5. пакин̣н̣аканиддесо

53. сан̇гхикам̣ гарубхан̣д̣ам̣ йо, дети ан̃н̃асса иссаро;

тхуллаччайам̣ йатха̄ваттхум̣, тхеййа̄ па̄ра̄джика̄дипи.

54. куса̄димайачӣра̄ни, камбалам̣ кесава̄ладжам̣;

самайам̣ вина̄ дха̄райато, лӯкапаккха̄джинаккхипам̣.

55. саттхакамме ваттхикамме, сам̣ нимиттан̃ча чхиндато;

тхуллаччайам̣ манусса̄нам̣, мам̣са̄дибходжанепи ва̄.

56. кадалеракаккадусса̄ни, поттхакам̣ саббанӣлакам̣;

саббапӣта̄дикан̃ча̄пи, дха̄райантасса дуккат̣ам̣.

57. хаттхиссурагасон̣а̄нам̣, сӣхабйаггхаччхадӣпинам̣;

тараччхасса ча мам̣са̄дим̣, уддиссакатакампи ча.

58. ана̄пуччхитамам̣сан̃ча, бхун̃джато дуккат̣ам̣ сийа̄;

йа̄та̄нупуббам̣ хитва̄на, дакатиттха̄дикам̣ вадже.

59. сахаса̄ вуббхаджитва̄на, пависе никкхамеййа ва̄;

ваччапасса̄вакут̣икам̣, вина̄ укка̄сикам̣ висе.

60. ниттхунанто каре ваччам̣, дантакат̣т̣хан̃ча кха̄дайам̣;

ваччапасса̄вадон̣ӣнам̣, бахи вачча̄дикам̣ каре.

61. кхарена ча̄валекхеййа, кат̣т̣хам̣ па̄теййа кӯпаке;

ӯхатан̃ча на дховеййа, укла̄пан̃ча на содхайе.

62. дакакиччам̣ каронтасса, катва̄ ‘‘чапучапӯ’’ти ча;

анаджджхит̣т̣хова тхерена, па̄тимоккхампи уддисе.

63. ана̄пуччха̄йа пан̃хасса, катхане виссаджджанепи ча;

саджджха̄йакаран̣е дӣпа-джа̄лане виджджха̄панепи ча.

64. ва̄тапа̄накава̄т̣а̄ни, вивареййа тхакеййа ва̄;

вандана̄дим̣ каре нагго, гаманам̣ бходжана̄дикам̣.

65. парикаммам̣ каре ка̄ре, типат̣иччханнакам̣ вина̄;

ка̄йам̣ наха̄йам̣ гхам̣сеййа, кут̣т̣е тхамбхе тарумхи ва̄.

66. курувиндакасуттена, ан̃н̃аман̃н̃асса ка̄йато;

агила̄но баха̄ра̄ме, чареййа саупа̄хано.

67. упа̄ханам̣ йо дха̄рети, саббанӣла̄дикампи ча;

нимиттам̣ иттхийа̄ ратто, мукхам̣ ва̄ бхиккхада̄йийа̄.

68. уджджха̄насан̃н̃ӣ ан̃н̃асса, паттам̣ ва̄ аттано мукхам̣;

а̄да̄са̄димхи пассеййа, учча̄санамаха̄сане.

69. нисаджджа̄дим̣ каронтасса, дуккат̣ам̣ ванданепи ча;

уккхитта̄нупасампанна-на̄на̄сам̣ва̄сака̄динам̣.

70. екато пан̣д̣акиттхӣхи, убхатобйан̃джанена ва̄;

дӣгха̄сане нисӣдеййа, адӣгхе а̄сане пана.

71. асама̄на̄саникена, ман̃чапӣт̣хе сайеййа ва̄;

куласан̇гахаттхам̣ дадато, пхалапуппха̄дикампи ча.

72. гантхима̄дим̣ каре ка̄ре, джинава̄ритапаччайе;

парибхун̃джеййа абйатто, анисса̄йа васеййа ва̄.

73. анун̃н̃а̄техи ан̃н̃асса, бхесаджджам̣ ва̄ каре ваде;

каре са̄паттико бхиккху, упосатхаппава̄ран̣ам̣.

74. два̄рабандха̄дике т̣ха̄не, париваттакава̄т̣акам̣;

апидха̄йа вина̄бхогам̣, нийогам̣ ва̄ сайе дива̄.

75. дхан̃н̃иттхирӯпаратанам̣, а̄вудхиттхипаса̄дханам̣;

тӯрийабхан̣д̣ам̣ пхалам̣ руккхе, пуббан̣н̣а̄дин̃ча а̄масе.

76. саситтходакателехи, пхан̣ахаттхапхан̣ехи ва̄;

кесамосан̣т̣ханекасмим̣, бха̄джане бходжанепи ча.

77. екаттхаран̣апа̄вуран̣а̄, сайеййум̣ двекаман̃чаке;

дантакат̣т̣хан̃ча кха̄деййа, адхикӯнам̣ пама̄н̣ато.

78. йоджети ва̄ йоджа̄пети, наччам̣ гӣтан̃ча ва̄дитам̣;

дассанам̣ саванам̣ тесам̣, каронтасса ча дуккат̣ам̣.

79. вӣха̄диропиме ча̄пи, бахипа̄ка̄ракут̣т̣аке;

вачча̄дичхад̣д̣ана̄димхи, дӣгхакеса̄дидха̄ран̣е.

80. накхамат̣т̣хакаран̣а̄димхи, самба̄дхе ломаха̄ран̣е;

парикаммакатам̣ бхӯмим̣, аккаме саупа̄хано.

81. адхотааллапа̄дехи, сан̇гхикам̣ ман̃чапӣт̣хакам̣;

парикаммакатам̣ бхиттим̣, а̄масантасса дуккат̣ам̣.

82. сан̇гха̄т̣ийа̄пи паллаттхе, дуппарибхун̃джеййа чӣварам̣;

ака̄йабандхано га̄мам̣, вадже катва̄на ваччакам̣.

83. на̄чамеййа даке санте, сама̄деййа акаппийе;

десана̄рочана̄димхи, сабха̄га̄паттийа̄пи ча.

84. на васе вассам̣ висам̣ва̄де, суддхачитте пат̣иссавам̣;

вассам̣ васитва̄ гамане, ананун̃н̃а̄такиччато.

85. вина̄падам̣ таруссуддхам̣, порисамха̄бхирӯхан̣е;

апарисса̄ваноддха̄нам̣, вадже там̣ йа̄чато на де.

86. аттано гха̄тане иттхи-рӯпа̄дим̣ ка̄райеййа ва̄;

хитва̄ ма̄ла̄дикам̣ читтам̣, джа̄така̄дим̣ сайам̣ каре.

87. бхун̃джантамут̣т̣хапе тасса, са̄ла̄дӣсу нисӣдато;

вуд̣д̣ха̄нам̣ пана ока̄сам̣, адатва̄ ва̄пи дуккат̣ам̣.

88. йа̄на̄димабхирӯхеййа, каллако ратанаттайам̣;

а̄раббха ваде даван̃н̃а-париса̄йопала̄лане.

89. ка̄йа̄дим̣ виваритва̄на, бхиккхунӣнам̣ на дассайе;

ва̄че лока̄йатам̣ палитам̣, ган̣хеййа ган̣ха̄пеййа ва̄.

90. йаттха каттхачи пел̣а̄йам̣, бхун̃джато паттахаттхако;

ва̄тапа̄накава̄т̣ам̣ ва̄, пан̣а̄ме содакампи ча.

91. ун̣хеййа пат̣иса̄меййа, атиун̣хеййа водакам̣;

т̣хапеййа бхӯмийам̣ паттам̣, ан̇ке ва̄ ман̃чапӣт̣хаке.

92. мид̣д̣ханте парибхан̣д̣анте, па̄де чхатте т̣хапети ва̄;

чалака̄дим̣ т̣хапе паттам̣, патте ва̄ хаттхадховане.

93. паттена нӣхарантасса, уччхит̣т̣хамудакампи ча;

акаппийампи паттам̣ ва̄, парибхун̃джеййа дуккат̣ам̣.

94. ваде ‘‘джӣва̄’’ти кхипите, на сиккхати ана̄даро;

париман̣д̣алака̄димхи, секхийе дуккат̣ам̣ сийа̄.

95. йо бхан̣д̣ага̄ре пайутова бхан̣д̣акам̣,

ма̄тӯна па̄читтийамасса гопайе;

дава̄йа хӣненапи джа̄тиа̄дина̄,

вадеййа дуббха̄ситамуттамампи йоти.