣ имисса̄ са̄мам̣ метхунадхаммам̣ йа̄читва̄, ‘ко имам̣ васалам̣ дуггандхам̣ а̄масиссатӣ’ти нит̣т̣хухитва̄ паккамиссати! ким̣ имисса̄ па̄пакам̣ ким̣ имисса̄ дуггандхам̣, касса̄йам̣ кена ха̄йатӣ’’ти? ассосум̣ кхо бхиккхӯ та̄сам̣ иттхӣнам̣ уджджха̄йантӣнам̣ кхиййантӣнам̣ випа̄чентӣнам̣. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма а̄йасма̄ уда̄йӣ ма̄туга̄масса сантике аттака̄мапа̄ричарийа̄йа ван̣н̣ам̣ бха̄сиссатӣ’’ти!

атха кхо те бхиккхӯ а̄йасмантам̣ уда̄йим̣ анекапарийа̄йена вигарахитва̄ бхагавато етаматтхам̣ а̄рочесум̣. атха кхо бхагава̄ етасмим̣ нида̄не етасмим̣ пакаран̣е бхиккхусан̇гхам̣ саннипа̄та̄петва̄ а̄йасмантам̣ уда̄йим̣ пат̣ипуччхи – ‘‘саччам̣ кира твам̣, уда̄йи, ма̄туга̄масса сантике аттака̄мапа̄ричарийа̄йа ван̣н̣ам̣ бха̄сасӣ’’ти? ‘‘саччам̣, бхагава̄’’ти. вигарахи буддхо бхагава̄ – ‘‘анануччхавикам̣, могхапуриса, анануломикам̣ аппатирӯпам̣ асса̄ман̣акам̣ акаппийам̣ акаран̣ӣйам̣. катхан̃хи на̄ма твам̣, могхапуриса, ма̄туга̄масса сантике аттака̄мапа̄ричарийа̄йа ван̣н̣ам̣ бха̄сиссаси! нану майа̄, могхапуриса, анекапарийа̄йена вира̄га̄йа дхаммо десито но сара̄га̄йа…пе… ка̄мапарил̣а̄ха̄нам̣ вӯпасамо аккха̄то? нетам̣, могхапуриса, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

291. ‘‘йо пана бхиккху отин̣н̣о випарин̣атена читтена ма̄туга̄масса сантике аттака̄мапа̄ричарийа̄йа ван̣н̣ам̣ бха̄сеййа – ‘етадаггам̣, бхагини, па̄ричарийа̄нам̣ йа̄ ма̄дисам̣ сӣлавантам̣ калйа̄н̣адхаммам̣ брахмача̄рим̣ етена дхаммена паричареййа̄ти метхунупасам̣хитена’, сан̇гха̄дисесо’’ти.

292. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

отин̣н̣о на̄ма са̄ратто апеккхава̄ пат̣ибаддхачитто.

випарин̣атанти раттампи читтам̣ випарин̣аттам̣, дут̣т̣хампи читтам̣ випарин̣атам̣, мӯл̣хампи читтам̣ випарин̣атам̣. апича, раттам̣ читтам̣ имасмим̣ аттхе адхиппетам̣ випарин̣атанти.

ма̄туга̄мо на̄ма манусситтхӣ, на йаккхӣ, на петӣ, на тираччха̄нагата̄. вин̃н̃ӯ пат̣ибала̄ субха̄ситадуббха̄ситам̣ дут̣т̣халла̄дут̣т̣хуллам̣ а̄джа̄нитум̣.

ма̄туга̄масса сантикети ма̄туга̄масса са̄манта̄, ма̄туга̄масса авидӯре.

аттака̄манти аттано ка̄мам̣ аттано хетум̣ аттано адхиппа̄йам̣ аттано па̄ричарийам̣.

етадагганти етам̣ аггам̣ етам̣ сет̣т̣хам̣ етам̣ моккхам̣ етам̣ уттамам̣ етам̣ паварам̣.

йа̄ти кхаттийӣ [кхаттийа̄ (сйа̄.)] ва̄ бра̄хман̣ӣ ва̄ вессӣ ва̄ суддӣ ва̄.

ма̄дисанти кхаттийам̣ ва̄ бра̄хман̣ам̣ ва̄ вессам̣ ва̄ суддам̣ ва̄.

сӣлавантанти па̄н̣а̄типа̄та̄ пат̣ивиратам̣, адинна̄да̄на̄ пат̣ивиратам̣, муса̄ва̄да̄ пат̣ивиратам̣.

брахмача̄ринти метхунадхамма̄ пат̣ивиратам̣.

калйа̄н̣адхаммо на̄ма тена ча сӣлена тена ча брахмачарийена калйа̄н̣адхаммо хоти.

етена дхаммена̄ти метхунадхаммена.

паричареййа̄ти абхирамеййа.

метхунупасам̣хитена̄ти метхунадхаммаппат̣исам̣йуттена.

сан̇гха̄дисесоти…пе… тенапи вуччати сан̇гха̄дисесоти.

293. иттхӣ ча хоти иттхисан̃н̃ӣ са̄ратто ча. бхиккху ча нам̣ иттхийа̄ сантике аттака̄мапа̄ричарийа̄йа ван̣н̣ам̣ бха̄сати, а̄патти сан̇гха̄дисесасса.

иттхӣ ча хоти вематико…пе… пан̣д̣акасан̃н̃ӣ… пурисасан̃н̃ӣ… тираччха̄нагатасан̃н̃ӣ са̄ратто ча. бхиккху ча нам̣ иттхийа̄ сантике аттака̄мапа̄ричарийа̄йа ван̣н̣ам̣ бха̄сати, а̄патти тхуллаччайасса.

пан̣д̣ако ча хоти пан̣д̣акасан̃н̃ӣ са̄ратто ча. бхиккху ча нам̣ пан̣д̣акасса сантике аттака̄мапа̄ричарийа̄йа ван̣н̣ам̣ бха̄сати, а̄патти тхуллаччайасса.

пан̣д̣ако ча хоти вематико…пе… пурисасан̃н̃ӣ… тираччха̄нагатасан̃н̃ӣ… иттхисан̃н̃ӣ са̄ратто ча. бхиккху ча нам̣ пан̣д̣акасса сантике аттака̄мапа̄ричарийа̄йа ван̣н̣ам̣ бха̄сати, а̄патти дуккат̣асса.

пурисо ча хоти…пе… тираччха̄нагато ча хоти тираччха̄нагатасан̃н̃ӣ…пе… вематико иттхисан̃н̃ӣ… пан̣д̣акасан̃н̃ӣ… пурисасан̃н̃ӣ са̄ратто ча. бхиккху ча нам̣ тираччха̄нагатасса сантике аттака̄мапа̄ричарийа̄йа ван̣н̣ам̣ бха̄сати, а̄патти дуккат̣асса.

две иттхийо двиннам̣ иттхӣнам̣ иттхисан̃н̃ӣ са̄ратто ча. бхиккху ча нам̣ двиннам̣ иттхӣнам̣ сантике аттака̄мапа̄ричарийа̄йа ван̣н̣ам̣ бха̄сати, а̄патти двиннам̣ сан̇гха̄дисеса̄нам̣…пе….

иттхӣ ча пан̣д̣ако ча убхиннам̣ иттхисан̃н̃ӣ са̄ратто ча. бхиккху ча нам̣ убхиннам̣ сантике аттака̄мапа̄ричарийа̄йа ван̣н̣ам̣ бха̄сати, а̄патти сан̇гха̄дисесена дуккат̣асса…пе….

294. ана̄патти ‘‘чӣварапин̣д̣апа̄тасена̄санагила̄наппаччайабхесаджджапариккха̄рена упат̣т̣хаха̄’’ти бхан̣ати, умматтакасса а̄дикаммикасса̄ти.

винӣтаваттхуудда̄нага̄тха̄

катхам̣ ван̃джха̄ лабхе путтам̣, пийа̄ ча субхага̄ сийам̣;

ким̣ даджджам̣ кенупат̣т̣хеййам̣, катхам̣ гаччхеййам̣ суггатинти.

винӣтаваттху

295. тена кхо пана самайена ан̃н̃атара̄ ван̃джха̄ иттхӣ кулӯпакам̣ бхиккхум̣ етадавоча – ‘‘катха̄хам̣, бханте, виджа̄йеййа’’нти? ‘‘тена хи, бхагини, аггада̄нам̣ дехӣ’’ти. ‘‘ким̣, бханте, аггада̄на’’нти? ‘‘метхунадхамма’’нти. тасса куккуччам̣ ахоси…пе… ‘‘а̄паттим̣ твам̣, бхиккху, а̄панно сан̇гха̄дисеса’’нти.

тена кхо пана самайена ан̃н̃атара̄ виджа̄йинӣ иттхӣ кулӯпакам̣ бхиккхум̣ етадавоча – ‘‘катха̄хам̣, бханте, путтам̣ лабхеййа’’нти? ‘‘тена хи, бхагини, аггада̄нам̣ дехӣ’’ти. ‘‘ким̣, бханте, аггада̄на’’нти? ‘‘метхунадхамма’’нти. тасса куккуччам̣ ахоси…пе… ‘‘а̄паттим̣ твам̣, бхиккху, а̄панно сан̇гха̄дисеса’’нти.

тена кхо пана самайена ан̃н̃атара̄ иттхӣ кулӯпакам̣ бхиккхум̣ етадавоча – ‘‘катха̄хам̣, бханте, са̄микасса пийа̄ асса’’нти? ‘‘тена хи, бхагини, аггада̄нам̣ дехӣ’’ти. ‘‘ким̣, бханте, аггада̄на’’нти? ‘‘метхунадхамма’’нти. тасса куккуччам̣ ахоси…пе… ‘‘а̄паттим̣ твам̣, бхиккху, а̄панно сан̇гха̄дисеса’’нти.

тена кхо пана самайена ан̃н̃атара̄ иттхӣ кулӯпакам̣ бхиккхум̣ етадавоча – ‘‘катха̄хам̣, бханте, субхага̄ асса’’нти? ‘‘тена хи, бхагини, аггада̄нам̣ дехӣ’’ти. ‘‘ким̣, бханте, аггада̄на’’нти? ‘‘метхунадхамма’’нти. тасса куккуччам̣ ахоси…пе… ‘‘а̄паттим̣ твам̣, бхиккху, а̄панно сан̇гха̄дисеса’’нти.

тена кхо пана самайена ан̃н̃атара̄ иттхӣ кулӯпакам̣ бхиккхум̣ етадавоча – ‘‘кйа̄хам̣, бханте, аййасса даджджа̄мӣ’’ти? ‘‘аггада̄нам̣, бхагинӣ’’ти. ‘‘ким̣, бханте, аггада̄на’’нти? ‘‘метхунадхамма’’нти. тасса куккуччам̣ ахоси…пе… ‘‘а̄паттим̣ твам̣, бхиккху, а̄панно сан̇гха̄дисеса’’нти.

тена кхо пана самайена ан̃н̃атара̄ иттхӣ кулӯпакам̣ бхиккхум̣ етадавоча – ‘‘кена̄хам̣, бханте, аййам̣ упат̣т̣хемӣ’’ти? ‘‘аггада̄нена, бхагинӣ’’ти. ‘‘ким̣, бханте, аггада̄на’’нти? ‘‘метхунадхамма’’нти. тасса куккуччам̣ ахоси…пе… ‘‘а̄паттим̣ твам̣, бхиккху, а̄панно сан̇гха̄дисеса’’нти.

тена кхо пана самайена ан̃н̃атара̄ иттхӣ кулӯпакам̣ бхиккхум̣ етадавоча – ‘‘катха̄хам̣,

бханте, сугатим̣ гаччхеййа’’нти? ‘‘тена хи, бхагини, аггада̄нам̣ дехӣ’’ти. ‘‘ким̣, бханте, аггада̄на’’нти? ‘‘метхунадхамма’’нти. тасса куккуччам̣ ахоси…пе… ‘‘а̄паттим̣ твам̣, бхиккху, а̄панно сан̇гха̄дисеса’’нти.

аттака̄мапа̄ричарийасиккха̄падам̣ нит̣т̣хитам̣ чатуттхам̣.