7. пава̄ран̣а̄ниддесо

пава̄ран̣а̄ти –

73. йенӣрийа̄патхена̄йам̣, бхун̃джама̄но пава̄рито;

тато ан̃н̃ена бхун̃джеййа, па̄читтинатириттакам̣.

74. асанам̣ бходжанан̃чева, абхиха̄ро самӣпата̄;

ка̄йава̄ча̄пат̣иккхепо, пан̃чаан̇га̄ пава̄ран̣а̄.

75. одано сатту кумма̄со, маччхо мам̣сан̃ча бходжанам̣;

са̄ли вӣхи йаво кан̇гу, кудрӯсаварагодхума̄;

саттаннамесам̣ дхан̃н̃а̄нам̣, одано бходжджайа̄гу ча.

76. са̄ма̄ка̄дитин̣ам̣ кудрӯсаке варакачорако;

вараке са̄лийан̃чева, нӣва̄ро сан̇гахам̣ гато.

77. бхат̣т̣хадхан̃н̃амайо сатту, кумма̄со йавасамбхаво;

мам̣со ча каппийо вутто, маччхо удакасамбхаво.

78. бхун̃джанто бходжанам̣ каппа-макаппам̣ ва̄ ниседхайам̣;

пава̄реййа̄бхихат̣ам̣ каппам̣, танна̄мена иманти ва̄.

79. ла̄джа̄ там̣саттубхатта̄ни, горасо суддхакхаджджако;

тан̣д̣ула̄ бхат̣т̣хапит̣т̣хан̃ча, путхука̄ вел̣уа̄динам̣.

80. бхаттам̣ вутта̄васеса̄нам̣, расайа̄гу расопи ча;

суддхайа̄гупхала̄дӣни, на джаненти пава̄ран̣ам̣.

81. пава̄ритена вут̣т̣ха̄йа, абхуттена ча бходжанам̣;

атириттам̣ на ка̄таббам̣, йена йам̣ ва̄ пуре катам̣.

82. каппийам̣ гахитан̃чеву-чча̄ритам̣ хаттхапа̄сагам̣;

атириттам̣ каронтевам̣, ‘‘аламета’’нти бха̄сату.

83. на каренупасампанна-хаттхагам̣ песайитва̄пи;

ка̄ретум̣ лаббхате саббо, бхун̃джитум̣ тамака̄ракоти.