1-4. пат̣хамаадхаммасутта̄диван̣н̣ана̄

113-6. дутийасса пат̣хамадутийа̄ни утта̄наттха̄ни. татийе джа̄нам̣ джа̄на̄тӣти саббан̃н̃утан̃н̃а̄н̣ена джа̄нитаббам̣ саббам̣ джа̄на̄ти ева. на хи падесан̃а̄н̣е т̣хито джа̄нитаббам̣ саббам̣ джа̄на̄ти. уккат̣т̣ханиддесена хи ависесаггахан̣ена ча ‘‘джа̄на’’нти имина̄ ниравасесам̣ н̃еййаджа̄там̣ париггайхатӣти таббисайа̄йа джа̄нанакирийа̄йа саббан̃н̃утан̃н̃а̄н̣амева каран̣ам̣ бхавитум̣ йуттам̣, пакаран̣авасена ‘‘бхагава̄’’ти саддантарасаннидха̄нена ча айаматтхо вибха̄ветаббо. пасситаббамева пассатӣти диббачаккхупан̃н̃а̄чаккхудхаммачаккхубуддхачаккхусамантачаккхусан̇кха̄техи н̃а̄н̣ачаккхӯхи пасситаббам̣ пассати ева. атха ва̄ джа̄нам̣ джа̄на̄тӣти йатха̄ ан̃н̃е савипалла̄са̄ ка̄марӯпапарин̃н̃а̄ва̄дино джа̄нанта̄пи випалла̄савасена джа̄нанти, на евам̣ бхагава̄. бхагава̄ пана пахӣнавипалла̄сатта̄ джа̄нанто джа̄на̄ти ева, дит̣т̣хидассанасса абха̄ва̄ пассанто пассатийева̄ти аттхо. чаккху вийа бхӯтоти дассанапарин̣а̄йакат̣т̣хена чаккху вийа бхӯто. йатха̄ хи чаккху сатта̄нам̣ дассанаттхам̣ парин̣ети са̄дхети, евам̣ локасса йа̄тха̄вадассанаса̄дханатопи дассанакиччапарин̣а̄йакат̣т̣хена чаккху вийа бхӯто, пан̃н̃а̄чаккхумайатта̄ ва̄ сайамбхун̃а̄н̣ена пан̃н̃а̄чаккхум̣ бхӯто паттоти ва̄ чаккхубхӯто.

н̃а̄н̣асабха̄воти видитакаран̣ат̣т̣хена н̃а̄н̣асабха̄во. авипарӣтасабха̄ват̣т̣хена парийаттидхаммаппаваттанато ва̄ хадайена чинтетва̄ ва̄ча̄йа ниччха̄ритадхаммамайоти дхаммабхӯто. тена̄ха ‘‘дхаммасабха̄во’’ти. дхамма̄ ва̄ бодхипаккхийа̄ техи уппаннатта̄ локасса ча тадуппа̄данато, анан̃н̃аса̄дха̄ран̣ам̣ ва̄ дхаммам̣ патто адхигатоти дхаммабхӯто. сет̣т̣хат̣т̣хена брахмабхӯтоти а̄ха ‘‘сет̣т̣хасабха̄во’’ти. атха ва̄ брахма̄ вуччати магго, тена уппаннатта̄ локасса ча тадуппа̄данато, тан̃ча сайамбхун̃а̄н̣ена паттоти брахмабхӯто. чатусаччадхаммам̣ вадатӣти ватта̄. чирам̣ саччаппат̣иведхам̣ паваттенто вадатӣти паватта̄. аттхам̣ нӣхаритва̄ти дуккха̄диаттхам̣ таттха̄пи пӣл̣ана̄диаттхам̣ уддхаритва̄. параматтхам̣ ва̄ нибба̄нам̣ па̄пайита̄ ниннета̄. амата̄дхигамапат̣ипаттидесана̄йа аматасаччхикирийам̣ саттесу уппа̄денто аматам̣ дада̄тӣти аматасса да̄та̄. бодхипаккхийадхамма̄нам̣ тада̄йаттабха̄вато дхаммаса̄мӣ. чатуттхе наттхи ваттаббам̣.

пат̣хамаадхаммасутта̄диван̣н̣ана̄ нит̣т̣хита̄.