3. наггаваггаван̣н̣ана̄

883-887. наггаваггасса пат̣хамадутийа̄ни утта̄наттха̄нева.

893. татийе висиббетва̄ти дуссиббитам̣ пуна сиббанаттха̄йа висиббетва̄ виджат̣етва̄. ан̃н̃атра чатӯхапан̃ча̄ха̄ти висиббитадивасато пан̃ча дивасе атиккамитва̄. нива̄санапа̄вуран̣ӯпагачӣварата̄, упасампанна̄йа сантаката̄, сиббанаттха̄йа висиббанам̣ ва̄ висибба̄панам̣ ва̄, ан̃н̃атра анун̃н̃а̄така̄ран̣а̄ пан̃ча̄ха̄тиккамо, дхураниккхепоти има̄ни панеттха пан̃ча ан̇га̄ни.

898. чатуттхе пан̃чаннам̣ чӣвара̄нанти тичӣварам̣ удакаса̄т̣ика̄ сан̇каччика̄ти имесам̣ пан̃чаннам̣ чӣвара̄нам̣. пан̃чаннам̣ чӣвара̄нам̣ ан̃н̃атарата̄, пан̃ча̄ха̄тиккамо, анун̃н̃а̄така̄ран̣а̄бха̄во, апариваттананти има̄ни панеттха чатта̄ри ан̇га̄ни.

902. пан̃чамам̣ утта̄наттхамева.

907. чхат̣т̣хе чӣварала̄бханти лабхитаббачӣварам̣. викаппанупагапаччхимата̄, сан̇гхасса парин̣атабха̄во, вина̄ а̄нисам̣садассанена антара̄йакаран̣анти има̄ни панеттха тӣн̣и ан̇га̄ни.

911. саттамам̣ утта̄наттхамева.

916. ат̣т̣хаме кумбхатхӯн̣ам̣ на̄ма кумбхасаддо, тена чаранти кӣл̣анти, там̣ ва̄ сиппам̣ етесанти кумбхатхӯн̣ика̄. тена̄ха ‘‘гхат̣акена кӣл̣анака̄’’ти. дӣгханика̄йат̣т̣хакатха̄йам̣ (дӣ. ни. ат̣т̣ха. 1.13) пана ‘‘кумбхатхӯн̣ам̣ на̄ма чатурассаамбан̣аката̄л̣а’’нти вуттам̣. чатурассаамбан̣аката̄л̣ам̣ на̄ма руккхаса̄раданта̄дӣсу йена кеначи чатурассаамбан̣ам̣ катва̄ чатӯсу пассесу чаммена онандхитва̄ катава̄дитабхан̣д̣ам̣. бимбисакантипи тассева вевачанам̣, там̣ ва̄денти, там̣ ва̄ сиппам̣ етесанти кумбхатхӯн̣ика̄. тена̄ха ‘‘бимбисакава̄дака̄типи вадантӣ’’ти. саман̣ачӣварата̄, т̣хапетва̄ сахадхаммике ма̄та̄питаро ча ан̃н̃есам̣ да̄нам̣, ата̄вака̄ликата̄ти има̄ни панеттха тӣн̣и ан̇га̄ни.

920. навамам̣ утта̄наттхамева.

927. дасаме дхаммикам̣ катхинуддха̄ранти сабба̄сам̣ бхиккхунӣнам̣ ака̄лачӣварам̣ да̄тука̄мена упа̄сакена йаттако аттха̄рамӯлако а̄нисам̣со, тато адхикам̣ ва̄ самакам̣ ва̄ датва̄ йа̄читакена самаггена бхиккхунисан̇гхена йам̣ катхинам̣ н̃аттидутийена каммена антара̄ уддхарӣйати, тасса со уддха̄ро дхаммикоти вуччати, еварӯпам̣ катхинуддха̄ранти аттхо. сесам̣ утта̄наттхамева.

наггаваггаван̣н̣ана̄ нит̣т̣хита̄.

932. туват̣т̣авагге саббам̣ утта̄намева.