11. вала̄хакасам̣йуттаван̣н̣ана̄

550-606. локам̣ ва̄лента̄ сам̣варанта̄ чха̄дента̄ аханти парийесантӣти вала̄ха̄, девапутта̄. тесам̣ самӯхо вала̄хакадевака̄йоти а̄ха ‘‘вала̄хакака̄йика̄’’тиа̄ди. сӣтакаран̣авала̄хака̄ти сӣтахаран̣авала̄хака̄. сесападесӯти ун̣хавала̄хака̄дипадесу. есева найоти ‘‘ун̣хакаран̣авала̄хака̄’’тиа̄дина̄ аттхо ведитаббо. читтат̣т̣хапананти ‘‘сӣтам̣ хотӯ’’ти евам̣ читтасса уппа̄данам̣. васса̄нети вассака̄ле. утусамут̣т̣ха̄намева̄ти па̄катикасӣтамева̄ти аттхо. ун̣хепӣти ун̣хака̄ле. аббхаман̣д̣апоти ман̣д̣апасадисааббхапат̣алавита̄нама̄ха. аббхам̣ уппаджджатӣти тахам̣ тахам̣ пат̣алам̣ ут̣т̣хахати. аббхейева̄ти аббхака̄ле ева, васса̄нети аттхо. атиаббханти сатапат̣аласахассапат̣алам̣ хутва̄ аббхут̣т̣ха̄нам̣. читтавеса̄кхама̄сесӯти васантака̄лам̣ сандха̄йа̄ха. тада̄ хи виддхо вигатавала̄хако дево бхавитум̣ йутто. уттарадаккхин̣а̄дӣти а̄ди-саддена паччхимава̄та̄дим̣ сан̇ган̣ха̄ти. пакатива̄тоти пакатийа̄ сабха̄вена ва̄йанакава̄то. там̣ утусамут̣т̣ха̄намева̄ти а̄ха̄рӯпаджӣвӣнам̣ сатта̄нам̣ са̄дха̄ран̣акаммӯпаниссайаутусамут̣т̣ха̄намева. еса найо утусамут̣т̣ха̄насӣтун̣хава̄тесупи. тампи хи а̄ха̄рӯпаджӣвӣнам̣ сатта̄нам̣ са̄дха̄ран̣акаммӯпаниссайамева̄ти.

гӣтанти мегхагӣтам̣. саччакирийа̄йа̄ти та̄диса̄нам̣ пурисависеса̄нам̣ сачча̄дхит̣т̣ха̄нена. иддхибалена̄ти иддхиманта̄нам̣ иддхиа̄нубха̄вена. вина̄самегхена̄ти каппавина̄сакамегхена. ан̃н̃енапи кан̣хапа̄пикасатта̄нам̣ па̄пакаммапаччайа̄ уппаннавина̄самегхена вут̣т̣хена со со десо винассатева.

вала̄хакасам̣йуттаван̣н̣ана̄ нит̣т̣хита̄.