13. куладӯсакасиккха̄падам̣

431. [идам̣ ваттху чӯл̣ава. 21] тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена ассаджипунаббасука̄ на̄ма [на̄ма бхиккхӯ (ка.)] кӣт̣а̄гирисмим̣ а̄ва̄сика̄ хонти аладжджино па̄пабхиккхӯ. те [чӯл̣ава. 293] еварӯпам̣ ана̄ча̄рам̣ а̄чаранти – ма̄ла̄ваччхам̣ ропентипи ропа̄пентипи, син̃чантипи син̃ча̄пентипи, очинантипи очина̄пентипи, гантхентипи гантха̄пентипи, екатован̣т̣икама̄лам̣ каронтипи ка̄ра̄пентипи, убхатован̣т̣икама̄лам̣ каронтипи ка̄ра̄пентипи, ман̃джарикам̣ каронтипи ка̄ра̄пентипи, видхӯтикам̣ каронтипи ка̄ра̄пентипи, ват̣ам̣сакам̣ каронтипи ка̄ра̄пентипи, а̄вел̣ам̣ каронтипи ка̄ра̄пентипи, ураччхадам̣ каронтипи ка̄ра̄пентипи. те кулиттхӣнам̣ куладхӣта̄нам̣ кулакума̄рӣнам̣ куласун̣ха̄нам̣ кулада̄сӣнам̣ екатован̣т̣икама̄лам̣ харантипи хара̄пентипи, убхатован̣т̣икама̄лам̣ харантипи хара̄пентипи, ман̃джарикам̣ харантипи хара̄пентипи, видхӯтикам̣ харантипи хара̄пентипи, ват̣ам̣сакам̣ харантипи хара̄пентипи, а̄вел̣ам̣ харантипи хара̄пентипи, ураччхадам̣ харантипи хара̄пентипи. те кулиттхӣхи куладхӣта̄хи кулакума̄рӣхи куласун̣ха̄хи кулада̄сӣхи саддхим̣ екабха̄джанепи бхун̃джанти, екатха̄лакепи пиванти, ека̄санепи нисӣданти, екаман̃чепи туват̣т̣енти, екаттхаран̣а̄пи туват̣т̣енти, екапа̄вуран̣а̄пи туват̣т̣енти, екаттхаран̣апа̄вуран̣а̄пи туват̣т̣енти, вика̄лепи бхун̃джанти, маджджампи пиванти, ма̄ла̄гандхавилепанампи дха̄ренти, наччантипи га̄йантипи ва̄дентипи ла̄сентипи, наччантийа̄пи наччанти, наччантийа̄пи га̄йанти, наччантийа̄пи ва̄денти, наччантийа̄пи ла̄сенти, га̄йантийа̄пи наччанти, га̄йантийа̄пи га̄йанти, га̄йантийа̄пи ва̄денти, га̄йантийа̄пи ла̄сенти, ва̄дентийа̄пи наччанти, ва̄дентийа̄пи га̄йанти, ва̄дентийа̄пи ва̄денти, ва̄дентийа̄пи ла̄сенти, ла̄сентийа̄пи наччанти, ла̄сентийа̄пи га̄йанти, ла̄сентийа̄пи ва̄денти, ла̄сентийа̄пи ла̄сенти. ат̣т̣хападепи кӣл̣анти, дасападепи кӣл̣анти, а̄ка̄сепи кӣл̣анти, париха̄рапатхепи кӣл̣анти, сантика̄йапи кӣл̣анти, кхалика̄йапи кӣл̣анти, гхат̣ика̄йапи кӣл̣анти, сала̄кахаттхенапи кӣл̣анти, аккхенапи кӣл̣анти, пан̇гачӣренапи кӣл̣анти, ван̇какенапи кӣл̣анти, моккхачика̄йапи кӣл̣анти, чин̇гулакенапи кӣл̣анти, патта̄л̣хакенапи кӣл̣анти, ратхакенапи кӣл̣анти, дханукенапи кӣл̣анти, аккхарика̄йапи кӣл̣анти, манесика̄йапи кӣл̣анти, йатха̄вадждженапи кӣл̣анти. хаттхисмимпи сиккханти, ассасмимпи сиккханти, ратхасмимпи сиккханти, дханусмимпи сиккханти, тхарусмимпи сиккханти, хаттхиссапи пурато дха̄ванти, ассассапи пурато дха̄ванти, ратхассапи пурато [пурато дха̄ванти (сйа̄.)] дха̄вантипи а̄дха̄вантипи, уссел̣ентипи, аппхот̣ентипи, ниббуджджхантипи, мут̣т̣хӣхипи йуджджханти, ран̇гамаджджхепи сан̇гха̄т̣им̣ паттхаритва̄ наччаким̣ [наччантим̣ (сӣ. сйа̄.)] евам̣ ваданти – идха, бхагини, наччассӯти, нала̄т̣икампи денти, вивидхампи ана̄ча̄рам̣ а̄чаранти.

432. тена кхо пана самайена ан̃н̃атаро бхиккху ка̄сӣсу вассам̣вут̣т̣хо са̄ваттхим̣ гаччханто бхагавантам̣ дассана̄йа, йена кӣт̣а̄гири тадавасари. атха кхо со бхиккху пуббан̣хасамайам̣ нива̄сетва̄ паттачӣварама̄да̄йа кӣт̣а̄гирим̣ пин̣д̣а̄йа па̄виси па̄са̄дикена абхиккантена пат̣иккантена а̄локитена вилокитена самин̃джитена паса̄ритена оккхиттачаккху ирийа̄патхасампанно. манусса̄ там̣ бхиккхум̣ пасситва̄ евама̄хам̣су – ‘‘ква̄йам̣ абалабало вийа мандамандо вийа бха̄кут̣икабха̄кут̣ико вийа? ко имасса упагатасса пин̣д̣акам̣ дассати? амха̄кам̣ пана аййа̄ ассаджипунаббасука̄ сан̣ха̄ сакхила̄ сукхасамбха̄са̄ михитапуббан̇гама̄ ехисва̄гатава̄дино аббха̄кут̣ика̄ утта̄намукха̄ пуббабха̄сино. тесам̣ кхо на̄ма пин̣д̣о да̄таббо’’ти.

аддаса̄ кхо ан̃н̃атаро упа̄сако там̣ бхиккхум̣ кӣт̣а̄гирисмим̣ пин̣д̣а̄йа чарантам̣. дисва̄на йена со бхиккху тенупасан̇ками; упасан̇камитва̄ там̣ бхиккхум̣ абхива̄детва̄ етадавоча – ‘‘апи, бханте, пин̣д̣о лаббхатӣ’’ти? ‘‘на кхо, а̄вусо, пин̣д̣о лаббхатӣ’’ти. ‘‘ехи, бханте, гхарам̣ гамисса̄ма̄’’ти. атха кхо со упа̄сако там̣ бхиккхум̣ гхарам̣ нетва̄ бходжетва̄ етадавоча – ‘‘кахам̣, бханте, аййо гамиссатӣ’’ти? ‘‘са̄ваттхим̣ кхо ахам̣, а̄вусо, гамисса̄ми бхагавантам̣ дассана̄йа̄’’ти. ‘‘тена хи, бханте, мама вачанена бхагавато па̄де сираса̄ ванда, еван̃ча вадехи – ‘дут̣т̣хо, бханте, кӣт̣а̄гирисмим̣ а̄ва̄со. ассаджипунаббасука̄ на̄ма кӣт̣а̄гирисмим̣ а̄ва̄сика̄ аладжджино па̄пабхиккхӯ. те еварӯпам̣ ана̄ча̄рам̣ а̄чаранти – ма̄ла̄ваччхам̣ ропентипи ропа̄пентипи, син̃чантипи син̃ча̄пентипи…пе… вивидхампи ана̄ча̄рам̣ а̄чаранти. йепи те, бханте, манусса̄ пуббе саддха̄ ахесум̣ пасанна̄ тепи етарахи ассаддха̄ аппасанна̄. йа̄нипи та̄ни сан̇гхасса пуббе да̄напатха̄ни та̄нипи етарахи упаччхинна̄ни. рин̃чанти песала̄ бхиккхӯ, нивасанти па̄пабхиккхӯ. са̄дху, бханте, бхагава̄ кӣт̣а̄гирим̣ бхиккхӯ пахин̣еййа йатха̄йам̣ кӣт̣а̄гирисмим̣ а̄ва̄со сан̣т̣хахеййа̄’’’ти.

евама̄вусоти кхо со бхиккху тасса упа̄сакасса пат̣иссутва̄ йена са̄ваттхи тена пакка̄ми. анупуббена йена са̄ваттхи джетаванам̣ ана̄тхапин̣д̣икасса а̄ра̄мо йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. а̄чин̣н̣ам̣ кхо панетам̣ буддха̄нам̣ бхагаванта̄нам̣ а̄гантукехи бхиккхӯхи саддхим̣ пат̣исаммодитум̣. атха кхо бхагава̄ там̣ бхиккхум̣ етадавоча – ‘‘каччи, бхиккху, кхаманӣйам̣ каччи йа̄панӣйам̣, каччиси аппакиламатхена аддха̄нам̣ а̄гато, куто ча твам̣ бхиккху а̄гаччхасӣ’’ти? ‘‘кхаманӣйам̣, бхагава̄, йа̄панӣйам̣, бхагава̄. аппакиламатхена ча̄хам̣, бханте, аддха̄нам̣ а̄гато. идха̄хам̣, бханте, ка̄сӣсу вассам̣вут̣т̣хо са̄ваттхим̣ а̄гаччханто бхагавантам̣ дассана̄йа йена кӣт̣а̄гири тадавасарим̣. атха кхва̄хам̣, бханте, пуббан̣хасамайам̣ нива̄сетва̄ паттачӣварама̄да̄йа кӣт̣а̄гирим̣ пин̣д̣а̄йа па̄висим̣. аддаса̄ кхо мам̣, бханте, ан̃н̃атаро упа̄сако кӣт̣а̄гирисмим̣ пин̣д̣а̄йа чарантам̣. дисва̄на йена̄хам̣ тенупасан̇ками; упасан̇камитва̄ мам̣ абхива̄детва̄ етадавоча – ‘апи, бханте, пин̣д̣о лаббхатӣ’ти? ‘на кхо, а̄вусо, пин̣д̣о лаббхатӣ’ти. ‘ехи, бханте, гхарам̣ гамисса̄ма̄’ти. атха кхо, бханте, со упа̄сако мам̣ гхарам̣ нетва̄ бходжетва̄ етадавоча – ‘кахам̣, бханте, аййо гамиссасӣ’ти? ‘са̄ваттхим̣ кхо ахам̣, а̄вусо, гамисса̄ми бхагавантам̣ дассана̄йа̄’ти. тена хи, бханте, мама вачанена бхагавато па̄де сираса̄ ванда, еван̃ча вадехи – ‘дут̣т̣хо, бханте, кӣт̣а̄гирисмим̣ а̄ва̄со, ассаджипунаббасука̄ на̄ма кӣт̣а̄гирисмим̣ а̄ва̄сика̄ аладжджино па̄пабхиккхӯ. те еварӯпам̣ ана̄ча̄рам̣ а̄чаранти – ма̄ла̄ваччхам̣ ропентипи ропа̄пентипи, син̃чантипи син̃ча̄пентипи…пе… вивидхампи ана̄ча̄рам̣ а̄чаранти. йепи те, бханте, манусса̄ пуббе саддха̄ ахесум̣ пасанна̄ тепи етарахи ассаддха̄ аппасанна̄, йа̄нипи та̄ни сан̇гхасса пуббе да̄напатха̄ни та̄нипи етарахи упаччхинна̄ни, рин̃чанти песала̄ бхиккхӯ нивасанти па̄пабхиккхӯ. са̄дху, бханте, бхагава̄ кӣт̣а̄гирим̣ бхиккхӯ пахин̣еййа йатха̄йам̣ кӣт̣а̄гирисмим̣ а̄ва̄со сан̣т̣хахеййа̄’ти. тато ахам̣, бхагава̄, а̄гаччха̄мӣ’’ти.

433. атха кхо бхагава̄ етасмим̣ нида̄не етасмим̣ пакаран̣е бхиккхусан̇гхам̣ саннипа̄та̄петва̄ бхиккхӯ пат̣ипуччхи – ‘‘саччам̣ кира, бхиккхаве, ассаджипунаббасука̄ на̄ма кӣт̣а̄гирисмим̣ а̄ва̄сика̄ аладжджино па̄пабхиккхӯ те еварӯпам̣ ана̄ча̄рам̣ а̄чаранти – ма̄ла̄ваччхам̣ ропентипи ропа̄пентипи, син̃чантипи син̃ча̄пентипи …пе… вивидхампи ана̄ча̄рам̣ а̄чаранти, йепи те, бхиккхаве, манусса̄ пуббе саддха̄ ахесум̣ пасанна̄ тепи етарахи ассаддха̄ аппасанна̄; йа̄нипи та̄ни сан̇гхасса пуббе да̄напатха̄ни та̄нипи етарахи упаччхинна̄ни; рин̃чанти песала̄ бхиккхӯ нивасанти па̄пабхиккхӯ’’ти? ‘‘саччам̣, бхагава̄’’ти. вигарахи буддхо бхагава̄…пе… ‘‘катхан̃хи на̄ма те, бхиккхаве, могхапуриса̄ еварӯпам̣ ана̄ча̄рам̣ а̄чариссанти – ма̄ла̄ваччхам̣ ропессантипи ропа̄пессантипи, сан̃чиссантипи син̃ча̄пессантипи, очиниссантипи очина̄пессантипи, гантхиссантипи гантха̄пессантипи, екатован̣т̣икама̄лам̣ кариссантипи ка̄ра̄пессантипи, убхатован̣т̣икама̄лам̣ кариссантипи ка̄ра̄пессантипи, ман̃джарикам̣ кариссантипи ка̄ра̄пессантипи, видхӯтикам̣ кариссантипи ка̄ра̄пессантипи, ват̣ам̣сакам̣ кариссантипи ка̄ра̄пессантипи, а̄вел̣ам̣ кариссантипи ка̄ра̄пессантипи, ураччхадам̣ кариссантипи ка̄ра̄пессантипи. те кулиттхӣнам̣ куладхӣта̄нам̣ кулакума̄рӣнам̣ куласун̣ха̄нам̣ кулада̄сӣнам̣ екатован̣т̣икама̄лам̣ хариссантипи ха̄ра̄пессантипи, убхатован̣т̣икама̄лам̣ хариссантипи ха̄ра̄пессантипи, ман̃джарикам̣ хариссантипи ха̄ра̄пессантипи, видхӯтикам̣ хариссантипи ха̄ра̄пессантипи, ват̣ам̣сакам̣ хариссантипи ха̄ра̄пессантипи, а̄вел̣ам̣ хариссантипи ха̄ра̄пессантипи, ураччхадам̣ хариссантипи ха̄ра̄пессантипи. те кулиттхӣхи куладхӣта̄хи кулакума̄рӣхи куласун̣ха̄хи кулада̄сӣхи саддхим̣ екабха̄джанепи бхун̃джиссанти, екатха̄лакепи пивиссанти, ека̄санепи нисӣдиссанти, екаман̃чепи туват̣т̣иссанти, екаттхаран̣а̄пи туват̣т̣иссанти, екапа̄вуран̣а̄пи туват̣т̣иссанти, екаттхаран̣апа̄вуран̣а̄пи туват̣т̣иссанти, вика̄лепи бхун̃джиссанти, маджджампи пивиссанти, ма̄ла̄гандхавилепанампи дха̄риссанти, наччиссантипи га̄йиссантипи ва̄дессантипи ла̄сессантипи, наччантийа̄пи наччиссанти наччантийа̄пи га̄йиссанти наччантийа̄пи ва̄дессанти наччантийа̄пи ла̄сессанти, га̄йантийа̄пи наччиссанти га̄йантийа̄пи га̄йиссанти га̄йантийа̄пи ва̄дессанти га̄йантийа̄пи ла̄сессанти, ва̄дентийа̄пи наччиссанти ва̄дентийа̄пи га̄йиссанти ва̄дентийа̄пи ва̄дессанти ва̄дентийа̄пи ла̄сессанти, ла̄сентийа̄пи наччиссанти ла̄сентийа̄пи га̄йиссанти ла̄сентийа̄пи ва̄дессанти ла̄сентийа̄пи ла̄сессанти, ат̣т̣хападепи кӣл̣иссанти дасападепи кӣл̣иссанти, ака̄сепи кӣл̣иссанти, париха̄рапатхепи кӣл̣иссанти, сантика̄йапи кӣл̣иссанти, кхалика̄йапи кӣл̣иссанти, гхат̣ика̄йапи кӣл̣иссанти, сала̄кахаттхенапи кӣл̣иссанти, аккхенапи кӣл̣иссанти, пан̇гачӣренапи кӣл̣иссанти, ван̇какенапи кӣл̣иссанти, моккхачика̄йапи кӣл̣иссанти, чин̇гулакенапи кӣл̣иссанти, патта̄л̣хакенапи кӣл̣иссанти, ратхакенапи кӣл̣иссанти, дханукенапи кӣл̣иссанти, аккхарика̄йапи кӣл̣иссанти, манесика̄йапи кӣл̣иссанти, йатха̄вадждженапи кӣл̣иссанти, хаттхисмимпи сиккхиссанти, ассасмимпи сиккхиссанти, ратхасмимпи сиккхиссанти, дханусмимпи сиккхиссанти, тхарусмимпи сиккхиссанти, хаттхиссапи пурато дха̄виссанти, ассассапи пурато дха̄виссанти, ратхассапи пурато [пурато дха̄виссанти (сйа̄.)] дха̄виссантипи а̄дха̄виссантипи, уссел̣ессантипи, аппхот̣ессантипи, ниббуджджхиссантипи, мут̣т̣хӣхипи йуджджхиссанти, ран̇гамаджджхепи сан̇гха̄т̣им̣ паттхаритва̄ наччаким̣ евам̣ ваккханти ‘‘идха бхагини наччассӯ’’ти нала̄т̣икампи дассанти, вивидхампи ана̄ча̄рам̣ а̄чариссанти! нетам̣, бхиккхаве, аппасанна̄нам̣ ва̄ паса̄да̄йа…пе… вигарахитва̄ дхаммим̣ катхам̣ катва̄ са̄рипуттамоггалла̄не а̄мантеси – ‘‘гаччхатха тумхе, са̄рипутта̄, кӣт̣а̄гирим̣ гантва̄ ассаджипунаббасука̄нам̣ бхиккхӯнам̣ кӣт̣а̄гирисма̄ пабба̄джанӣйакаммам̣ каротха. тумха̄кам̣ ете саддхивиха̄рика̄’’ти.

‘‘катхам̣ майам̣, бханте, ассаджипунаббасука̄нам̣ бхиккхӯнам̣ кӣт̣а̄гирисма̄ пабба̄джанӣйакаммам̣ карома? чан̣д̣а̄ те бхиккхӯ пхаруса̄’’ти. ‘‘тена хи тумхе, са̄рипутта̄, бахукехи бхиккхӯхи саддхим̣ гаччхатха̄’’ти. ‘‘евам̣, бханте’’ти кхо са̄рипуттамоггалла̄на̄ бхагавато паччассосум̣. ‘‘еван̃ча пана, бхиккхаве, ка̄таббам̣. пат̣хамам̣ ассаджипунаббасука̄ бхиккхӯ чодетабба̄. чодетва̄ са̄ретабба̄. са̄ретва̄ а̄паттим̣ ропетабба̄. а̄паттим̣ ропетва̄ бйаттена бхиккхуна̄ пат̣ибалена сан̇гхо н̃а̄петаббо –

434. ‘‘сун̣а̄ту ме, бханте, сан̇гхо. име ассаджипунаббасука̄ бхиккхӯ куладӯсака̄ па̄пасама̄ча̄ра̄. имесам̣ па̄пака̄ сама̄ча̄ра̄ диссанти чева суййанти ча. кула̄ни ча имехи дут̣т̣ха̄ни диссанти чева суййанти ча. йади сан̇гхасса паттакаллам̣, сан̇гхо ассаджипунаббасука̄нам̣ бхиккхӯнам̣ кӣт̣а̄гирисма̄ пабба̄джанӣйакаммам̣ кареййа – ‘на ассаджипунаббасукехи бхиккхӯхи кӣт̣а̄гирисмим̣ ваттхабба’нти. еса̄ н̃атти.

‘‘сун̣а̄ту ме, бханте, сан̇гхо. име ассаджипунаббасука̄ бхиккхӯ куладӯсака̄ па̄пасама̄ча̄ра̄. имесам̣ па̄пака̄ сама̄ча̄ра̄ диссанти чева суййанти ча. кула̄ни ча имехи дут̣т̣ха̄ни диссанти чева суййанти ча. сан̇гхо ассаджипунаббасука̄нам̣ бхиккхӯнам̣ кӣт̣а̄гирисма̄ пабба̄джанӣйакаммам̣ кароти – ‘на ассаджипунаббасукехи бхиккхӯхи кӣт̣а̄гирисмим̣ ваттхабба’нти. йасса̄йасмато кхамати ассаджипунаббасука̄нам̣ бхиккхӯнам̣ кӣт̣а̄гирисма̄ пабба̄джанӣйакаммасса каран̣ам̣ – ‘на ассаджипунаббасукехи бхиккхӯхи кӣт̣а̄гирисмим̣ ваттхабба’нти, со тун̣хасса; йасса наккхамати, со бха̄сеййа.

‘‘дутийампи етаматтхам̣ вада̄ми…пе… татийампи етаматтхам̣ вада̄ми – сун̣а̄ту ме, бханте, сан̇гхо…пе… со бха̄сеййа.

‘‘катам̣ сан̇гхена ассаджипунаббасука̄нам̣ бхиккхӯнам̣ кӣт̣а̄гирисма̄ пабба̄джанӣйакаммам̣ – ‘на ассаджипунаббасукехи бхиккхӯхи кӣт̣а̄гирисмим̣ ваттхабба’нти. кхамати сан̇гхасса, тасма̄ тун̣хӣ, еваметам̣ дха̄райа̄мӣ’’ти.

435. атха кхо са̄рипуттамоггалла̄наппамукхо бхиккхусан̇гхо кӣт̣а̄гирим̣ гантва̄ ассаджипунаббасука̄нам̣ бхиккхӯнам̣ кӣт̣а̄гирисма̄ пабба̄джанӣйакаммам̣ ака̄си – ‘на ассаджипунаббасукехи бхиккхӯхи кӣт̣а̄гирисмим̣ ваттхабба’нти. те сан̇гхена пабба̄джанӣйакаммаката̄ на самма̄ ваттанти, на ломам̣ па̄тенти, на неттха̄рам̣ ваттанти, на бхиккхӯ кхама̄пенти, аккосанти парибха̄санти чхандага̄мита̄ досага̄мита̄ мохага̄мита̄ бхайага̄мита̄ па̄пенти, паккамантипи, виббхамантипи. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма ассаджипунаббасука̄ бхиккхӯ сан̇гхена пабба̄джанӣйакаммаката̄ на самма̄ ваттиссанти, на ломам̣ па̄тессанти, на неттха̄рам̣ ваттиссанти, на бхиккхӯ кхама̄пессанти, аккосиссанти парибха̄сиссанти, чхандага̄мита̄ досага̄мита̄ мохага̄мита̄ бхайага̄мита̄ па̄пессанти паккамиссантипи виббхамиссантипӣ’’ти! атха кхо те бхиккхӯ ассаджипунаббасуке бхиккхӯ анекапарийа̄йена вигарахитва̄ бхагавато етаматтхам̣ а̄рочесум̣…пе… ‘‘саччам̣ кира, бхиккхаве, ассаджипунаббасука̄ бхиккхӯ сан̇гхена пабба̄джанӣйакаммаката̄ на самма̄ ваттанти…пе… виббхамантипӣ’’ти? ‘‘саччам̣, бхагава̄’’ти. вигарахи буддхо бхагава̄…пе… еван̃ча пана, бхиккхаве, имам̣ сиккха̄падам̣ уддисеййа̄тха –

436. ‘‘бхиккху панева ан̃н̃атарам̣ га̄мам̣ ва̄ нигамам̣ ва̄ упанисса̄йа вихарати куладӯсако па̄пасама̄ча̄ро. тасса кхо па̄пака̄ сама̄ча̄ра̄ диссанти чева суййанти ча, кула̄ни ча тена дут̣т̣ха̄ни диссанти чева суййанти ча. со бхиккху бхиккхӯхи евамасса вачанӣйо – ‘а̄йасма̄ кхо куладӯсако па̄пасама̄ча̄ро, а̄йасмато кхо па̄пака̄ сама̄ча̄ра̄ диссанти чева суййанти ча, кула̄ни ча̄йасмата̄ дут̣т̣ха̄ни диссанти чева суййанти ча. паккамата̄йасма̄ имамха̄ а̄ва̄са̄. алам̣ те идха ва̄сена̄’ти. еван̃ча со бхиккху бхиккхӯхи вуччама̄но те бхиккхӯ евам̣ вадеййа – ‘чхандага̄мино ча бхиккхӯ досага̄мино ча бхиккхӯ мохага̄мино ча бхиккхӯ бхайага̄мино ча бхиккхӯ та̄дисика̄йа а̄паттийа̄ екаччам̣ пабба̄дженти екаччам̣ на пабба̄джентӣ’ти, со бхиккху бхиккхӯхи евамасса вачанӣйо – ‘ма̄йасма̄ евам̣ авача. на ча бхиккхӯ чхандага̄мино. на ча бхиккхӯ досага̄мино. на ча бхиккхӯ мохага̄мино. на ча бхиккхӯ бхайага̄мино. а̄йасма̄ кхо куладӯсако па̄пасама̄ча̄ро. а̄йасмато кхо па̄пака̄ сама̄ча̄ра̄ диссанти чева суййанти ча. кула̄ни ча̄йасмата̄ дут̣т̣ха̄ни диссанти чева суййанти ча. паккамата̄йасма̄ имамха̄ а̄ва̄са̄. алам̣ те идха ва̄сена̄’ти. еван̃ча со бхиккху бхиккхӯхи вуччама̄но татхева пагган̣хеййа, со бхиккху бхиккхӯхи йа̄вататийам̣ саманубха̄ситаббо тасса пат̣иниссагга̄йа. йа̄вататийан̃че саманубха̄сӣйама̄но там̣ пат̣иниссаджджеййа, иччетам̣ кусалам̣; но че пат̣иниссаджджеййа, сан̇гха̄дисесо’’ти.

437. бхиккху панева ан̃н̃атарам̣ га̄мам̣ ва̄ нигамам̣ ва̄ти га̄мопи нигамопи нагарампи га̄мо чева нигамо ча.

упанисса̄йа вихаратӣти таттха пат̣ибаддха̄ хонти чӣварапин̣д̣апа̄тасена̄санагила̄наппаччайабхесаджджапариккха̄ра̄.

кулам̣ на̄ма чатта̄ри кула̄ни – кхаттийакулам̣, бра̄хман̣акулам̣, вессакулам̣, суддакулам̣.

куладӯсакоти кула̄ни дӯсети пуппхена ва̄ пхалена ва̄ чун̣н̣ена ва̄ маттика̄йа ва̄ дантакат̣т̣хена ва̄ вел̣уйа̄ ва̄ [вел̣уна̄ ва̄ (сйа̄.)] веджджика̄йа ва̄ джан̇гхапесаникена ва̄.

па̄пасама̄ча̄роти ма̄ла̄ваччхам̣ ропетипи ропа̄петипи, син̃чатипи син̃ча̄петипи, очина̄типи очина̄петипи, гантхетипи гантха̄петипи.

диссанти чева суййанти ча̄ти йе сам̣мукха̄ те пассанти, йе тироккха̄ те сун̣анти.

кула̄ни ча тена дут̣т̣ха̄нӣти пуббе саддха̄ хутва̄ там̣ а̄гамма ассаддха̄ хонти, пасанна̄ хутва̄ аппасанна̄ хонти.

диссанти чева суййанти ча̄ти йе сам̣мукха̄ те пассанти, йе тироккха̄ те сун̣анти.

со бхиккхӯти йо со куладӯсако бхиккху.

бхиккхӯхӣти ан̃н̃ехи бхиккхӯхи. йе пассанти йе сун̣анти. техи ваттаббо – ‘‘а̄йасма̄ кхо куладӯсако па̄пасама̄ча̄ро. а̄йасмато кхо па̄пака̄ сама̄ча̄ра̄ диссанти чева суййанти ча. кула̄ни ча̄йасмата̄ дут̣т̣ха̄ни диссанти чева суййанти ча. паккамата̄йасма̄ имамха̄ а̄ва̄са̄. алам̣ те идха ва̄сена̄’’ти.

еван̃ча со бхиккху бхиккхӯхи вуччама̄но те бхиккхӯ евам̣ вадеййа – ‘‘чхандага̄мино ча бхиккхӯ, досага̄мино ча бхиккхӯ, мохага̄мино ча бхиккхӯ, бхайага̄мино ча бхиккхӯ. та̄дисика̄йа а̄паттийа̄ екаччам̣ пабба̄дженти екаччам̣ на пабба̄джентӣ’’ти.

со бхиккхӯти йо со каммакато бхиккху.

бхиккхӯхӣти ан̃н̃ехи бхиккхӯхи. йе пассанти йе сун̣анти техи ваттаббо – ‘‘ма̄йасма̄ евам̣ авача. на ча бхиккхӯ чхандага̄мино, на ча бхиккхӯ досага̄мино, на ча бхиккхӯ мохага̄мино, на ча бхиккхӯ бхайага̄мино. а̄йасма̄ кхо куладӯсако па̄пасама̄ча̄ро. а̄йасмато кхо па̄пака̄ сама̄ча̄ра̄ диссанти чева суййанти ча. кула̄ни ча̄йасмата̄ дут̣т̣ха̄ни диссанти чева суййанти ча. паккамата̄йасма̄ имамха̄ а̄ва̄са̄. алам̣ те идха ва̄сена̄’’ти. дутийампи ваттаббо. татийампи ваттаббо.

саче пат̣иниссаджджати, иччетам̣ кусалам̣. но че пат̣иниссаджджати, а̄патти дуккат̣асса. сутва̄ на ваданти, а̄патти дуккат̣асса. со бхиккху сан̇гхамаджджхампи а̄кад̣д̣хитва̄ ваттаббо – ‘‘ма̄йасма̄ евам̣ авача. на ча бхиккхӯ чхандага̄мино, на ча бхиккхӯ досага̄мино, на ча бхиккхӯ мохага̄мино, на ча бхиккхӯ бхайага̄мино. а̄йасма̄ кхо куладӯсако па̄пасама̄ча̄ро. а̄йасмато кхо па̄пака̄ сама̄ча̄ра̄ диссанти чева суййанти ча. кула̄ни ча̄йасмата̄ дут̣т̣ха̄ни диссанти чева суййанти ча. паккамата̄йасма̄ имамха̄ а̄ва̄са̄. алам̣ те идха ва̄сена̄’’ти. дутийампи ваттаббо. татийампи ваттаббо. саче пат̣иниссаджджати, иччетам̣ кусалам̣. но че пат̣иниссаджджати, а̄патти дуккат̣асса. со бхиккху саманубха̄ситаббо. еван̃ча пана, бхиккхаве, саманубха̄ситаббо. бйаттена бхиккхуна̄ пат̣ибалена сан̇гхо н̃а̄петаббо –

438. ‘‘сун̣а̄ту ме, бханте, сан̇гхо. айам̣ иттханна̄мо бхиккху сан̇гхена пабба̄джанӣйакаммакато бхиккхӯ чхандага̄мита̄ досага̄мита̄ мохага̄мита̄ бхайага̄мита̄ па̄пети. со там̣ ваттхум̣ на пат̣иниссаджджати. йади сан̇гхасса паттакаллам̣, сан̇гхо иттханна̄мам̣ бхиккхум̣ саманубха̄сеййа тасса ваттхусса пат̣иниссагга̄йа. еса̄ н̃атти.

‘‘сун̣а̄ту ме, бханте, сан̇гхо. айам̣ иттханна̄мо бхиккху сан̇гхена пабба̄джанӣйакаммакато бхиккхӯ чхандага̄мита̄ досага̄мита̄ мохага̄мита̄ бхайага̄мита̄ па̄пети. со там̣ ваттхум̣ на пат̣иниссаджджати. сан̇гхо иттханна̄мам̣ бхиккхум̣ саманубха̄сати тасса ваттхусса пат̣иниссагга̄йа. йасса̄йасмато кхамати иттханна̄масса бхиккхуно саманубха̄сана̄ тасса ваттхусса пат̣иниссагга̄йа, со тун̣хасса; йасса наккхамати, со бха̄сеййа.

‘‘дутийампи етаматтхам̣ вада̄ми…пе… татийампи етаматтхам̣ вада̄ми…пе….

‘‘саманубхат̣т̣хо сан̇гхена иттханна̄мо бхиккху тасса ваттхусса пат̣иниссагга̄йа. кхамати сан̇гхасса, тасма̄ тун̣хӣ, еваметам̣ дха̄райа̄мӣ’’ти.

439. н̃аттийа̄ дуккат̣ам̣, двӣхи каммава̄ча̄хи тхуллаччайа̄, каммава̄ча̄парийоса̄не а̄патти сан̇гха̄дисесасса. сан̇гха̄дисесам̣ аджджха̄паджджантасса н̃аттийа̄ дуккат̣ам̣, двӣхи каммава̄ча̄хи тхуллаччайа̄ пат̣иппассамбханти.

сан̇гха̄дисесоти сан̇гхова тасса̄ а̄паттийа̄ парива̄сам̣ дети, мӯла̄йа пат̣икассати, ма̄наттам̣ дети, аббхети; на самбахула̄, на екапуггало. тена вуччати – ‘сан̇гха̄дисесо’ти, тассева а̄паттиника̄йасса на̄макаммам̣ адхивачанам̣. тенапи вуччати сан̇гха̄дисесоти.

440. дхаммакамме дхаммакаммасан̃н̃ӣ на пат̣иниссаджджати, а̄патти сан̇гха̄дисесасса.

дхаммакамме вематико на пат̣иниссаджджати, а̄патти сан̇гха̄дисесасса.

дхаммакамме адхаммакаммасан̃н̃ӣ на пат̣иниссаджджати, а̄патти сан̇гха̄дисесасса.

адхаммакамме дхаммакаммасан̃н̃ӣ, а̄патти дуккат̣асса.

адхаммакамме вематико, а̄патти дуккат̣асса.

адхаммакамме адхаммакаммасан̃н̃ӣ, а̄патти дуккат̣асса.

441. ана̄патти асаманубха̄сантасса, пат̣иниссаджджантасса, умматтакасса, а̄дикаммикасса̄ти.

куладӯсакасиккха̄падам̣ нит̣т̣хитам̣ терасамам̣.

442. уддит̣т̣ха̄ кхо, а̄йасманто, тераса сан̇гха̄дисеса̄ дхамма̄, нава пат̣хама̄паттика̄, чатта̄ро йа̄вататийака̄. йесам̣ бхиккху ан̃н̃атарам̣ ва̄ ан̃н̃атарам̣ ва̄ а̄паджджитва̄ йа̄ватӣхам̣ джа̄нам̣ пат̣иччха̄дети та̄ватӣхам̣ тена бхиккхуна̄ ака̄ма̄ париваттхаббам̣. паривуттхапарива̄сена бхиккхуна̄ уттари чха̄раттам̣ бхиккхума̄натта̄йа пат̣ипаджджитаббам̣. чин̣н̣ама̄натто бхиккху йаттха сийа̄ вӣсатиган̣о бхиккхусан̇гхо таттха со бхиккху аббхетаббо. екенапи че ӯно вӣсатиган̣о бхиккхусан̇гхо там̣ бхиккхум̣ аббхеййа, со ча бхиккху анаббхито, те ча бхиккхӯ га̄райха̄, айам̣ таттха са̄мӣчи. таттха̄йасманте пуччха̄ми – ‘каччиттха парисуддха̄’? дутийампи пуччха̄ми – ‘каччиттха парисуддха̄’? татийампи пуччха̄ми – ‘каччиттха парисуддха̄’? парисуддхеттха̄йасманто. тасма̄ тун̣хӣ, еваметам̣ дха̄райа̄мӣти.

терасакам̣ нит̣т̣хитам̣.

тассудда̄нам̣ –

виссат̣т̣хи ка̄йасам̣саггам̣, дут̣т̣хуллам̣ аттака̄ман̃ча;

сан̃чариттам̣ кут̣ӣ чева, виха̄ро ча амӯлакам̣.

кин̃чилесан̃ча бхедо ча, тассева ануваттака̄;

дуббачам̣ куладӯсан̃ча, сан̇гха̄дисеса̄ тераса̄ти.

сан̇гха̄дисесакан̣д̣ам̣ нит̣т̣хитам̣.