2. пакин̣н̣акакатха̄

46. кусала̄некавӣсева, два̄даса̄кусала̄ни ча;

чхаттим̣сати випа̄ка̄ни, крийа̄читта̄ни вӣсати.

47. ка̄месу чатупан̃н̃а̄са, рӯпесу даса пан̃ча ча;

два̄даса̄руппачитта̄ни, ат̣т̣ха̄нуттарама̄наса̄.

48. ка̄ме тевӣса па̄ка̄ни, пун̃н̃а̄пун̃н̃а̄ни вӣсати;

ека̄даса крийа̄ чети, чатупан̃н̃а̄са саббатха̄.

49. пун̃н̃апа̄какрийа̄бхеда̄, тайо рӯпесу пан̃чака̄;

а̄руппети чатукка̄ни, саттавӣса махаггата̄.

50. чатумаггапхала̄нам̣ ту, васенат̣т̣хапи джха̄нато;

дасобхайампи миссетва̄, та̄лӣса̄нуттара̄ сийум̣.

51. пун̃н̃апа̄какрийа̄па̄па̄, санти ка̄ме махаггате;

па̄пам̣ наттхи крийа̄па̄па̄, на виджджанти ануттаре.

52. па̄па̄хетукамутта̄ни, анаваджджа̄ни саббатха̄;

екӯнасат̣т̣хи читта̄ни, пун̃н̃апа̄какрийа̄васа̄.

53. каммачитта̄ни теттим̣са, пун̃н̃а̄пун̃н̃а̄ни саббатха̄;

чхаттим̣са тесам̣ па̄ка̄ни, крийа̄ вӣса на чобхайам̣.

54. чаккхувин̃н̃а̄н̣адха̄та̄ди, пан̃чавин̃н̃а̄н̣ана̄мака̄;

пан̃чадва̄ра̄ваджджанан̃ча, дувидхам̣ сампат̣иччханам̣.

55. манодха̄туттайам̣ на̄ма, чхасаттати тато паре;

мановин̃н̃а̄н̣адха̄тӯти, саттадха̄ дха̄тубхедато.

56. мановин̃н̃а̄н̣адха̄тун̃ча, манодха̄туттайам̣ татха̄;

катва̄ мановин̃н̃а̄н̣анти, чха вин̃н̃а̄н̣а̄ пакиттита̄.

57. а̄ваджджанам̣ дассанан̃ча, саванам̣ гха̄йанам̣ татха̄;

са̄йанам̣ пхусанан̃чева, сампат̣иччханатӣран̣ам̣.

58. вот̣т̣хаббанан̃ча джаванам̣, тада̄рамман̣ана̄макам̣;

бхаван̇гам̣ чути сандхӣти, читтам̣ чуддасадха̄ т̣хитам̣.

59. а̄ваджджана̄дайо две две, йуга̄ сатта йатха̄ккамам̣;

тӣн̣и тӣран̣ачитта̄ни, екам̣ вот̣т̣хаббанам̣ матам̣.

60. кусала̄кусала̄ саббе, пхала̄ ча̄ваджджанам̣ вина̄;

крийа̄ ча пан̃чапан̃н̃а̄са, джавананти павуччаре.

61. сантӣран̣амаха̄па̄ка̄, тада̄рамман̣ана̄мака̄;

ека̄даса паваттанти, джавана̄рамман̣е йато.

62. махаггатамаха̄па̄ка̄, упеккха̄тӣран̣адвайам̣;

чутисандхибхаван̇га̄ни, читта̄некӯнавӣсати.

63. джавана̄ваджджана̄дӣни, вот̣т̣хаббасукхатӣран̣а̄;

махаггатамаха̄па̄ка̄, упеккха̄тӣран̣а̄ти ча.

64. ат̣т̣хасат̣т̣хи татха̄ две ча, нават̣т̣ха две йатха̄ккамам̣;

екадвитичатуппан̃чакиччат̣т̣ха̄на̄ни ниддисе.

65. рӯпапа̄ка̄ маха̄па̄ка̄, манодха̄ту ча тӣран̣ам̣;

рӯпам̣ джаненти екӯнавӣсати нетарадвайам̣.

66. абхин̃н̃а̄ваджджита̄ саббе, аппана̄джавана̄ пана;

рӯпам̣ джаненти чхаббӣса, пан̣а̄ментирийа̄патхам̣.

67. абхин̃н̃а̄двайавот̣т̣хаббапариттаджавана̄ пана;

дваттим̣са рӯпавин̃н̃аттиирийа̄патхаса̄дхака̄.

68. пан̃чавин̃н̃а̄н̣ама̄руппа-випа̄ка̄ саббасандхийо;

чути кхӣн̣а̄савассети, сол̣асете на кин̃чипи.

69. рӯпам̣ джаненти читта̄ни, саттасаттати саббатха̄;

ат̣т̣хапан̃н̃а̄са читта̄ни, пан̣а̄ментирийа̄патхам̣.

70. дваттим̣са чатувин̃н̃аттим̣, самут̣т̣ха̄пенти ма̄наса̄;

на джаненти тассампекам̣, йатха̄вутта̄ни сол̣аса.

71. соманассасахагата̄, париттаджавана̄ пана;

хасанампи джанентӣти, чатукичча̄ни тераса.

72. саббампи пан̃чавока̄ре, киччаметам̣ пака̄ситам̣;

а̄руппе пана саббампи, рӯпа̄йаттам̣ на виджджати.

73. асан̃н̃ӣнам̣ ту сабба̄ни, читта̄нева на лаббхаре;

рӯпаккхандхова тесам̣ ту, аттабха̄воти вуччати.

74. па̄н̣а̄типа̄татхеййа̄дивасенопачитам̣ пана;

уддхаччарахита̄пун̃н̃ам̣, чатура̄па̄йабхӯмийам̣.

75. датва̄ сандхим̣ паватте ту, пан̃чавока̄рабхӯмийам̣;

уддхаччасахитан̃ча̄пи, сатта па̄ка̄ни паччати.

76. да̄насӣла̄дибхедена, паваттам̣ кусалам̣ пана;

ка̄ме ма̄насамуккат̣т̣хам̣, чатуккам̣ ту тихетукам̣.

77. датва̄ тихетукам̣ сандхим̣, ка̄ме сугатийам̣ пана;

сол̣аса пун̃н̃апа̄ка̄ни, паватте ту випаччати.

78. тихетукомакам̣ пун̃н̃ам̣, уккат̣т̣хан̃ча двихетукам̣;

датва̄ двихетукам̣ сандхим̣, ка̄ме сугатийам̣ татха̄.

79. паватте пана н̃а̄н̣ена, сампайуттам̣ виваджджийа;

два̄даса пун̃н̃апа̄ка̄ни, випаччати йатха̄рахам̣.

80. двихетукомакам̣ пун̃н̃ам̣, пат̣исандхимахетукам̣;

дети ма̄нусаке чева, винипа̄та̄суре татха̄.

81. ат̣т̣ха̄хетукапа̄ка̄ни, паватте ту випаччаре;

чатта̄рипи чатукка̄ни, пан̃чавока̄рабхӯмийам̣.

82. бха̄вана̄майапун̃н̃ам̣ ту, махаггатамануттарам̣;

йатха̄бхӯминийа̄мена, дети па̄кам̣ йатха̄сакам̣.

83. кат̣атта̄рӯпапа̄ка̄ни, пан̃чавока̄рабхӯмийам̣;

а̄руппа̄нуттаре па̄кам̣, татха̄ рӯпамасан̃н̃ису.

84. пун̃н̃а̄пун̃н̃а̄ни камма̄ни, теттим̣са̄пи ча йаббатха̄;

сан̃джаненти йатха̄йогам̣, пат̣исандхипаваттийам̣.

ити читтавибха̄ге пакин̣н̣акакатха̄ нит̣т̣хита̄.

дутийо париччхедо.