2. ака̄лачӣварасиккха̄падаван̣н̣ана̄

дутийе ака̄лачӣваранти аттхате катхине катхинама̄сехи, анаттхате чӣварама̄сато ан̃н̃асмим̣ ка̄ле уппаннам̣, йам̣ ва̄ пана ка̄лепи а̄дисса диннам̣. а̄дисса диннам̣ на̄ма ‘‘сампатта̄ бха̄джентӯ’’ти ватва̄ ва̄, ‘‘идам̣ ган̣асса, идам̣ тумха̄кам̣ даммӣ’’ти ватва̄ ва̄, да̄тука̄мата̄йа па̄дамӯле т̣хапетва̄ ва̄ диннам̣. иччетам̣ ака̄лачӣварам̣ ‘‘ка̄лачӣвара’’нти адхит̣т̣хахитва̄ бха̄джа̄пентийа̄ пайоге дуккат̣ам̣, йам̣ аттана̄ ладдхам̣, там̣ ниссаггийам̣ хоти. ниссат̣т̣хам̣ пат̣илабхитва̄пи йатха̄да̄нейева упанетаббам̣, ан̃н̃асмимпи еварӯпе сиккха̄паде есева найо.

са̄ваттхийам̣ тхулланандам̣ а̄раббха ака̄лачӣварам̣ ‘‘ка̄лачӣвара’’нти адхит̣т̣хахитва̄ бха̄джанаваттхусмим̣ пан̃н̃аттам̣, ака̄лачӣваре вематика̄йа, ка̄лачӣваре ака̄лачӣварасан̃н̃а̄йа чева вематика̄йа ча дуккат̣ам̣. убхосу ка̄лачӣварасан̃н̃а̄йа, умматтика̄дӣнан̃ча ана̄патти. ака̄лачӣварата̄, татха̄сан̃н̃ита̄, ‘‘ка̄лачӣвара’’нти адхит̣т̣ха̄йа лесена бха̄джа̄панам̣, пат̣ила̄бхоти има̄неттха чатта̄ри ан̇га̄ни. самут̣т̣ха̄на̄дӣни адинна̄да̄насадиса̄нӣти.

ака̄лачӣварасиккха̄падаван̣н̣ана̄ нит̣т̣хита̄.