1. муса̄ва̄дасиккха̄падам̣

име кхо пана̄йасманто двенавути па̄читтийа̄

дхамма̄ уддесам̣ а̄гаччханти.

1. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена хаттхако сакйапутто ва̄даккхитто хоти. со титтхийехи саддхим̣ саллапанто аваджа̄нитва̄ пат̣иджа̄на̄ти, пат̣иджа̄нитва̄ аваджа̄на̄ти, ан̃н̃енан̃н̃ам̣ пат̣ичарати, сампаджа̄намуса̄ бха̄сати, сан̇кетам̣ катва̄ висам̣ва̄дети. титтхийа̄ уджджха̄йанти кхиййанти випа̄ченти – ‘‘катхан̃хи на̄ма хаттхако сакйапутто амхехи саддхим̣ саллапанто аваджа̄нитва̄ пат̣иджа̄ниссати, пат̣иджа̄нитва̄ аваджа̄ниссати, ан̃н̃енан̃н̃ам̣ пат̣ичариссати, сампаджа̄намуса̄ бха̄сиссати, сан̇кетам̣ катва̄ висам̣ва̄дессатӣ’’ти!

ассосум̣ кхо бхиккхӯ тесам̣ титтхийа̄нам̣ уджджха̄йанта̄нам̣ кхиййанта̄нам̣ випа̄чента̄нам̣. атха кхо те бхиккхӯ йена хаттхако сакйапутто тенупасан̇камим̣су; упасан̇камитва̄ хаттхакам̣ сакйапуттам̣ етадавочум̣ – ‘‘саччам̣ кира твам̣, а̄вусо хаттхака, титтхийехи саддхим̣ саллапанто аваджа̄нитва̄ пат̣иджа̄на̄си, пат̣иджа̄нитва̄ аваджа̄на̄си, ан̃н̃енан̃н̃ам̣ пат̣ичараси, сампаджа̄намуса̄ бха̄саси, сан̇кетам̣ катва̄ висам̣ва̄десӣ’’ти? ‘‘ете кхо, а̄вусо, титтхийа̄ на̄ма йена кеначи джетабба̄; нева тесам̣ джайо да̄таббо’’ти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма хаттхако сакйапутто титтхийехи саддхим̣ саллапанто аваджа̄нитва̄ пат̣иджа̄ниссати, пат̣иджа̄нитва̄ аваджа̄ниссати, ан̃н̃енан̃н̃ам̣ пат̣ичариссати, сампаджа̄намуса̄ бха̄сиссати, сан̇кетам̣ катва̄ висам̣ва̄дессатӣ’’ти!

атха кхо те бхиккхӯ хаттхакам̣ сакйапуттам̣ анекапарийа̄йена вигарахитва̄ бхагавато етаматтхам̣ а̄рочесум̣. атха кхо бхагава̄ етасмим̣ нида̄не етасмим̣ пакаран̣е бхиккхусан̇гхам̣ саннипа̄та̄петва̄ хаттхакам̣ сакйапуттам̣ пат̣ипуччхи – ‘‘саччам̣ кира твам̣, хаттхака, титтхийехи саддхим̣ саллапанто аваджа̄нитва̄ пат̣иджа̄на̄си, пат̣иджа̄нитва̄ аваджа̄на̄си, ан̃н̃енан̃н̃ам̣ пат̣ичараси, сампаджа̄намуса̄ бха̄саси, сан̇кетам̣ катва̄ висам̣ва̄десӣ’’ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма твам̣, могхапуриса, титтхийехи саддхим̣ саллапанто аваджа̄нитва̄ пат̣иджа̄ниссаси, пат̣иджа̄нитва̄ аваджа̄ниссаси, ан̃н̃енан̃н̃ам̣ пат̣ичариссаси, сампаджа̄намуса̄ бха̄сиссаси, сан̇кетам̣ катва̄ висам̣ва̄дессаси! нетам̣, могхапуриса, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

2. ‘‘сампаджа̄намуса̄ва̄де па̄читтийа’’нти.

3. сампаджа̄намуса̄ва̄до на̄ма висам̣ва̄данапуреккха̄расса ва̄ча̄, гира̄, бйаппатхо, вачӣбхедо, ва̄часика̄ вин̃н̃атти, ат̣т̣ха анарийавоха̄ра̄ – адит̣т̣хам̣ дит̣т̣хам̣ мети, ассутам̣ сутам̣ мети, амутам̣ мутам̣ мети, авин̃н̃а̄там̣ вин̃н̃а̄там̣ мети, дит̣т̣хам̣ адит̣т̣хам̣ мети, сутам̣ ассутам̣ мети, мутам̣ амутам̣ мети, вин̃н̃а̄там̣ авин̃н̃а̄там̣ мети.

адит̣т̣хам̣ на̄ма на чаккхуна̄ дит̣т̣хам̣. ассутам̣ на̄ма на сотена сутам̣. амутам̣ на̄ма на гха̄нена гха̄йитам̣, на дживха̄йа са̄йитам̣, на ка̄йена пхут̣т̣хам̣. авин̃н̃а̄там̣ на̄ма на манаса̄ вин̃н̃а̄там̣. дит̣т̣хам̣ на̄ма чаккхуна̄ дит̣т̣хам̣. сутам̣ на̄ма сотена сутам̣. мутам̣ на̄ма гха̄нена гха̄йитам̣, дживха̄йа са̄йитам̣, ка̄йена пхут̣т̣хам̣. вин̃н̃а̄там̣ на̄ма манаса̄ вин̃н̃а̄там̣.

4. тӣха̄ка̄рехи ‘‘адит̣т̣хам̣ дит̣т̣хам̣ ме’’ти сампаджа̄намуса̄ бхан̣антасса а̄патти па̄читтийасса – пуббевасса хоти ‘‘муса̄ бхан̣исса’’нти, бхан̣антасса хоти ‘‘муса̄ бхан̣а̄мӣ’’ти, бхан̣итасса хоти ‘‘муса̄ майа̄ бхан̣ита’’нти.

чатӯха̄ка̄рехи ‘‘адит̣т̣хам̣ дит̣т̣хам̣ ме’’ти сампаджа̄намуса̄ бхан̣антасса а̄патти па̄читтийасса – пуббевасса хоти ‘‘муса̄ бхан̣исса’’нти, бхан̣антасса хоти ‘‘муса̄ бхан̣а̄мӣ’’ти, бхан̣итасса хоти ‘‘муса̄ майа̄ бхан̣ита’’нти, винидха̄йа дит̣т̣хим̣.

пан̃чаха̄ка̄рехи ‘‘адит̣т̣хам̣ дит̣т̣хам̣ ме’’ти сампаджа̄намуса̄ бхан̣антасса а̄патти па̄читтийасса – пуббевасса хоти ‘‘муса̄ бхан̣исса’’нти, бхан̣антасса хоти ‘‘муса̄ бхан̣а̄мӣ’’ти, бхан̣итасса хоти ‘‘муса̄ майа̄ бхан̣ита’’нти, винидха̄йа дит̣т̣хим̣, винидха̄йа кхантим̣.

чхаха̄ка̄рехи ‘‘адит̣т̣хам̣ дит̣т̣хам̣ ме’’ти сампаджа̄намуса̄ бхан̣антасса а̄патти па̄читтийасса – пуббевасса хоти ‘‘муса̄ бхан̣исса’’нти, бхан̣антасса хоти ‘‘муса̄ бхан̣а̄мӣ’’ти, бхан̣итасса хоти ‘‘муса̄ майа̄ бхан̣ита’’нти, винидха̄йа дит̣т̣хим̣, винидха̄йа кхантим̣, винидха̄йа ручим̣.

саттаха̄ка̄рехи ‘‘адит̣т̣хам̣ дит̣т̣хам̣ ме’’ти сампаджа̄намуса̄ бхан̣антасса а̄патти па̄читтийасса’’ – пуббевасса хоти ‘‘муса̄ бхан̣исса’’нти, бхан̣антасса хоти ‘‘муса̄ бхан̣а̄мӣ’’ти, бхан̣итасса хоти ‘‘муса̄ майа̄ бхан̣ита’’нти, винидха̄йа дит̣т̣хим̣, винидха̄йа кхантим̣, винидха̄йа ручим̣, винидха̄йа бха̄вам̣.

5. тӣха̄ка̄рехи ‘‘ассутам̣ сутам̣ ме’’ти…пе… амутам̣ мутам̣ мети…пе… авин̃н̃а̄там̣ вин̃н̃а̄там̣ мети сампаджа̄намуса̄ бхан̣антасса а̄патти па̄читтийасса – пуббевасса хоти ‘‘муса̄ бхан̣исса’’нти, бхан̣антасса хоти ‘‘муса̄ бхан̣а̄мӣ’’ти, бхан̣итасса хоти ‘‘муса̄ майа̄ бхан̣ита’’нти.

чатӯха̄ка̄рехи…пе… пан̃чаха̄ка̄рехи…пе… чхаха̄ка̄рехи…пе… саттаха̄ка̄рехи ‘‘авин̃н̃а̄там̣ вин̃н̃а̄там̣ ме’’ти сампаджа̄намуса̄ бхан̣антасса а̄патти па̄читтийасса – пуббевасса хоти ‘‘муса̄ бхан̣исса’’нти, бхан̣антасса хоти ‘‘муса̄ бхан̣а̄мӣ’’ти, бхан̣итасса хоти ‘‘муса̄ майа̄ бхан̣итанти, винидха̄йа дит̣т̣хим̣, винидха̄йа кхантим̣, винидха̄йа ручим̣, винидха̄йа бха̄вам̣.

6. тӣха̄ка̄рехи ‘‘адит̣т̣хам̣ дит̣т̣хан̃ча ме сутан̃ча̄’’ти сампаджа̄намуса̄ бхан̣антасса а̄патти па̄читтийасса…пе… тӣха̄ка̄рехи ‘‘адит̣т̣хам̣ дит̣т̣хан̃ча ме мутан̃ча̄’’ти сампаджа̄намуса̄ бхан̣антасса а̄патти па̄читтийасса…пе… тӣха̄ка̄рехи ‘‘адит̣т̣хам̣ дит̣т̣хан̃ча ме вин̃н̃а̄тан̃ча̄’’ти сампаджа̄намуса̄ бхан̣антасса а̄патти па̄читтийасса …пе… тӣха̄ка̄рехи адит̣т̣хам̣ ‘‘дит̣т̣хан̃ча ме сутан̃ча мутан̃ча̄’’ти…пе… тӣха̄ка̄рехи адит̣т̣хам̣ ‘‘дит̣т̣хан̃ча ме сутан̃ча вин̃н̃а̄тан̃ча̄’’ти…пе… тӣха̄ка̄рехи адит̣т̣хам̣ ‘‘дит̣т̣хан̃ча ме сутан̃ча мутан̃ча вин̃н̃а̄тан̃ча̄’’ти сампаджа̄намуса̄ бхан̣антасса а̄патти па̄читтийасса…пе….

тӣха̄ка̄рехи ассутам̣ ‘‘сутан̃ча ме мутан̃ча̄’’ти…пе… тӣха̄ка̄рехи ассутам̣ ‘‘сутан̃ча ме вин̃н̃а̄тан̃ча̄’’ти…пе… тӣха̄ка̄рехи ассутам̣ ‘‘сутан̃ча ме дит̣т̣хан̃ча̄’’ти сампаджа̄намуса̄ бхан̣антасса а̄патти па̄читтийасса…пе… тӣха̄ка̄рехи ассутам̣ ‘‘сутан̃ча ме мутан̃ча вин̃н̃а̄тан̃ча̄’’ти…пе… тӣха̄ка̄рехи ассутам̣ ‘‘сутан̃ча ме мутан̃ча дит̣т̣хан̃ча̄’’ти…пе… тӣха̄ка̄рехи ассутам̣ ‘‘сутан̃ча ме мутан̃ча вин̃н̃а̄тан̃ча дит̣т̣хан̃ча̄’’ти сампаджа̄намуса̄ бхан̣антасса а̄патти па̄читтийасса…пе….

тӣха̄ка̄рехи амутам̣ ‘‘мутан̃ча ме вин̃н̃а̄тан̃ча̄’’ти…пе… тӣха̄ка̄рехи амутам̣ ‘‘мутан̃ча ме дит̣т̣хан̃ча̄’’ти…пе… тӣха̄ка̄рехи амутам̣ ‘‘мутан̃ча ме сутан̃ча̄’’ти сампаджа̄намуса̄ бхан̣антасса а̄патти па̄читтийасса…пе… тӣха̄ка̄рехи амутам̣ ‘‘мутан̃ча ме вин̃н̃а̄тан̃ча дит̣т̣хан̃ча̄’’ти…пе… тӣха̄ка̄рехи амутам̣ ‘‘мутан̃ча ме вин̃н̃а̄тан̃ча сутан̃ча̄’’ти…пе… тӣха̄ка̄рехи амутам̣ ‘‘мутан̃ча ме вин̃н̃а̄тан̃ча дит̣т̣хан̃ча сутан̃ча̄’’ти сампаджа̄намуса̄ бхан̣антасса а̄патти па̄читтийасса…пе….

тӣха̄ка̄рехи авин̃н̃а̄там̣ ‘‘вин̃н̃а̄тан̃ча ме дит̣т̣хан̃ча̄’’ти…пе… тӣха̄ка̄рехи авин̃н̃а̄там̣ ‘‘вин̃н̃а̄тан̃ча ме сутан̃ча̄’’ти…пе… тӣха̄ка̄рехи авин̃н̃а̄там̣ ‘‘вин̃н̃а̄тан̃ча ме мутан̃ча̄’’ти сампаджа̄намуса̄ бхан̣антасса а̄патти па̄читтийасса…пе… тӣха̄ка̄рехи авин̃н̃а̄там̣ ‘‘вин̃н̃а̄тан̃ча ме дит̣т̣хан̃ча сутан̃ча̄’’ти…пе… тӣха̄ка̄рехи авин̃н̃а̄там̣ ‘‘вин̃н̃а̄тан̃ча ме дит̣т̣хан̃ча мутан̃ча̄’’ти…пе… тӣха̄ка̄рехи авин̃н̃а̄там̣ ‘‘вин̃н̃а̄тан̃ча ме дит̣т̣хан̃ча сутан̃ча мутан̃ча̄’’ти сампаджа̄намуса̄ бхан̣антасса а̄патти па̄читтийасса…пе….

7. тӣха̄ка̄рехи дит̣т̣хам̣ ‘‘адит̣т̣хам̣ ме’’ти…пе… сутам̣ ‘‘ассутам̣ ме’’ти…пе… мутам̣ ‘‘амутам̣ ме’’ти…пе… вин̃н̃а̄там̣ ‘‘авин̃н̃а̄там̣ ме’’ти сампаджа̄намуса̄ бхан̣антасса а̄патти па̄читтийасса…пе….

8. тӣха̄ка̄рехи дит̣т̣хам̣ ‘‘сутам̣ ме’’ти…пе… тӣха̄ка̄рехи дит̣т̣хам̣ ‘‘мутам̣ ме’’ти…пе… тӣха̄ка̄рехи дит̣т̣хам̣ ‘‘вин̃н̃а̄там̣ ме’’ти сампаджа̄намуса̄ бхан̣антасса а̄патти па̄читтийасса…пе… тӣха̄ка̄рехи дит̣т̣хам̣ ‘‘сутан̃ча ме мутан̃ча̄’’ти…пе… тӣха̄ка̄рехи дит̣т̣хам̣ ‘‘сутан̃ча ме вин̃н̃а̄тан̃ча̄’’ти…пе… тӣха̄ка̄рехи дит̣т̣хам̣ ‘‘сутан̃ча ме мутан̃ча вин̃н̃а̄тан̃ча̄’’ти сампаджа̄намуса̄ бхан̣антасса а̄патти па̄читтийасса…пе….

тӣха̄ка̄рехи сутам̣ ‘‘мутам̣ ме’’ти…пе… тӣха̄ка̄рехи сутам̣ ‘‘вин̃н̃а̄там̣ ме’’ти…пе… тӣха̄ка̄рехи сутам̣ ‘‘дит̣т̣хам̣ ме’’ти сампаджа̄намуса̄ бхан̣антасса а̄патти па̄читтийасса…пе… тӣха̄ка̄рехи сутам̣ ‘‘мутан̃ча ме вин̃н̃а̄тан̃ча̄’’ти…пе… тӣха̄ка̄рехи сутам̣ ‘‘мутан̃ча ме дит̣т̣хан̃ча̄’’ти…пе… тӣха̄ка̄рехи сутам̣ ‘‘мутан̃ча ме вин̃н̃а̄тан̃ча дит̣т̣хан̃ча̄’’ти сампаджа̄намуса̄ бхан̣антасса а̄патти па̄читтийасса…пе….

тӣха̄ка̄рехи мутам̣ ‘‘вин̃н̃а̄там̣ ме’’ти…пе… тӣха̄ка̄рехи мутам̣ ‘‘дит̣т̣хам̣ ме’’ти…пе… тӣха̄ка̄рехи мутам̣ ‘‘сутам̣ ме’’ти сампаджа̄намуса̄ бхан̣антасса а̄патти па̄читтийасса…пе… тӣха̄ка̄рехи мутам̣ ‘‘вин̃н̃а̄тан̃ча ме дит̣т̣хан̃ча̄’’ти…пе… тӣха̄ка̄рехи мутам̣ ‘‘вин̃н̃а̄тан̃ча ме сутан̃ча̄’’ти…пе… тӣха̄ка̄рехи мутам̣ ‘‘вин̃н̃а̄тан̃ча ме дит̣т̣хан̃ча сутан̃ча̄’’ти сампаджа̄намуса̄ бхан̣антасса а̄патти па̄читтийасса…пе….

тӣха̄ка̄рехи вин̃н̃а̄там̣ ‘‘дит̣т̣хам̣ ме’’ти…пе… тӣха̄ка̄рехи вин̃н̃а̄там̣ ‘‘сутам̣ ме’’ти …пе… тӣха̄ка̄рехи вин̃н̃а̄там̣ ‘‘мутам̣ ме’’ти сампаджа̄намуса̄ бхан̣антасса а̄патти па̄читтийасса…пе… тӣха̄ка̄рехи вин̃н̃а̄там̣ ‘‘дит̣т̣хан̃ча ме сутан̃ча̄’’ти…пе… тӣха̄ка̄рехи вин̃н̃а̄там̣ ‘‘дит̣т̣хан̃ча ме мутан̃ча̄’’ти…пе… тӣха̄ка̄рехи вин̃н̃а̄там̣ ‘‘дит̣т̣хан̃ча ме сутан̃ча мутан̃ча̄’’ти сампаджа̄намуса̄ бхан̣антасса а̄патти па̄читтийасса…пе….

9. тӣха̄ка̄рехи дит̣т̣хе вематико дит̣т̣хам̣ нокаппети, дит̣т̣хам̣ нассарати, дит̣т̣хам̣ памут̣т̣хо хоти…пе… суте вематико сутам̣ нокаппети, сутам̣ нассарати, сутам̣ памут̣т̣хо хоти…пе… муте вематико мутам̣ нокаппети, мутам̣ нассарати, мутам̣ памут̣т̣хо хоти…пе… вин̃н̃а̄те вематико вин̃н̃а̄там̣ нокаппети, вин̃н̃а̄там̣ нассарати, вин̃н̃а̄там̣ памут̣т̣хо хоти… вин̃н̃а̄тан̃ча ме дит̣т̣хан̃ча̄ти…пе… вин̃н̃а̄там̣ памут̣т̣хо хоти вин̃н̃а̄тан̃ча ме сутан̃ча̄ти…пе… вин̃н̃а̄там̣ памут̣т̣хо хоти; вин̃н̃а̄тан̃ча ме мутан̃ча̄ти…пе… вин̃н̃а̄там̣ памут̣т̣хо хоти; вин̃н̃а̄тан̃ча ме дит̣т̣хан̃ча сутан̃ча̄ти…пе… вин̃н̃а̄там̣ памут̣т̣хо хоти; вин̃н̃а̄тан̃ча ме дит̣т̣хан̃ча мутан̃ча̄ти…пе… вин̃н̃а̄там̣ памут̣т̣хо хоти; вин̃н̃а̄тан̃ча ме дит̣т̣хан̃ча сутан̃ча мутан̃ча̄ти сампаджа̄намуса̄ бхан̣антасса а̄патти па̄читтийасса.

10. чатӯха̄ка̄рехи…пе… пан̃чаха̄ка̄рехи…пе… чхаха̄ка̄рехи…пе… саттаха̄ка̄рехи…пе… вин̃н̃а̄там̣ памут̣т̣хо хоти, вин̃н̃а̄тан̃ча ме дит̣т̣хан̃ча сутан̃ча мутан̃ча̄ти сампаджа̄намуса̄ бхан̣антасса а̄патти па̄читтийасса – пуббевасса хоти ‘‘муса̄ бхан̣исса’’нти, бхан̣антасса хоти ‘‘муса̄ бхан̣а̄мӣ’’ти, бхан̣итасса хоти ‘‘муса̄ майа̄ бхан̣ита’’нти, винидха̄йа дит̣т̣хим̣, винидха̄йа кхантим̣, винидха̄йа ручим̣, винидха̄йа бха̄вам̣.

11. ана̄патти дава̄ бхан̣ати, рава̄ бхан̣ати [дава̄йа бхан̣ати, рава̄йа бхан̣ати (сйа̄.)]. ‘‘дава̄ бхан̣ати на̄ма сахаса̄ бхан̣ати. рава̄ бхан̣ати на̄ма ‘ан̃н̃ам̣ бхан̣исса̄мӣ’ти ан̃н̃ам̣ бхан̣ати’’. умматтакасса, а̄дикаммикасса̄ти.

муса̄ва̄дасиккха̄падам̣ нит̣т̣хитам̣ пат̣хамам̣.