39. вассӯпана̄йиканиддесо

вассӯпана̄йика̄ чева̄ти –

309. пуримика̄ паччхимика̄, дуве вассӯпана̄йика̄;

таттха̄лайапаригга̄хо, вачӣбхедо ча едисо.

310. ‘‘имасмим̣ виха̄ре имам̣, тема̄сам̣ вассам̣ упеми;

идха вассам̣ упемӣ’’ти, читтуппа̄деттха а̄лайо.

311. нопетука̄мо а̄ва̄сам̣, тадахӯтиккамеййа ва̄;

бхавеййа дуккат̣а̄патти, джа̄нам̣ ва̄нупагаччхато.

312. дутийам̣ упагаччхеййа, чхиннавассонупа̄гато;

на паккамеййа тема̄сам̣, аваситва̄на ча̄рикам̣.

313. ма̄та̄питӯнаматтха̄йа, пан̃чаннам̣ сахадхамминам̣;

гила̄натадупат̣т̣ха̄ка-бхаттамесиссамосадхам̣.

314. пуччхисса̄ми упат̣т̣хиссам̣, гантва̄набхиратам̣ ахам̣;

вӯпака̄сиссам̣ куккуччам̣, дит̣т̣хим̣ гарукама̄дикам̣.

315. кариссам̣ ва̄пи ка̄рессам̣, виноданам̣ вивечанам̣;

вут̣т̣ха̄нам̣ ва̄пи уссуккам̣, гантумиччевама̄дина̄;

лаббхам̣ сатта̄хакиччена, пахита̄пахитепи ва̄.

316. сан̇гхакамме вадже дхамма-ссаванаттхам̣ нимантито;

гарӯхи пахито ва̄пи, гарӯнам̣ ва̄пи пасситум̣.

317. на бхан̣д̣адховануддеса-н̃а̄тупат̣т̣ха̄кадассане;

лаббхам̣ на па̄пун̣еййадждже-ва̄гамиссантудӯраго.

318. сесан̃а̄тӣхи пахите, бхиккхунисситакена ча;

упа̄сакопа̄сика̄хи, ниддиситва̄ва песите.

319. вассаччхеде ана̄патти, антара̄йе сататтано;

сан̇гхаса̄маггийа̄ ва̄ но, чхиннавассо пава̄райе.

320. аджджхока̄се ча руккхасса, сусире вит̣апепи ва̄;

чхавакут̣ичхаттача̄т̣ӣ-сӯпагантум̣ на ват̣т̣ати.

321. асена̄саникена̄пи, упагантум̣ на лаббхати;

пава̄ретун̃ча лаббхати, на̄ва̄саттхаваджӯпаготи.