15. упаджджха̄чарийаваттаниддесо

упаджджха̄чарийаватта̄нӣти –

145. нисса̄йупаджджха̄чарийе, васама̄но супесало;

дантакат̣т̣ха̄санам̣ тойам̣, йа̄гум̣ ка̄ле даде сада̄.

146. патте ваттам̣ чаре га̄ма-ппавесе гамана̄гаме;

а̄сане па̄дапӣт̣хе ча, катхалопа̄ханачӣваре.

147. парибходжанӣйапа̄нӣйа-ваччаппасса̄ват̣ха̄нису;

виха̄расодхане ваттам̣, пуна пан̃н̃а̄пане татха̄.

148. на паппхот̣еййа содхенто, пат̣ива̄те ча сан̇ган̣е;

виха̄рам̣ бхиккху па̄нӣйа-са̄манта̄ сайана̄санам̣.

149. нха̄не нха̄тасса ка̄таббе, ран̇гапа̄ке ча дховане;

сиббане чӣваре тхеве, раджанто на вадже т̣хите.

150. екаччасса ана̄пуччха̄, паттам̣ ва̄ чӣвара̄ни ва̄;

на дадеййа на ган̣хеййа, париккха̄ран̃ча кин̃чанам̣.

151. екаччам̣ паччхато ка̄тум̣, гантум̣ ва̄ тасса паччхато;

пин̣д̣апа̄тан̃ча ниннетум̣, нӣхара̄петуматтано.

152. киччайам̣ парикаммам̣ ва̄, кесаччхедан̃ча аттано;

ка̄ра̄петум̣ ва ка̄тум̣ ва̄, ана̄пуччха̄ на ват̣т̣ати.

153. га̄мам̣ суса̄нам̣ ниссӣмам̣, дисам̣ ва̄ гантумиччхато;

аттано киччайам̣ ва̄пи, ана̄пуччха̄ на ват̣т̣ати.

154. уппаннам̣ аратим̣ дит̣т̣хим̣, куккуччам̣ ва̄ винодайе;

кареййа ва̄пи уссуккам̣, сан̇гха̄йаттесу каммасу.

155. гила̄несу упат̣т̣хеййа, вут̣т̣ха̄нам̣ несама̄гаме;

ваттабхедена саббаттха, ана̄дарена дуккат̣анти.