5. пан̃чамасан̇гха̄дисесасиккха̄падаван̣н̣ана̄

701. пан̃чаме етам̣ на вуттанти ‘‘бхиккхунийа̄ авассутабха̄во дат̣т̣хаббо’’ти етам̣ нийаманам̣ на вуттам̣. танти там̣ нийаметва̄ авачанам̣. па̄л̣ийа̄ саметӣти ‘‘екато авассуте’’ти ависесетва̄ вуттапа̄л̣ийа̄ ‘‘анавассутоти джа̄нантӣ пат̣игган̣ха̄тӣ’’ти има̄йа ча па̄л̣ийа̄ самети. йади хи пуггаласса авассутабха̄во наппама̄н̣ам̣, ким̣ ‘‘анавассутоти джа̄нантӣ’’ти имина̄ вачанена, ‘‘ана̄патти убхатоанавассута̄ хонти, анавассута̄ пат̣игган̣ха̄тӣ’’ти еттакамева ваттаббам̣ сийа̄. ‘‘убхатоанавассута̄ хонти, анавассутоти джа̄нантӣ пат̣игган̣ха̄тӣ’’ти имасса ча ана̄паттива̄расса айаматтхо. убхо че анавассута̄, саббатха̄пи ана̄патти. атха бхиккхунӣ анавассута̄ сама̄на̄ авассутампи ‘‘анавассуто’’ти сан̃н̃а̄йа тасса хаттхато пат̣игган̣ха̄ти, евампи ана̄патти. атха сайам̣ анавассута̄пи ан̃н̃ам̣ анавассутам̣ ва̄ авассутам̣ ва̄ ‘‘авассуто’’ти джа̄на̄ти, дуккат̣амева. вуттан̃хетам̣ анантарасиккха̄паде ‘‘кисса твам̣ аййе на пат̣игган̣ха̄сӣти. авассута̄ аййети. твам̣ пана аййе авассута̄ти. на̄хам̣ аййе авассута̄’’ти. сесаметтха утта̄намева. удакадантапонато ан̃н̃ам̣ аджджхохаран̣ӣйам̣, убхатоавассутата̄, сахаттха̄ гахан̣ам̣, аджджхохаран̣анти има̄ни панеттха чатта̄ри ан̇га̄ни.

пан̃чамасан̇гха̄дисесасиккха̄падаван̣н̣ана̄ нит̣т̣хита̄.