4. ан̃н̃авин̃н̃а̄панасиккха̄падаван̣н̣ана̄

чатуттхе вин̃н̃а̄петва̄ти джа̄на̄петва̄, ‘‘идам̣ на̄ма а̄хара̄’’ти йа̄читва̄ ва̄. ан̃н̃ам̣ вин̃н̃а̄пеййа̄ти йам̣ пуббе ‘‘кинте, аййе, апха̄су, ким̣ а̄харийатӯ’’ти вутта̄йа вин̃н̃а̄питам̣, там̣ пат̣иккхипитва̄ тан̃чева ан̃н̃ан̃ча гахетука̄ма̄ тато ан̃н̃ам̣ вин̃н̃а̄пеййа, тасса̄ вин̃н̃аттийа̄ дуккат̣ам̣, пат̣ила̄бхена ниссаггийам̣ хоти.

са̄ваттхийам̣ тхулланандам̣ а̄раббха ан̃н̃ам̣ вин̃н̃а̄петва̄ ан̃н̃ам̣ вин̃н̃а̄панаваттхусмим̣ пан̃н̃аттам̣, тикапа̄читтийам̣, анан̃н̃е двикадуккат̣ам̣. анан̃н̃е анан̃н̃асан̃н̃а̄йа пана, тасмим̣ аппахонте пуна тан̃н̃ева, ан̃н̃енапи аттхе сати тена саддхим̣ ан̃н̃ан̃ча, йан̃ча вин̃н̃аттам̣, тато че ан̃н̃ам̣ самаггхатарам̣ хоти, имам̣ а̄нисам̣сам̣ дассетва̄ суддхам̣ ан̃н̃амева ча вин̃н̃а̄пентийа̄, умматтика̄дӣнан̃ча ана̄патти. лесена гахетука̄мата̄, ан̃н̃асса вин̃н̃а̄панам̣, пат̣ила̄бхоти има̄неттха тӣн̣и ан̇га̄ни. самут̣т̣ха̄на̄дӣни сан̃чариттасадиса̄нӣти.

ан̃н̃авин̃н̃а̄панасиккха̄падаван̣н̣ана̄ нит̣т̣хита̄.